ދަނޑުވެރި ނަފާ ލޯން ސްކީމުން މިހާތަނަށް 2 މިލިއަނަށްވުރެ ގިނަ ރުފިޔާ ދޫކޮށްފި
12 ޑިސެމްބަރު 2019 | ބުރާސްފަތި 10:06މިހާތަނަށް 2،250،000 ރުފިޔާ ލޯނުގެ ގޮތުގައި ވަނީ ދީފައި
ނަފާ ލޯން ސްކީމަށް އެދި ހުށައެޅުމުގެ ފުރުސަތު މުޅި އަހަރަށް ހުޅުވާލެވިފައިވާނެ
ދަނޑުވެރިންނަށް ޚާއްޞަކޮށްގެން އުފައްދާފައިވާ ނަފާ ލޯން ސްކީމުން މިހާތަނަށް 2 މިލިއަނަށްވުރެ ގިނަ ރުފިޔާ ލޯނުގެ ގޮތުގައި ދޫކޮށްފައިވާކަމަށް ފިޝަރީޒް މިނިސްޓްރީން ބުނެފިއެވެ.
މިނިސްޓްރީގެ މަސައްކަތްތަކާއި ގުޅޭގޮތުން "ނުވަގަޑިމީޑިއާ" ނަމުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓްރީގެ އެސިސްޓެންޓް ޑިރެކްޓަރ ހުސައިން ފައިސަލް ވިދާޅުވީ، ދަނޑުވެރި ނަފާ ލޯނު ސްކީމުގެ ދަށުން މިހާތަނަށް 2،250،000 (ދެ މިލިއަން ދެލައްކަ ފަންސާސް ހާސް) ރުފިޔާ ލޯނުގެ ގޮތުގައި ދޫކުރެވިފައިވާ ކަމަށެވެ. އެގޮތުން މިނިސްޓްރީން އެސްޑީއެފްސީ ބޭންކު މެދުވެރިކޮށް ދޫކުރާ މި ލޯނަށް އެދި މިހާތަނަށް 25 ފަރާތަކުން ހުށައަޅާފައިވާ ކަމަށާއި، މިހާތަނަށް ލޯނު ދޫކޮށްފައިވަނީ 4 ފަރާތަކަށް ކަމަށް މިނިސްޓްރީން މައުލޫމާތުދެއެވެ.
ދަނޑުވެރިކަން ކުރިއެރުވުމަށްޓަކައި ދަނޑުވެރިންނަށް މާލީ އެހީތެރިކަން ފޯރުކޮށްދިނުމަށް ސަރުކާރުން ދޫކުރާ މި ލޯނަށް އެދި ހުށައެޅުމުގެ ފުރުސަތު އަހަރުގެ ކޮންމެ ހިސާބެއްގައިވެސް ވަނީ ހުޅުވާލެވިފައެވެ.
މި ސްކީމްގެ ދަށުން ދަނޑުވެރިކަމާ ގުޅުންހުރި ތަފާތު އެކިއެކި މަސައްކަތްތައް ކުރުމަށް ލޯނު ދޫކުރާއިރު، ދަނޑުވެރި ނަފާ ލޯނު ސްކީމުން ކޯޕަރޭޓް ނުވަތަ ކުންފުންޏަކަށްނަމަ ދެ މިލިއަން ރުފިޔާ އަދި އަމިއްލަ ފަރުދަކަށް ނަމަ ފަސް ލައްކަ ރުފިޔާ ދޫކުރުމަށް ވަނީ ހަމަޖެހިފަ އެވެ.
