ހަރުކަށި ފިކުރުގެ ވާހަކަތައް ސިއްރުކޮށް ހިފަހައްޓައިގެން ގައުމަށް ލިބޭނެ ފައިދާއެއް ނެތް: ރައީސް ޞާލިޙު
16 ޑިސެމްބަރު 2019 | ހޯމަ 14:10މިހާ ފާޅުކަން ބޮޑު ގޮތެއްގައި ހަރުކަށި ފިކުރުގެ ވާހަކަ އާންމުކޮށް ދެކެވުނު މިއީ ފުރަތަމަ ފަހަރު
ރައީސް އިބްރާހިމް މުހައްމަދު ރައީސް ޞާލިޙު
ރާއްޖޭގައި އޮތް ހަރުކަށި ފިކުރުގެ ވާހަކަތައް ސިއްރުކޮށްގެން ހިފަހައްޓައިގެން ތިބެގެން ގައުމަށް ލިބޭނެ ފައިދާއެއް ނެތްކަމަށާއި، އެކަމަށް ދޫދިނުމެއް ނެތްކަމަށް ރައީސް އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ރައީސް މިހެން ވިދާޅުވީ ދެ ދުވަހުގެ މުއްދަތަށް ކުރިޔަށްގެންދިޔަ "ވިއަވަތި ރާއްޖެ" މަޝްވަރާ ބައްދަލުވުން ނިންމުމުގެ ގޮތުން، އެބައްދަލުވުމުގެ ބައިވެރިންނާއި މުޚާޠަބުކުރައްވާ ދެއްކެވި ވާހަކަފުޅުގައެވެ. މިބައްދަލުވުން ނިންމުމުގެ ގޮތުން ރައީސް ދެއްކެވި ވާހަކަފުޅުގައި، ގައުމަށް ދިމާވެފައި އޮތް ބޮޑެތި މައްސަލަތަކާއި މެދުގައި ވެސް މި ބައްދަލުވުމުގައި މަޝްވަރާ ކުރެވިއްޖެ ކަމަށް ރައީސް ވިދާޅުވިއެވެ.
އެގޮތުން ތިމާވެއްޓަށް އަންނަމުންދާ ބަދަލާއި ގުޅިގެން، ރާއްޖެއަށް ކުރިމަތިވެފައި ހުރި ގޮންޖެހުންތަކާއި ހަރުކަށި ފިކުރުގެ ސަބަބުން ރާއްޖެ ކުރިމަތިލާން ޖެހިފައިވާ ނުރައްކާތެރި ބިރުވެރިކަމުގެ ވާހަކައާއި ދޭތެރޭގައި ވެސް މަޝްވަރާ ކުރެވިއްޖެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިހާ ފާޅުކަން ބޮޑު ގޮތެއްގައި ހަރުކަށި ފިކުރުގެ ވާހަކަ އާންމުކޮށް ދެކެވުނު މިއީ ފުރަތަމަ ފަހަރު ކަމަށެވެ. އަދި ޤަބޫލުކުރެއްވުނީ މި ވާހަކަތައް ސިއްރުކޮށްގެން ހިފަހައްޓައިގެން ތިބެގެން ގައުމަށް ލިބޭނެ ފައިދާއެއް ނެތްކަމުގައި ކަމަށާއި، ފުރަތަމަ ކަމަކަށް ރާއްޖޭގައި ހަރުކަށި ފިކުރުގެ ވިސްނުން އެބައޮތްކަން ޤަބޫލުކުރައްވާ ކަމަށެވެ.
ރައީސް ވިދާޅުވީ ރާއްޖޭގެ ސަލާމަތީ ހިދުމަތްތަކުގެ އެހީތެރިކަމާއެކީގައި އެބޭފުޅުންގެ ވިސްނުމާއި ފިކުރާ އެކީގައި އިރާދާކުރެއްވިއްޔާ ރާއްޖެއަށް ކުރިމަތިވެފައި މިއޮތް ދަތިއުދަގުލުން މި ގައުމު ސަލާމަތްކޮށްދެއްވާނެ ކަމަށެވެ.
