އިންޑޮނޭޝިއާގެ އެކްޓަރަކަށް ލިބުނު އެވޯޑް ހާއްސަ ކުރީ ޝާހު އަށް

އިންޑޮނޭޝިއާގެ ސިތުރާ އެވޯޑްގައި އެންމެ މޮޅު އެކްޓަރުގެ އެވޯޑު ލިބުނު މުހައްމަދު ޚާންގެ އެވޯޑް ބޮލީވުޑްގެ ތަރި ޝާހްރުކް ޚާނަށް ހާއްސަ ކޮށްފިއެވެ.

ސިތުރާ އެވޯޑަކީ ކޮންމެ އަހަރަކު ބާއްވާ އިންޑޮނޭޝިއާ ފިލްމު ފެސްޓިވަލްގައި އެންމެ މޮޅު ފިލްމަށްދޭ އެވޯޑެކެވެ. މި އަހަރުގެ މޮޅު އެކްޓަރުކަން ހޯދި މުހައްމަދަށް އެވޯޑް ލިބުނު ވީޑިއޯ އެއް ޝާހުގެ ފޭނުން ހިންގާ ޓްވިޓަރ އެކައުންޓަކުން ވަނީ އަޕްލޯޑް ކޮށްފައެވެ.

އެވޯޑު ހޯދުމަށް ފަހު ސްޓޭޖަށް އަރައި މުހައްމަދު ބުނީ، އޭނާގެ އެވޯޑު ހާއްސަ ކުރަނީ ޝާހު އަށް ކަމަށެވެ. އަދި އެކްޓަރަކަށްވީ ޝާހުގެ ސަބަބުން ކަމަށް މުހައްމަދު ބުންޏެވެ. އެވޯޑް ސްޕީޗް ނިންމާލަމުން މޮޅު އެކްޓަރުގެ މަގާމު ހޯދި މުހައްމަދު ވަނީ ޝާހްގެ ''ޑުބްލިކޭޓް'' ފިލްމުގެ ''މެރި މެހެބޫބް މޭރި ސަނަމް'' ގެ ލަވައެއް ކިޔާފައެވެ.

މުހައްމަދަށް ޝުކުރު އަދާކުރަމުން ކުރި ޓްވީޓެއްގައި ޝާހު ބުނީ، އެ ކާމިޔާބީއާ މެދު އުފާކުރާ ކަމަށާއި، އަވަސް މުސްތަގުބަލެއްގައި ބައްދަލު ކުރާނެ ކަމަށެވެ.

މުހައްމަދު ޚާނަށް އެވޯޑް ލިބުނީ ކުސްމްބޫ ތުބުހް އިންދަހުކޫ ގައި އޭނާ އަދާކޮށްފައިވާ ރޯލަށެވެ. އެ ފިލްމު ވަނީ އިތުރު ހަތް އެވޯޑެއް ހޯދާފައެވެ. އެ ފިލްމުގައި އޭނާ ކުޅެފައިވަނީ ޖާވަނީސް ޑަންސަރެއް އަދި ކޮރިއޯގްރާފްގެ ރޯލެވެ.