ރާއްޖެއާއި ރަޝިޔާއާއި ދެމެދު ވިޔަފާރިއާއި އިގްތިސާދީ ދާއިރާއިން ގުޅުން ބަދަހިކުރުމާބެހޭ މަޝްވަރާތަކެއް ކޮށްފި
12 ޑިސެމްބަރު 2019 | ބުރާސްފަތި 14:37ދެގައުމުގެ ގުޅުން އިތުރަށް ބަދަހިކުރުމާ ބެހޭ ގޮތުން މަޝްވަރާ ކުރެއްވި
ރަޝިޔާއިން ރާއްޖެއަށް ކަނޑައަޅާފައި ހުންނަވާ ސަފީރާ، ރައީސް ބައްދަލުކުރައްވަނީ
ދިވެހި ރާއްޖެއާއި ރަޝިޔާއާއި ދެމެދު ވިޔަފާރިއާއި އިޤްތިޞާދީ ދާއިރާއިން އިތުރަށް ގުޅުން ބަދަހި ކުރުމާއި ބެހޭގޮތުން މަޝްވަރާކޮށްފިއެވެ.
މިމަޝްވަރާ ކުރެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ އަރިހަށް، ރަޝިޔާއިން ރާއްޖެއަށް ކަނޑައަޅާފައި ހުންނަވާ ސަފީރު ޔޫރީ މަޓެރީ، ކުރެއްވި އިހުތިރާމުގެ ޒިޔާރަތުގެ ތެެރެއިންނެވެ.
ބުރާސްފަތި ދުވަހު ރައީސް އޮފީހުގަ އޮތް މިބައްދަލުކުރެއްވުމުގައި، ރައީސް ޞާލިޙާއި، ސަފީރު ޔޫރީ މަޓެރީ، ދެއްކެވި ވާހަކަފުޅުގައި، ދެ ގައުމުގެ މެދުގައި އޮތް ޒަމާންވީ ގުޅުން އިތުރަށް ބަދަހިކުރެއްވުމަށް ކުރައްވާ މަސައްކަތްތަކާބެހޭގޮތުން މަޝްވަރާ ކުރެއްވިއެވެ. އެގޮތުން ފަތުރުވެރިކަމާއި، ތަޢުލީމާއި، ވިޔަފާރިއާއި އިޤްތިޞާދީ ދާއިރާއިން ދެޤައުމުގެ މެދުގައި އިތުރަށް ގުޅުން ބަދަހިކުރުމަށް މަޝްވަރާ ކުރައްވާފައިވާކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.
މިބައްދަލުކުރެއްވުމުގައި ރައީސް ޞާލިޙު ވަނީ ރާއްޖެއާއި ރަޝިޔާގެ ރައްޔިތުންގެ މެދުގައި އޮތްގުޅުން އިތުރަށް ބަދަހިކުރުމަށް ކުރެވޭ މަސައްކަތްތަކަށް އަލިއަޅުއްވާލައްވާ، ދެޤައުމުގެ ރައްޔިތުންނަށް ވިސާގެ ލުއިފަސޭހަކަން ހޯއްދަވައިދެއްވުމަށް ވެވުނު އެއްބަސްވުމުގެ މައްޗަށް އަލިއަޅުވާލާ ވާހަކަފުޅުދައްކަވާފައެވެ. ރައީސްގެ ވާހަކަފުޅުގައި ރަޝިޔާ ސަރުކާރުން ދެއްވާ އެހީތެރިކަމާއި އެއްބާރުލުން ފާހަގަކުރައްވާ އެކަމަށްޓަކައި ރަޝިޔާ ސަރުކާރަށް ޝުކުރުއަދާކުރެއްވިއެވެ.
މިބައްދަލުކުރެއްވުމުގައި ރަޝިޔާ ސަފީރު ވަނީ ދެޤައުމުގެ މެދުގައި އޮތް ގުޅުން އިތުރަށް ބަދަހިކުރުމަށް ކުރިއަށް އޮތް ދުވަސްތަކުގައި މަސައްކަތްކޮށްދެއްވާނެކަމުގެ ޔަޤީންކަން ރައީސް ޞާލިޙަށް އަރުވާފައެވެ.
