ރިތިކް ރޯޝަންގެ ފިލްމު ''ސުޕަރ 30'' ގެ ހޮލީވުޑްގެ ރީމޭކެއް ހެދުމުގެ މަސައްކަތް ކުރަމުންދާ ކަމަށް ރިޕޯޓުތައް ބުނެފިއެވެ.
އޭޝިއަން އޭޖް ކިޔާ ނޫހަކުން ރިޕޯޓުކޮށްފައިވާ ގޮތުން، ހޮލީވުޑްގެ އިސް ފަރާތަަކުން ސަންޖޭ ދައްތާ ލިޔެފައިވާ ފިލްމުގެ މަސައްކަތް ވަނީ ފަށާފައެވެ. އެގޮތުން ފިލްމުގެ ކާސްޓިން ފައިނަލްވުމުން ފިލްމަށް ޑައިރެކްޓަރަކު ހަމަޖައްސަަން ހަމަޖެހިފައިވާ ކަމަށްވެސް ރިޕޯޓުތައް ބުނެއެވެ.
''ސުޕަރ 30'' އަކި މަޝްހޫރު މެތަމެޓިޝަން އާނަންދު ކުމާރުގެ ފިލްމަކަށްވާތީވެ ހޮލީވުޑްގެ ފިލްމުގައި އޭނާގެ ބައިވެރިވުން ހިމެނުމަށް ނިންމާފައިވާ ކަމަށްވެސް އެ ނޫހުން ރިޕޯޓް ކުރެއެވެ. އިތުރު ރިޕޯޓެއް ބުނެފައިވާ ގޮތުން، އެމެރިކާގެ ޕްރޮޑަކްޝަން ކުންފުންޏެއްގެ އިސް އެޖެންޓުން ތަކެއް ވަނީ އެ ފިލްމު އުފެއްދި ރިލަޔެންސް އެންޓަަޓައިންމެންޓްގެ އިސްބޭފުޅަކާއި ބައްދަލުކޮށްފައެވެ. އެކަމަކު އެއީ ކޮންބައެއް ކަމެއް އަދި މިހާތަނަށް ހާމަކޮށްފައެއް ނުވެެއެވެ.
ވިކާސް ބެލް ޑައިރެކްޓް ކޮށްފައިވާ ''ސުޕަރ 30'' ފިލްމުގެ ވާހަކަ ބިނާކޮށްފައިވަނީ މަޝްހޫރު މެތަމެޓިޝަން ކަމަށްވާ އަނަންދު ކުމާރު ބިހާރުގެ ކުދިންތަކެއް އައިއައިޓީގެ އެންޓްރެންސް އެކްޒާމަށް ތައްޔާރު ކޮށްދިނުމަށް ކުރާ މަސައްކަތެކެވެ.
ރިތިކް ބުނެފައިވަނީ އޭނާ އެ ފިލްމު ކުޅެން އާއެކޭ ބުނީ ވަރަށް ވިސްނުމަށް ފަހުގައި ކަމަށެވެ. ރިތިކް އޭނާގެ ކެރިއަރުގައި މީހެއްގެ ޙަޔާތުގެ މައްޗަށް ކުޅޭ ފުރަތަމަ ފިލްމަށް އާއެކޭ ބުނީ އޭނާއަށް އެ ފިލްމު މޮޅަށް ކުޅެވޭނެ ކަން ޔަޤީންވުމުން ކަމަށް އޭނާ ބުންޏެވެ.
