އައްޑު ޓާޝަރީ ހޮސްޕިޓަލް މި މަހުގެ ތެރޭގައި ހުޅުވަނީ

އައްޑޫ ކޮންވެންޝަން ސެންޓަރުގައި ތަރައްގީކުރަމުން އަންނަ ޓާޝަރީ ހޮސްޕިޓަލް މި މަހުގެ ތެރޭގައި ހުޅުވޭނެކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.

ހިތަދޫ ދެކުނު ދާއިރާއިގެ ކުރީގެ މެންބަރު އަލީ ނިޒާރާއެކު ބޭއްވި ބައްދަލުވުމަކަށްފަހު މި މަހުގެ ތެރޭގައި އެ ހޮސްޕިޓަލުން ހިދުމަތް ދެވެން ފެށޭނެކަމުގެ ޔަގީންކަން މިނިސްޓަރ ދެއްވިކަމަށް ނިޒާރު ވަނީ ވިދާޅުވެފައެވެ.

"ރާއްޖެ އެމްވީ" އަށް މައުލޫމާތު ދެމުން ހެލްތް މިނިސްޓްރީން ބުނީ ހޮސްޕިޓަލް ހުޅުވާ ހިދުމަތް ދޭން ފެށުމަށް ބޭނުންވާ ހުރިހާ ތައްޔާރީތަކެއްވެ ނިމިފައިވާ ކަމަށެވެ.

މީގެ ކުރިން ހެލްތް މިނިސްޓަރ އަބްދުﷲ އަމީން ވިދާޅުވީ އައްޑު ޓާޝަރީ ހޮސްޕިޓަލް ހުޅުވާނީ ބައެއް ބަދަލުތަކާއެކު ކަމަށެވެ. އެގޮތުން ޕްރައިވެޓް ރޫމްތައް އިތުރުކޮށް ބައެއް އިތުރު ބަދަލުތައް ވަނީ ގެނެސްފައެވެ. އައްޑޫގެ އާ ހޮސްޕިޓަލަކީ 100 އެނދުގެ ހޮސްޕިޓަލެކެވެ. އެ ހޮސްޕިޓަލް ހުޅުވުމުން ޓާޝިއަރީ ހޮސްޕިޓަލަކުން ލިބޭ ހުރިހާ ހިދުމަތަކާއެކުއެވެ. ހޮސްޕިޓަލްގެ 99 ޕަސެންޓް މަސައްކަތް މިހާރު ވަނީ ނިންމާފައެވެ.

މިނިސްޓަރ ވިދާޅުވީ އެހޮސްޕިޓަލްގައި މިހާރު ކުރެވެމުންދަނީ ހޮސްޕިޓަލް ހުޅުވުމަށްކުރަންޖެހޭ އެންމެ ފަހުގެ މަސައްކަތްތައް ކަމަށެވެ. އިކުއިޕްމެންޓްސްތައް މިހާރު ބެހެއްޓިފައިވާކަމަށާއި ތަނަށް ބޭނުންވާ މީހުން ނެގުމުގެ ބޮޑު ބައެއްވެސް ނިމިފައިވާކަމަށް މިނިސްޓަރ ވިދާޅުވިއެވެ.

އައްޑޫގައި ހަދާ ޓާޝަރީ ހޮސްޕިޓަލަކީ 100 އެނދުގެ ހޮސްޕިޓަލެކެވެ. މިހޮސްޕިޓަލް އެޅުމަށް އެލިއާ ކޮންސްޓްރަކްޝަންސް އާ ހަވާލުކޮށްފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ވަނަ އަހަރުގެ ނޮވެމްބަރ މަހުގެ 14 ވަނަ ދުވަހު އެވެ. މިއީ މާލެ އާއި ހުޅުމާލެ ފިޔަވައި އަތޮޅު ތެރޭގައި އަޅާ ފުރަތަމަ ޓާޝަރީ ހޮސްޕިޓަލްވެސް މެއެވެ.