މި ސަރުކާރުގެ ވިސްނުމަކީ ރާއްޖޭގެ އިޤުތިޞާދުގެ ރަންބިސް އަޅާ ކުކުޅު ކަމަށްވާ "ފަތުރުވެރިކަން" ކުރިއެރުވުން ކަމަށާއި އެ ކުކުޅުގެ ބަނޑުފަޅާލާ، އޭގެ މޭބިސްކުރަނޑިގަނޑު ނަގައެއް ނުލާނެ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

ޓޫރިޒަމް މިނިސްޓްރީއިން ބޭއްވި 'ބުރަބި' ޖަލްސާ ޝަރަފުވެރިކޮށްދެއްވާ ވާހަކަދައްކަވަމުން މިނިސްޓަރ ވިދާޅުވީ ފަތުރުވެރިކަމަކީ ދިވެހިންގެ ހިންމަތާއި މިންނަތުން ގެނެސްފައިވާ ދާއިރާއެއް ކަމަށާއި ފަތުރުވެރިކަމަކީ ދިވެހިރާއްޖެގެ އިޤުތިޞާދުގެ ރަންބިސް އަޅާ ކުކުޅު ކަމަށެވެ.

ފަތުރުވެރިކަން ކުރިއެރުވުމަށް ރާއްޖެއިން ބޭރަށް ދަތުރު ކުރެއްވުމުގައި މިނިސްޓްރީގެ ދާއިރާއިން ވެދެވެން ހުރި ހުރިހާ އެހީއެއް ވެދެއްވާނެ ކަމަށް މިނިސްޓަރ ވިދާޅުވިއެވެ. އަދި މިއަހަރުގެ ތެރޭގައި ވެސް ބައެއް ޤައުމުތަކަށް ދަތުރު ކުރުމުގައި އިތުރު ލުއި ފަސޭހަތަކެއް ހޯދާދީފައިވާކަން މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.

އަންނަ އަހަރުގެ މާރޗް މަހުގެ 2 ވަނަ ދުވަހުން ފެށިގެން ޝެންގަން ވިސާ ލިބުމުގެ ފުރުޞަތު ހުޅުވިގެންދާކަން ފާހަގަކުރައްވާ މިނިސްޓަރ ވިދާޅުވީ ޖަރުމަނު ވިލާތުން ފެށިގެން ދިޔަ ނަމަވެސް މާރޗު މަހުގެ 2 ވަނަ ދުވަސް އަންނަ އިރު ޔޫރަޕުގެ އެހެން ޤައުމުތަކުން އެ މަރުހަލާގައި ބައިވެރިވާނެ ކަމުގެ ޔަޤީންކަން އެބައޮތް ކަމަށެވެ. އަދި އަންނަ އަހަރުގެ ތެރޭގައި ދުނިޔޭގެ އެހެނިހެން ޤައުމުތަކަށް ވެސް އެ ފުރުޞަތު ހުޅުވިގެންދާނެ ކަމަށް މިނިސްޓަރ ވިދާޅުވިއެވެ.

މިހާރުވެސް ދުނިޔޭގެ 84 ޤައުމަކަށް ކުރިން ވިސާ ނެގުމަކާއި ނުލައި ދިވެހިންނަށް ދަތުރުކުރެވެއެވެ. މި އަހަރު އެކަނިވެސް، ޔުނައިޓެޑް އަރަބް އެމިރޭޓްސް، ރަޝިޔާ، މޮރޮކޯ އަދި ތައިލެންޑަށް ކުރިން ވިސާ ނެގުމަކާ ނުލައި ދިވެހިންނަށް ދަތުރުކުރެވޭ ގޮތަށް ވިސާ ވެއިވަރ އެގްރިމެންޓްތައް ހެދި، އިންޑިއާ އަދި ސްރީލަންކާއިން ވިސާގެ ބޮޑެތި ލުއިފަސޭހަތަކެއް ވަނީ ހޯދިފައެވެ.