ރާއްޖޭގެ މަދަނީ ވައިގެ ދަތުރުފަތުރާބެހޭ ޤާނޫނު އަންނަ އަހަރު އިސްލާހު ކުރެވޭނެ: ޓްރާންސްޕޯރޓް މިނިސްޓަރ
ރާއްޖޭގެ އޭވިއޭޝަން ސިނާއަތް ވަނީ ޕްލޭން ކުރެވި ތަރައްޤީ ކުރަންޖެހޭ މަރުޙަލާއަށް ވާސިލުވެފައި
ބައިނަލްއަޤުވާމީ މަދަނީ ވައިގެ ދަތުރުފަތުރުގެ ދުވަސް ފާހަގަ ކުރުމަށް ބޭއްވި ޖަލްސާ މިނިސްޓަރ ނަހުލާ ޝަރަފުވެރި ކޮށްދެއްވަނީ
ސަރުކާރުގެ ސްޓްރެޓްޖިކް އެކްޝަން ޕްލޭން (އެސްއޭޕީ)ގެ ދަށުން އަންނަ އަހަރު ރާއްޖޭގެ މަދަނީ ވައިގެ ދަތުރުފަތުރާބެހޭ ޤާނޫނު އިސްލާޙު ކުރެވޭނެ ކަމަށް ޓްރާންސްޕޯރޓް މިނިސްޓަރ އާއިޝަތު ނަހުލާ ވިދާޅުވެއްޖެއެވެ.
ބައިނަލްއަޤުވާމީ މަދަނީ ވައިގެ ދަތުރުފަތުރުގެ ދުވަސް ފާހަގަ ކުރުމަށް ހޮނިހިރު ދުވަހުގެރޭ ޢިޔާސުއްދީން ސްކޫލުގައި ބޭއްވި ރަސްމިއްޔާތގައި ވާހަކަދައްކަވަމުން މިނިސްޓަރ ވިދާޅުވީ، މަދަނީ ވައިގެ ދަތުރުފަތުރުގެ ދާއިރާއިން ފަންނީ މުވައްޒަފުން ބިނާ ކުރުމަކީ ސިވިލް އޭވިއޭޝަން އޮތޯރިޓީގެ ސިޔާސަތެއް ކަމަށާއި، ރާއްޖޭގެ އޭވިއޭޝަން ސިނާއަތް ޕްލޭން ކުރެވި ތަރައްޤީ ކުރަންޖެހޭ މަރުޙަލާއަށް ވާޞިލުވެފައިވާ ކަމަށެވެ.
އެގޮތުން ސަރުކާރުން އިޢުލާނުކޮށްފައިވާ ދުރު ރާސްތާ ޕްލޭންގެ ދަށުން އަންނަ އަހަރު ކުރެވިގެންދާނެ އެންމެ މުހިއްމު އެއް މަސައްކަތަކީ ރާއްޖޭގެ މަދަނީ ވައިގެ ދަތުރުފަތުރާބެހޭ ޤާނޫނު އިސްލާޙުކުރުން ކަމަށާއި، ޤާނޫނުތައް އިސްލާޙު ކުރެވުމުން ތަރައްޤީވެފައިވާ ޤައުމުތަކުގެ ޤާނޫނުތަކުގައި ހިމެނޭ ސަލާމަތީ މިންގަނޑުތައް ރާއްޖޭގެ ޤާނޫނުގައިވެސް އެކަށައެޅިގެންދާނެކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ، ޤާނޫނު އިސްލާޙު ކުރެވުމުން ވައިގެ ދަތުރުފަތުރުގެ އެކްސިޑެންޓުތައް ތަޙުޤީޤު ކުރުމަށް ދައުލަތުގެ މުސްތަޤިއްލު އިދާރާއެއްވެސް އުފެދިގެންދާނެ ކަމަށެވެ. އެގޮތުން ސަރުކާރުގެ އަމާޒަކީ ރާއްޖޭގެ އެތެރޭގެ އުދުހުންތައް ފެންވަރު ރަނގަޅުކޮށް، ރާއްޖޭގެ މީހުން ދިރިއުޅޭ ކޮންމެ ރަށަކުން 30 މިނެޓުން ސްޕީޑް ބޯޓުގައިދެވޭ ރާސްތާއެއްގެ ވައިގެ ބަނދަރެއް ޤާއިމުކުރުންކަން މިނިސްޓަރ ފާހަގަކުރެއްވިއެވެ.
އޭގެ އިތުރުން، މިނިސްޓަރގެ ވާހަކަފުޅުގައި ވަނީ ފަސިންޖަރުންގެ ހައްޤުތަކާއިބެހޭ ޤާނޫނުވެސް ވީ އެންމެ އަވަސް ފުރުޞަތެއްގައި މަޖިލީހަށް ހުށައަޅުއްވާނެކަން އިޢުލާނު ކުރައްވާފައެވެ.
މި ރަސްމިއްޔާތުގައި "އޭވިއޭޓާރސް ނެކްސްޓް ޖެން" ގެ ނަމުގައި އޭވިއޭޝަން ދާއިރާގެ ސްކޮލަރޝިޕް ސްކީމެއް ތައާރަފު ކޮށްފައިވެއެވެ. އެގޮތުން މި ސްކީމްގެ ދަށުން ފުރަތަމަ ބެޗައް މިނިސްޓަރ ނަހުލާ ވަނީ ސްކޮލަރޝިޕްތައް ޙަވާލުކޮށްދެއްވާފައެވެ.
ކޮންމެ އަހަރެއްގެވެސް ޑިސެމްބަރު މަހުގެ 7 ވަނަ ދުވަސް ފާހަގަކުރަނީ ބައިނަލްއަޤުވާމީ މަދަނީ ވައިގެ ދަތުރުފަތުރުގެ ދުވަހުގެ ގޮތުގައެވެ.
