ޖިންސީ ފުރައްސާރަ ކުރިމަތިވަމުންދާ މަޔެއްގެ ދުލުން!

ޖިންސީ ފުރައްސާރަ ކުރުމަކީ މިހާރަކަށް އައިސް ވަރަށް ގިނައިން އަޑުއިވޭ ވާހަކައެކެވެ. ޖިންސީ ފުރައްސާރައިގެ ޝިކާރައަކަށްވެ ސަލާމަތްވާނެ ގޮތެއް ނުފެނިފައިވާ ދެ ކުދިންގެ މަންމައެއްގެ ތަޖުރިބާތައް ރާއްޖެއެމްވީއާ ވަނީ ހިއްސާކޮށްފައެވެ. ލިއުޝާ (އަސްލުނަމެއް ނޫން) ބުނި ގޮތުގައި ފުރަތަމަ ކައިވެނި ކުރިމީހާގެ ފަރާތުން ލިބެމުންދާ ގެވެށި އަނިޔާ އާއި ޖިންސީ ފުރައްސާރައިގައި ދުވަސްތައް ގުނަމުން ދާތާ 16 އަހަރުވެފައި ވާކަމަށެވެ.

ދެ ކުދިން ލިބުނު އިރުވެސް ފިރިމީހާ އަކީ ހަރުދަނާ މީހެއް ނޫންކަމަށް ލިއުޝާ ބުންޔެވެ. އަދި މާލީ ގޮތުން ދަތިވާތީ ލިއުޝާ ވަޒީފާއަކަށް ދާން ފެށި ހިސާބުން ފިރިމީހާގެ ކަންތައް ހައްދުފަހަނައަޅައިގެން ދިޔަކަމަށެވެ. ފުރަތަމަ ދުވަސް ކަމުން އެދުވަހު މަސައްކަތަށް ނިކުތް ފަހުން ފިރިމީހާގެ ފޯންކޯލްތައް އައީ މެދުނުކެނޑި އަންނަމުންނެވެ. ވަޒީފާ އަދާކުރާތަނުގެ ސަބަބުން ފޯނުކުރާ ކޮންމެ ފަހަރަކު ފޯނު ނުނެގޭނެކަން އޭނަޔަށް އެގޭނެއެވެ.

ފޯނަށް އައީ އަވަގުރާނަ ކިޔާފައި ހުރި މެސެޖްތަކެވެ. ފޯނުނަގާ ކޮންމެ ފަހަރަކު ތަނުގައި އުޅޭ މީހުންނާއި އަޅުވާކިޔާ ހެދިއެވެ. އޮފީސް ނިންމާލުމަށްފަހު ގެޔަށް ދިއުމުން ކުދިން ކުރިމަތީ ހަޅޭއްލަވާ އަނިޔާކުރުމަށްފަހު ވަޒީފާ އަދާކުރާތަނުން ދީފައިވާ ޔުނީފޯރމް ވީދާލިއެވެ. ފުރަތަމަ ވަޒީފާޔަށް ނިކުތް ދުވަހަކީ ހިތުން ނުފިލާނެ ދުވަހެއްކަން ފާހަގަކުރަމުން ލިއުޝާ ކިޔާދިނެވެ.

އޭގެ ފަހުން އޭނާގެ އަނިޔާ ވެރިކަން އައީ ބޮޑުވަމުންނެވެ. ފިރިމީހާގެ މަންމައާއި ބައްޕަގެ ކުރިމަތީ އޮރިޔާންކުރިއެވެ. ދަރިން ކުރިމަތީ އެތަކެއް އަނިޔާ ކުރިއެވެ. ކެތްނުކުރެވުމުން ވަރިވީއެވެ. އަދި އޭގެފަހުން އިން މީހާގެ ކާރަށް 5 ފަހަރެއްގެ މަތިން ވަނީ އެކިވަރުގެ ގެއްލުންދީފައެވެ. އަދި އިނދެގެން އުޅުނުއިރު އެކިދުވަސް މަތިން ފާޚާނާގެ ކުޑަދޮރުން ފޯނު ދިއްކޮށް ނަގާފައިވާ ވީޑިއޯތައް ލިއުޝާގެ ފޯނަށް ފޮނުވާ ލީކް ކޮށްލާނެ ކަމުގެ އިންޒާރުތައް އައީ ދެމުން ކަމަށް ލިއުޝާ ކިޔާދިނެވެ.

ހުކުރުދުވަހެކެވެ. 9 އަހަރުގެ ފިރިހެންދަރިފުޅު ގޮވައިގެން މިހާރު އިދެގެން އުޅޭމީހާގެ ކާރަށް އެރުމާއެކީ ފަހަތު ދޮރު ހުޅުވުމަށްފަހު ކުރީގެ ފިރިމީހާ ކާރަށް ވަނެވެ. އަދި މިހާރުގެ ފިރިމީހާގެ މޫނުމަތީގައި ޖެހުމަށް ފަހު ފޯނާއި އަތްދަބަސް ފޭރިގަތެވެ. މިފަދަ ކޮންމެ ކަމެއް ހިނގުމުން ޕޮލިހަށް މައްސަލަ ހުށައަޅާ ކަމަށް ލިއުޝާ ބުންޏެވެ. ނަމަވެސް މިވީހާތަނަށް ހައްލެއް ލިބިފައެއް ނުވެއެވެ.

ކުދިން ބަލާ ސްކޫލް ދޮށަށް ދިއުމުން އެތަނަށް ގޮސް އެންމެން ކުރިމަތީގައި އަނިޔާކޮށް ދަރިން ގަދަކަމުން ގެންދަން އުޅެފައި އެބަހުއްޓެވެ. އަދި ޕޮލިހުން އައިސް އޭނާ ގެންދެއެވެ. ފުލުހުންނަށް ގުޅާ މައުލޫމާތު ހޯދުމުން ނަސޭހަތް ދީފައި ފޮނުވާލާފައިވާކަމަށް ބުނެއެވެ. މިހާތަނަށް އައިއިރު އޭނަ އެ އުޅެނީ މިނިވަންކަންމަތީ ގައެވެ. ލިއުޝާ އާއި ދަރިން ތިބެނީ ބިރުވެރިކަމެއް ގައެވެ.

މަގުމަތިން ދިމާވާ ކޮންމެފަހަރަކު ގަޔަށް އަތްނުލާ ފަހަރެއް ނުދެއެވެ. އެންމެފަހުން ހުކުރުދުވަހު އޮފީސް ބޭރުގައި ހުއްޓާ އައިސް ލިއުޝާގެ މޭމަތީގައި ހިފައި އަދި ކުރިމަތީފަރާތުގައި އަތުން ޖަހާފައި ދިއައީއެވެ. ޕޮލިހަށް މައްސަލަ ހުށައެޅުމުން ޕޮލިހުން ބުނީ ހޮސްޕިޓަލަށް ނުދިޔައީ ކީއްވެގެން ހެއްޔެވެ. މިފަދަ އަމަލުތައް ހިންގަމުން ދާއިރުވެސް ޕޮލިހުން މިތިބެނީ ކީއްވެފައިބާއޭ ހިތަށްއަރައެވެ. ލިއުޝާ ކިޔައިދިނެވެ. 

ދަރިންނާ ވާހަކަ ދައްކަން ފޯނު ދިނުމުން އެކުދިން ގާތުގައިވެސް ހަޑިހުތުރުބަހުން ވާހަކަދައްކާ ދައްކައެވެ. މިހާރު އެކުދިން ބުނަނީ އެއީ ބައްޕަ ނޫން ކަމަށެވެ. ބައްޕައެއް އެހާ ހަޑިމުޑުދާރު ވާހަކަ ނުދައްކާނެ ކަމަށެވެ. މިބާވަތުގެ ކަންކަމާހެދި ދަރިންނާއި ލިއުޝާ މިހާރު ތިބެނީ ނަފްސާނީ ވެފައެވެ. މިކަމަށް އިންސާފު ލިބޭނެ ދުވަހެއްގެ އިންތިޒާރުގައެވެ. އިންސާފު ލިބޭނީ ކޮން ދޮރެއްގައި ޓަކިދީގެން ކަމެއް ނޭގެއެވެ. މިފަދަ އަމަލުތައް ހިންގަމުންދާއިރު ކަމާގުޅޭ ވުޒާރާތައް މިވަނީ ނިދާފައެވެ. މިފަދަ ކަން ކަމުގައި އާއްމު ފަރުދުން ސަލާންޖެހުމަކީ މުއައްސަސާތައް ފެއިލްވެފައި ވާކަމުގެ ހެއްކެވެ.

މިފަދަ ސީރިއަސް އަދި މީހުންނަށް ނަފްސާނީ ގޮތުންނާއި ޖިސްމާނީ ގޮތުން ނުރައްކަލާ ކުރިމަތިލާން ޖެހިފައިވާ މައްސަލަތައް ހަލުވި މިނެއްގައި ތަހުގީގުކޮށް، ލިއުޝާ ފަދަ އެތަން އަންހެނުންނަކަށް އިންސާފު ހޯދައި ދިނުމަކީ އެ ވުޒާރާތަކުގެ މައްޗަށް އޮތް ވާޖިބެކެވެ. މިއަދު ލިއުޝާއާ އޭނާގެ ދަރީންނަށް މިފަދަ ކަމެއް ކުރިމަތިވެފައިވާއިރު މާދަމާ ތިބާގެ އާއިލާ މީހަކަށް މިފަދަ ކަމެއް ކުރިމަތިވުމުން، މަންޒަރު ބަލަން ދެ އަތް އުރާލައިގެން ހަމަތިބޭނީތޯއެވެ؟