ޓޫރިޒަމް މިނިސްޓްރީގެ 31 ވަނަ އަހަރީ ދުވަސް ފާހަގަކުރުމުގެ ރަސްމިއްޔާތުގައި ކުރީގެ މިނިސްޓަރ ޒަކީ ބައިވެރިވެވަޑައިގަންނަވައިފި
12 ޑިސެމްބަރު 2019 | ބުރާސްފަތި 11:32މިރަސްމިއްޔާތަށް ޒަކީ ރާއްޖެ ވަޑައިގެންނެވީ ރޭގެ ވަގުތެއްގައި
ޓޫރިޒަމް މިނިސްޓްރީއަށް 31 އަހަރު ފުރުން ފާހަގަ ކުރުމުގެ ރަސްމިއްޔާތުގެ ތެރެއިން ކޭކް ފަޅުއްވަނީ-
ޓޫރިޒަމް މިނިސްޓްރީގެ 31 ވަނަ އަހަރީ ދުވަސް ފާހަގަ ކުރުމަށްޓަކައި ބޭއްވި ޚާއްޞަ ރަސްމިއްޔާތުގައި ކުރީގެ ޓޫރިޒަމް މިނިސްޓަރު އަދި ދައުލަތަށާއި ފަތުރުވެރިކަމުގެ ދާއިރާއަށް ގިނަގުނަ ޚިދުމަތްތަކެއް ކުރެއްވި، އިބްރާހީމް ހުސައިން ޒަކީ ބައިވެރިވެވަޑައިގަންނަވައިފި އެވެ.
ޓޫރިޒަމް މިނިސްޓްރީގައި ބުރާސްފަތި ދުވަހު މެންދުރުފަހު ބޭއްވި އެ ރަސްމިއްޔާތުގައި ކުރިން އެމްޑީޕީގެ ރައީސްކަން ވެސް ކުރެއްވި ޒަކީގެ އިތުރުން ކުރީގެ ޓޫރިޒަމް މިނިސްޓަރު ޑރ. މުސްޠަފާ ލުޠުފީ އާއި ކުރީގެ ޓޫރިޒަމް މިނިސްޓަރު މަޙްމޫދު ޝައުގީ ވެސް ބައިވެރިވެވަޑައިގެންނެވި އެވެ.
މިރަސްމިއްޔާތުގައި ވާހަކަފުޅު ދައްކަވަމުން ޓޫރިޒަމް މިނިސްޓަރު އަލީ ވަހީދު ވިދާޅުވީ، ޓޫރިޒަމް މިނިސްޓްރީއަށް 31 އަހަރު ފުރުން ފާގަހަކުރާއިރު، ކުރީގެ މިނިސްޓަރުން ފަތުރުވެރިކަމުގެ ދާއިރާއަށް ކޮށްދެއްވާފައިވާ މަސައްކަތްތަކަކީ ފާހަގަކޮށްލެވޭ، އަދި ބަލައިގަންނަންޖެހޭ ޚިދުމަތްތަކެއް ކަމަށެވެ.
އަލީ ވަހީދު ވިދާޅުވީ ޓޫރިޒަމް މިނިސްޓަރުކަން ކުރެއްވި ބޭފުޅުންގެ ތެރޭގައި މިވަގުތު ރާއްޖޭގައި ތިއްބެވި އަދި މި މިރަސްމިއްޔާތުގައި ބައިވެރިވެވަޑައިގެންނެވޭ ގޮތަށް ތިއްބެވީ އެ ތިން ވަޒީރުން ކަމަށެވެ.
ކުރީގެ ރައީސް މުޙައްމަދު ނަޝީދުގެ ވެރިކަން ބަދަލުކޮށް، ވެރިކަމަށް އަރާ ވަޑައިގެންނެވި، ޑރ. މުހައްމަދު ވަހީދު ހަސަންމަނިކުގެ ސަރުކާރުގެ ދުވަސްވަރު، ރާއްޖެއިން ބޭރަށް ވަޑައިގެންނެވި ގޮތައް، ރާއްޖޭން ބޭރުގައި ދިރިއުޅުއްވާ ޒަކީ މި ރަސްމިއްޔާތައް ވަޑައިގެންނެވީ ރޭގެ ވަގުތެއްގަ އެވެ. ނަމަވެސް މި ރަސްމިއްޔާތަށްފަހު، ސްރީލަންކާގެ ރައީސްއާ ބައްދަލުވުމެއް ހަމަޖެހިފައިވާތީ ބުރާސްފަތި ދުވަހުގެ ހަވީރުގެ ވަގުތެއްގައި ސްރީލަންކާއަށް ވަޑައިގެންނެވުމަށް ހަމަޖެހިފައިވާ ކަމަށް ޒަކީ ވިދާޅުވި އެވެ.
ޒަކީ އާއި ޝައުގީ އަކީ ސިޔާސީ ކަންކަމުން އެކަހެރިވެވަޑައިގަންނަވާފައިވާ ކަމަށް ވިދާޅުވެފައިވާ ދެބޭފުޅުންނެވެ.
މި ރައްސްމިއްޔާތުގައި ވާހަކަފުޅު ދައްކަވަމުން ޓޫރިޒަމް މިނިސްޓަރު އަލީ ވަހީދު ވިދާޅުވީ، އެމަނިކުފާނުގެ މިނިސްޓަރު ކަމުގެ ފުރަތަމަ އަހަރު، ރާއްޖޭގެ ޓޫރިޒަމް އިތުރަށް ތަރައްޤީކޮށް ކުރިއެރުވުމަށާއި، ރައްޔިތުން އެދޭ ފަދަ ބަދަލުތައް ގެނައުމަށް ގިނަގުނަ މަސައްކަތްތަކެއް ކުރަންޖެހިފައިވާކަމަށެވެ.
އަލީ ވަހީދު ވިދާޅުވީ ބުރާސްފަތި ދުވަހު ބޭއްވުމަށް ކުރިން ނިންމި، ޓޫރިސްޓް ރިސޯޓްގެ ގޮތުގައި ތަރައްޤީ ކުރުމަށް އިތުރު 12 ރަށެއް އިޢުލާން ކުރުމުގެ ރަސްމިއްޔާތު މިމަހުގެ 17 ވަނަ ދުވަހަށް ފަސްކުރެވިފައިވާ ކަމަށެވެ.
ޒަކީއާއި، މުސްޠަފާ ލުޠުފީއާއި، ޝައުގީ، ޓޫރިޒަމް މިނިސްޓަރުކަން ކުރައްވާފައިވަނީ ކުރީގެ ރައީސް މައުމޫންގެ ވެރިކަމުގަ އެވެ.
