އިގްތިޞާދުގެ އެންމެ ބޮޑު ބާރަށް މަސްވެރިކަން ހެދުމަކީ ނުކުރެވޭނެ ކަމެއް ނޫން: ރައީސް
9 ޑިސެމްބަރު 2019 | ހޯމަ 14:27މަސްވެރިން ބާނާ ހުރިހާ މަހެއް ގަތުމުގެ ގާބިލްކަން ސަރުކާރާއި އަމިއްލަ ކުންފުނިތަކުގައި ނެތުމުގެ ސަބަބުން މަސްވެރިކަމުގެ ސިނާޢަތު ވަނީ ދަށަށްގޮސްފައި ކަމަށް ރައީސް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މަސްވެރިކަމުގެ ސިނާޢަތް ފުޅާކޮށް މަސްގަނެ މަހުގެ އުފެއްދުންތައް އިތުރުކުރުމުގެ ގާބިލްކަން ބިނާކުރެވިއްޖެނަމަ ރާއްޖޭގެ އިގްތިޞާދުގެ އެންމެ ބޮޑު ބާރަކަށް ވެގެންދާނީ މަސްވެރިކަން ކަމަށާއި މިއީ ނުކުރެވޭވަރުގެ ކަމެއް ނޫން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެ އެވެ.
އެންސިސް ދަޅުމަސް ފެކްޓްރީ ރަސްމީކޮށް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ އެންމެ އިހުއްސުރެ މަސްވެރިކަމަކީ ދިވެހިންގެ ލޭނާރު ކަމަށާއި ފަތުރުވެރިކަމާއި އެހެން ބައެއް ސިނާޢަތްތަކާއެކު އިގްތިޞާދީ ރޭހުގައި މަސްވެރިކަން މިހާރު މިއޮތީ ތަންކޮޅެއް ފަހަތަށް ސޮއްސާލާފައި ކަމަށެވެ. މަސްވެރިކަމަށް މިހާލަތު މެދުވެރިވުމުގެ މައިގަނޑު ސަބަބަކީ މަސްވެރިކަން ފުޅާވެ ކުރިއަރައިގެން ދިޔަވަރާއި ގާތަށް މަސްވެރިކަމުގެ ސިނާޢަތްތައް ކުރިއަރުވަން މަސައްކަތް ނުކުރެވުން ކަމަށް ރައީސް ވިދާޅުވި އެވެ. މަސްވެރިން ބާނާ ހުރިހާ މަހެއް ގަތުމުގެ ގާބިލްކަން ސަރުކާރާއި އަމިއްލަ ކުންފުނިތަކުގައި ނެތުން ކަަމަށާއި މަހުގެ އުފެއްދުންތައް ބާޒާރަށް ނެރުމުގެ ގާބިލްކަން ނެތުމުން ކަމަށް ރައީސް ވިދާޅުވި އެވެ.
ރައީސް ވިދާޅުވީ އަމިއްލަ ކުންފުނިތަކުން އިސްނަގައިގެން އިންވެސްޓް ކުރުމުގެ ފޮނި ނަތީޖާ މިއަދު ފެންނަމުންދާ ކަމަށެވެ. އެގޮތުން އެންޒިސްއިން މިގާއިމުކުރި 25 މިލިއަން ޑޮލަރުގެ އިންވެސްޓްމަންޓުން ދޭހަކޮށްދެނީ މަސްވެރިކަމުގެ ސިނާޢަތަކީވެސް ރަނގަޅު ރޭވުންތަކަކާއި ދުރު މުސްތަގުބަލްގެ ވިސްނުންތަކާއެކު އިންވެސްޓް ކޮށްފިނަމަ އެކަމުން ރަނގަޅު ފައިދާ އާއި ނަފާ ހޯދޭނެ ސިނާޢަތެއް ކަމަށް ރައީސް ވިދާޅުވި އެވެ.
މީގެއިތުރުން ކިތަންމެ ގިނައިން މަސްބޭނިއަސް ބާނާ މަހުގެ ބޮޑު ބައެއް ނުއަގުގައި ވިއްކަން ޖެހުމަކީ ހިތާމައެއް ކަމަށް ރައީސް ވިދާޅުވިއެވެ. އަދި ބާނާ މަހުގެ ދެބައި ކުޅަ އެއްބައިވެސް އޭގެ އަގު އެއްކުރެވިގެން ވިއްކޭނެ ގޮތަށް އުފެއްދުންތަށް ތައްޔާރު ނުުކުރެވޭތީ ރޯމަހުގެ ގޮތުގައި އެކްސްޕޯޓް ކުރަން ޖެހުމަކީ އިގްތިޞާދަށް ލިބޭ ބޮޑު ގެއްލުމެއް ކަަމަށް ރައީސް ވިދާޅުވި އެވެ. އަދި މިކަންކަން ހައްލުކޮށް ދިވެހި ކަނޑުމަހަށް ރަނގަޅު އަގު ލިބޭނެ އިންތިޒާމުތައް ހަމަޖައްސައިގެން ނޫނީ މަސްވެރިކަމުން ރާއްޖޭގެ އިގްތިޞާދީ ތަރައްޤީއަށް ލިބެންޖެހޭ ހަގީގީ ފައިދާ ނުލިބޭނެ ކަމަށްވެސް ރައީސް ވިދާޅުވިއެވެ. ދިވެހި ކަނޑުމަހަށް ހަމައަގު ލިބިގެން މިދަނީ ދަޅުގާ ބަންދުކުރެވިގެން ނޫނީ ވެލިޔު އެޑް ކޮށްގެން ޕްރޮސެސް ކޮށްގެން އެކްސްޕޯޓް ކޮށްގެން ކަަމަށް ރައީސް ވިދާޅުވި އެވެ.
ރައީސް ވިދާޅުވީ ރާއްޖެއަކީ ފެށުނީއްސުރެވެސް ތިމާވެއްޓާ ރައްޓެހި މަސްވެރިކަމެއް ކުރަމުން އަންނަ ގައުމެއް ކަމަށެވެ. އަދި ޒަމާނާއެކު މަސްވެރިކަމުގެ ސިނާޢަތަށް އިންގިލާބީ ބަދަލުތަކެއް އަތުވެއްޖެ ކަމަށާއި ނަމަވެސް ބަދަލުނުވެ އޮތީ ދަމަހައްޓަމުން އަންނަ ދޮށީގެ މަސްވެރިކަން ކަމަށް ރައީސް ވިދާޅުވި އެވެ.
ދިވެހި މަސްވެރިކަމުގެ ފުރާނައަކީ ދޮށީގެ މަސްވެރިކަން ކަމަށާއި ދިވެހި މަސްވެރިކަމުގެ ރޫފަ މިއަދާ ހަމައަށް ރަނގަޅުވެފައި އޮތުމުގެ ސިއްރަކީ ތިމާވެއްޓާ ރަހުމަތްތެރި މަސްވެރިކަން ދެމެހެއްޓުމަށް އިސްކަންދިނުން ކަމަށް ރައީސް ވިދާޅުވި އެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ އެންޒިސް ދިވެހި މަސްވެރިންނަށް ފަހިކޮށްދީފައިވާ ލުއި ފަސޭހަތަކަކީ ރާއްޖޭގެ އިގްތިސާދީ ތަރައްޤީއަށް މުހިންމު ކަމެއްކަން ފާހަގަކުރައްވާ އެންޒިސްގެ މެނޭޖްމަންޓާއި މުވައްޒަފުންނަށް އެކަމަށްޓަކައި ޝުކުރު އަދާ ކުރައްވާފަ އެވެ.
