މޯލްޑިވިއަން އިން އައްޑޫ އާއި ހުވަދޫއާ ދޭތެރޭ ސީދާ ދަތުރުތައް ފަށައިފި
19 ޑިސެމްބަރު 2019 | ބުރާސްފަތި 11:56އައްޑޫ އާއި ކޫއްޑޫއާ ދެމެދު ހަފްތާއަކު ތިން ފްލައިޓް ބޭއްވުމަށް ހަމަޖެހިފައިވޭ
މޯލްޑިވިއަންގެ ފްލައިޓެއް
ގައުމީ އެއަރލައިން މޯލްޑިވިއަންއިން އައްޑޫ އާއި ހުވަދޫއާ ދޭތެރޭ ސީދާ ދަތުރުތައް ފަށައިފިއެވެ.
މޯލްޑިވިއަން އިން ބުނީ އައްޑޫ އާއި ކޫއްޑޫއާ ދެމެދު ހަފްތާއަކު ތިން ފްލައިޓް ބޭއްވުމަށް ހަމަޖެހިފައިވާ ކަމަށެވެ. އެހެންކަމުން އައްޑޫއާ ހުވަދޫއާ ދެމެދު ޝެޑިއުލް ދަތުރުގެ ގޮތުގައި ހަފްތާއަކު ހަ ފްލައިޓް މޯލްޑިވިއަނުން އޮޕަރޭޓް ކުރަމުންދާނެއެވެ.
އައްޑޫއާ ހުވަދޫއާ ދެމެދު ކުރިއަށް ގެންދާ ޝެޑިއުލް ދަތުރުގެ އެއްކޮޅު ޓިކެޓުގެ އަގަކީ 555 ރުފިޔާއެވެ.
ބޮޑު ޗުއްޓީއާ ދިމާކޮށް މޯލްޑިވިއަނުން ޝެޑިއުލް ފްލައިޓްތައް އިތުރު ކޮށްފައިވާއިރު، ބައެއް ފްލައިޓްތަކުން އެންމެ އަގު ހެޔޮ ފެއަރ ވެސް ވަނީ ތަޢާރަފު ކޮށްފައެވެ. އެގޮތުން ޖުމްލަ ހަތް ސެކްޓަރއަށް މި ފެއަރތަކުގައި ފްލައިޓްތައް އިތުރު ކޮށްފައިވެއެވެ.
ބޮޑު ޗުއްޓީއަށް ރާއްޖެއިން ބޭރަށް ދާ ފަރާތްތައްވެސް އިތުރުވެފައިވާއިރު، މޯލްޑިވިއަނުން ދަނީ އިންޑިއާގެ ތްރިވަނަންތަޕޫރަމާއި، ޗެންނާއި އަދި ބަންގްލަދޭޝް ފަދަ ޤައުމުތަކަށް ދަތުރު ކުރަމުންނެވެ.
މޯލްޑިވިއަން އިން ވަނީ ޑިސެމްބަރު މަހުގެ އެއްވަނަ ދުވަހު ނ. މާފަރު އިންޓަރނޭޝަނަލް އެއަރޕޯޓު ހުޅުވާފައެވެ. އަދި އެ އެއަރޕޯޓުން ވަރަށް އަވަހަށް ސީޕްލޭންގެ ޚިދުމަތް ފެށިގެންދާނެ ކަމަށް އައިލެންޑް އޭވިއޭޝަންގެ މެނޭޖިންގ ޑިރެކްޓަރ މުހައްމަދު ރިޒްވީ ވަނީ ދާދި ފަހުން ވިދާޅުވެފައެވެ.
ނ. މާފަރު އެއަރޕޯޓް ހުޅުވާ ޝެޑިއުލް ފްލައިޓުތައް ފަށާފައިވާއިރު މޯލްޑިވިއަން އިން މާލެއިން މާފަރަށް ދަތުރުތައް ކުރުމަށް ނިންމާފައިވަނީ ދުވާލަކު ތިން ފްލައިޓެވެ. އެހެންނަމަވެސް މަދުވެގެން ދުވާލަކު 6 ފްލައިޓް އޮޕަރޭޓް ކުރާނެ ކަމަށް މޯލްޑިވިއަން އިން މައުލޫމާތުދެއެވެ.
ރާއްޖޭގެ ހުރިހާ ވައިގެ ބަނދަރަކަށް ދަތުރުކުރާ ހަމައެކަނި އެއަރލައިން އަކީ ވެސް މޯލްޑިވިއަން އެވެ.
