ދީނަށް ފުރައްސާރަ ކުރާ މީހުންނާ ދޭތެރޭގައި އެޅޭނެ ފިޔަވަޅެއް ހަމަ ނެތީ؟

މިފަހަކަށް އައިސް ދީނަށް ފުރައްސާރަ ކުރާ މީހުންގެ ނިސްބަތް މިއަންނަނީ އިތުރުވަމުންނެވެ. ސޯޝަލް މީޑިއާގެ އެކި ޕްލެޓްފޯމްތަކުގައި ވެސް ދީނަށް ފުރައްސާރަކޮށް، ތަފާތު އެކި ކަންތައްތައް ކުރަނީއެވެ. އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކް ކުރުމުގެ މަސައްކަތް އަދިވެސް ނުފެށޭކަމަށް ފުލުހުން ވަނީ ބުނެފައެވެ.

އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކް ކުރުމުގެ އަމުރެއް ކްރިމިނަލް ކޯޓުން ނެރެފައިވަނީ، މި މީޑިއަމްތައް ބޭނުންކޮށްގެން އިސްލާމް ދީން ފިޔަވައި އެހެން ދީންތައް ފެތުރުމުގެ މަސައްކަތް ކުރަމުންދާ ދަނޑިވަޅެއްގައެވެ. ފުލުހުން ވަނީ މިފަދަ ޕޭޖްތަކާއި، އެޕްލިކޭޝަންތައް އަދި ސޯޝަލް މީޑިއާ ޕްލެޓްފޯމްތައް މެދުވެރިކޮށްގެން ހިންގާ މިފަދަ އަމަލުތައް ތަހުގީގުކޮށްފައެވެ. އަދި އެ ކަން ކްރިމިނަލް ކޯޓަށް ހުށަހެޅުމުން އެ ކޯޓުން ވަނީ މިފަދަ އެކި މީޑިއަމްތައް ބްލޮކްކުރުމުގެ އަމުރެއް ނެރެފައެވެ.

އިންޓަރނެޓްގެ ޒަރީއާއިން ރާއްޖޭގައި އެހެން ދީންތައް ފެތުރުމަށް ގެންގުޅޭ އެކި މީޑިއަމްތައް ބްލޮކްކުރުމަށް، މިދިޔަ ނޮވެމްބަރު މަހުގެ ފަހުކޮޅު ކްރިމިނަލް ކޯޓުން ވަނީ އަމުރެއް ނެރެފައެވެ. މި އަމުުރު ނެރުނުތާ ގިނަ ދުވަސްތަކެއް ވެފައިވާއިރު، އަދިވެސް މިފަދަ މީޑިއަމްތައް ބްލޮކް ކުރުމުގެ މަސައްކަތް ފަށާފައެއް ނުވެއެވެ.

އެންމެ މަތީދަރަޖައިގައި ހިމާޔަތް ކުރެވިފައިވާ، އަދި ރާއްޖޭގެ މިސްކިތްތަކުގެ ތެރެއިން އެންމެ ބޮޑަށް އެތަނަކާ ދޭތެރޭ ފަރުވާތެރިކަން ބެހެއްޓޭ މާލޭގެ ހުކުރު މިސްކިތުގެ ތެރެއަށް ކުޑަގިފިލިކޮށް އެއީ ހަނޑަސްބުރިޔަކަށް ވެސް ހަދައިފިއެވެ. އެކަން ކޮށްފައިވަނީ ނަފްސާނީ ކޮންމެވެސް ބައްޔެއްގެ އަސަރު ހުރި މީހެކޭ ވެސް ކިޔާއުޅެއެވެ.

މިފަދައިން ހައްޔަރު ކުރެވޭ މީހުން ދޫކޮށްލައެވެ. އަނެއް މިސްކިތެއް ނަޖިސްކުރާން ފުރުސަތުދެވޭ ބީދަޔަކުން މިނިވަންކޮށް ދޫކޮށްލެވެނީއެވެ. ސިކުނޑީގެ އުނިކަމަކަށް ނުވަތަ ފަރުދީ ނުކުޅެދުންތެރި ކަމަކަށް ރިއާޔަތްކުރެވިގެން މުޖުތަމައަށް ދޫކޮށްލެވެނީއެވެ. މީހާގެ ނުކުޅެދުންތެރިކަމުން ކުރެވޭހާވެސް ކަމަކީ މިސްކިތްތައް ނަޖިސްކުރުމެވެ. އެންމެފަހުން މިސްކިތަކަށް އަރައި ޚަތިމައަށް ކުޅުވެސް ޖަހައިފިއެވެ. މިހިސާބަށް ކަންތައް ދިޔައީމާ މުއައްސަސާތަކުން ވިސްނާން އެބަޖެހެއެވެ. ފިކުރުކުރާން އެބަޖެހެއެވެ. ސިކުނޑި އުނި މީހުން މީގެ ކުރިން ވެސް ދިވެހިންގެ ތެރެއިން ފެނެއެވެ. އުޅެއެވެ. އެކަމަކު މިސްކިތްތަކާއި ޚަތިމްތައް ހުންނަނީ ސަލާމަތުންނެވެ.

މާލެއާއި އަތޮޅުތެރޭގައި ލާޗާރުބިޗާރަށް އުޅޭ ޒުވާނުން އެއްވެ މަޝްވަރާކޮށް ނިދައި ހަދާ ޖަގަހަތަކެއް ކަމުގައި ވެސް ބައެއް މިސްކިތްތައް މިހާރު ވަނީ ހަދައިފައެވެ. މުދިންމީހާ ބަންގިދޭން ދާއިރުވެސް މިސްކިތުގައި މިފަދަ ޒުވާނުން ގަދަ ނިދީގައި ތިބެއެވެ. ސަފުތައް ހަދައިގެން މީސްތަކުން ނަމާދުކުރާއިރު ވެސް ހޭލުމެއް ތަންދެއްކުމެއް ނޯވެއެވެ. އެއްޗެކޭ ބުނާ މީހާގެ ގަޔަށް ބޮލަށް އަރައިގަތުން އަވަހެވެ.

މިސްކިތަށް ކުޑަކަމުދާ މީހުންނާއި ޚަތިމަށް ކުޅުޖަހާ މީހުންނާއި ފަންކާތަކުގައި އަންނައުނު ހިއްކަން އަޅާ ކޮންމެ މީހަކީ ނަފްސާނީ ބައްޔެއް ހުންނަ މީހަކަށް ވެގެން ދޫކޮށްލެވޭ ހިސާބަށް މުއައްސަސާތައް މިނިވަންވެ ފިކުރުތައް ވެސް މިނިވަންވެގެން މިކަމެއް ނުވާނެއެވެ. ސިކުނޑީގެ އުނިކަމެއްގެ ސަބަބުން ކަތިވަޅި ހިފައިގެން މަގުމައްޗަށް ނުކުމެ ފެންނަހާ ބަޔަކަށް ހަމަލާ ދޭ މީހާ މުޖުތަމައަށް ދޫކޮށްލާފައި ބެހެއްޓިދާނެބާވައެވެ. ނުބެހެއްޓޭނެއެވެ. ބަހައްޓައިގެން ފަރަކުނުޖެއްސޭނެއެވެ. ހަމައެގޮތަށް މިސްކިތެއް ފެންނައިރަށް ކުޑަކަމުދާން ޖެހޭ މީހުންނާއި ޚަތިމެއް ފެންނައިރަށް ދެމިޔަކަނުން ސޮނި ފައިބާ މީހުން ދާއިމީ އެކަހެރިކުރުމަކުން އެކަހެރިކުރާން ޖެހެއެވެ. ގާނޫނުތަކެއް ހަދައިގެންވިޔަސް އެނޫން އެއްޗެއް ހަދައިގެންވިޔަސް އެއީ ކުރަން ޖެހިފައިވާ ކަމެކެވެ.