ސްކޫލެއް ހިންގާ ގޮތަށް މަޖިލީހެއް ނުހިންގަން: ރައީސް ނަޝީދު
ރައީސް ނަޝީދު ވިދާޅުވީ މަޖިލީހުގެ މެމްބަރުން މަސައްކަތް ކުރައްވާނީ ރައްޔިތުންގެ ވިންދާއި އެއްގޮތަށް ކަމަށް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ސްކޫލެއް ހިންގާ ގޮތަށް ރައްޔިތުންގެ މަޖިލިސް ނުހިންގަވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ރައީސް މުޙައްމަދު ނަޝީދާއި ސުވާލުކުރުމުގެ ފުރުޞަތު ޢާންމު ރައްޔިތުންނަށް ދިނުމަށް ބޭއްވި 'އާސްކް ސްޕީކަރ' ޕްރޮގުރާމުގައި މީހަކު ކުރި ސުވާލަކަށް ޖަވާބު ދެއްވަމުންނެވެ.
ރައްޔިތުންގެ މަޖިލިސް ސްކޫލެއް ގޮތަށް ހިންގުމަށް ޚިޔާރު ކުރެއްވީ ކީއްވެތޯ ކުރި ސުވާލުގެ ޖަވާބުގައި ރައީސް ނަޝީދު ވިދާޅުވީ ރައްޔިތުންގެ މަޖިލީހުގެ ކަންތައްތައް ހިންގާ ގޮތާއި، ސްކޫލެއްގައި ކަންކަން ހިންގާ ގޮތާއި އެއްގޮތް ކަންތައްތަކެއް ހުރެދާނެ ކަމަށެވެ.
އިތުރަށް ރައީސް ނަޝީދު ވިދާޅުވީ ރައްޔިތުންގެ މަޖިލީހުގެ މެންބަރުން މަސައްކަތް ކުރައްވާނީ ރައްޔިތުންގެ ވިންދާއި އިހުސާސާއި އެއްގޮތަށް ކަމަށެވެ. އެހެން ކަމުން ސްކޫލެއް ހިންގާ ގޮތަށް މަޖިލިސް ހިންގިދާނެ ކަމަށް ޤަބޫލުފުޅުނުކުރައްވާކަމަށް ވިދާޅުވިއެވެ.
މިހެން ރައްޔިތުންގެ މަޖިލީހުގެ ރައީސް ނަޝީދު ވިދާޅުވެފައިވާއިރު މަޖިލީހުގެ ޤަވާއިދަށް ޙުރުމަތްތެރިކޮށް ނުހިއްތެވުމުން ބައެއް މެންބަރުންނަށް އަދަބު ދެއްވާފައިވާ ކަން ފާހަގަކޮށްލެވެއެވެ. އެގޮތުން މިދިޔަ ނޮވެންބަރު މަހުގެ ފަސް ވަނަ ދުވަހު ބޭއްވި މަޖިލީހުގެ ޖަލްސާގައި މަހިބަދޫ ދާއިރާގެ މެންބަރު އަޙްމަދު ޠާރިޤު ޖަލްސާގައި އަޑުގަދަ ކުރެއްވުމުން ތަކުރާރުކޮށް ނަޞޭޙަތްތެރިވުމަށްފަހު ޠާރިޤުގެ ނަން އިއްވާ މަޖިލީހުގެ ތަޅުމުން ބޭރަށް ނުކުމެވަޑައިގެން، ފާރަށް ކުރިމަތިލައްވައިގެން ހުންނަވަން ރައީސް ނަޝީދު ވިދާޅުވެފައިވެއެވެ. އަދި ނޮވެންބަރުމަހުގެ ހަތަރުވަނަ ދުވަހު ބޭއްވި ޖަލްސާގައި ތަކުރާރުކޮށް ކަށިގަނޑު ފުމެމުން ގެންދެވުމުން، އަދަބެއްގެ ގޮތުން މަޖިލީހުގެ ތަޅުމުގައި ކަށި ގަނޑު ނުފުމޭނެކަމަށް ސަތޭކަފަހަރު ލިޔުމަށް ޠާރިޤަށް އަންގަވާފައިވެއެވެ.
މަޖިލީހުގެ ރައީސް، ސްކޫލެއް ހިންގަވާގޮތަށް މަޖިލިސް ހިންގަވާކަމަށް ބުނެ އެއް ބަޔަކު ފާޑުކިޔަމުން އަންނައިރު، އެކަމަށް އަނެއް ބަޔަކު ތަޢުރީފު ކޮށް ވާހަކަދައްކައެވެ. މަޖިލީހުގެ ރައީސް މެމްބަރުންނަށް ދެއްވާ އަދަބުތަކުން ސްކޫލް ދައުރު ހަނދާންވާ ކަމަށް ބުނެ ސޯޝަލް މީޑިޔާގައި ބައެއް މީހުން އަންނަނީ ޝުޢޫރު ފާޅުކުރަމުން ނެވެ.
