މާލެ ސިޓީ ކައުންސިލުގައި އަންހެނުންނަށް ޚާއްޞަ 06 ގޮނޑި ހަމަޖައްސައިފި
7 ޑިސެމްބަރު 2019 | ހޮނިހިރު 08:35އައްޑޫގައި 04 ގޮނޑި އަންހެނުންނަށް ޚާއްސަކޮށްފައި
އިލެކްޝަންސް ކޮމިޝަންގެ ރައީސް އަހުމަދު ޝަރީފް
މާލެ ސިޓީ ކައުންސިލުގައި އަންހެނުންނަށް ޚާއްޞަ 06 ގޮނޑި ހަމަޖައްސައިފިއެވެ.
އިލެކްޝަންސް ކޮމިޝަނުގެ ރައީސް އަޙްމަދު ޝަރީފު ކުރެއްވި ޓްވީޓެއްގައި ވިދާޅުވެފައިވަނީ ކައުންސިލުތަކުގެ 33 އިން ސައްތަ އަންހެނުންނަށް ޚާއްޞަކުރުމަށް ޤާނޫނުން ކަނޑައެޅިގެން ދިއުމާއެކު، މާލެ ސިޓީ ކައުންސިލުގައި އަންހެނުންނަށް ޚާއްޞަ 06 ގޮނޑި ހަމަޖައްސައިފައިވާ ކަމަށާއި، އައްޑޫ ސިޓީގައި 04 ގޮނޑި އަންހެނުންނަށް ޚާއްސަކޮށްފައިވާ ކަމަށެވެ. އަދި ފުވައްމުލައް ސިޓީގެ 02 ގޮނޑި އަންހެނުންނަށް ޚާއްޞަ ކޮށްފައިވާ ކަމަށް ޝަރީފު ވިދާޅުވިއެވެ.
ފަސް ކައުންސިލަރުންގެ މައްޗަށް އެކުލެވޭ ކޮންމެ ކައުންސިލެއްގައި އަންހެން 2 ކައުންސިލް މެންބަރުން ހިމެނުމަށާއި، 7 ކައުންސިލް މެންބަރުންގެ މައްޗަށް އެކުލެވޭ ކައުންސިލުތަކުގައި އަންހެން 3 މެންބަރުން ހިމެނުމަށް ލާޒިމުކޮށް އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލު މިމަހުގެ 05 ވީ ބުރާސްފަތި ދުވަހު ރައްޔިތުންގެ މަޖިލީހުން ވަނީ ފާސްކޮށްފައެވެ.
އެކަމާ ގުޅޭގޮތުން ކުރީގެ ރައީސް އަދި ރައްޔިތުން މަޖިލީހުގެ ރައީސް މުޙައްމަދު ނަޝީދު ވިދާޅުވީ، އެ ބިލު ފާސްވުމާއި ގުޅިގެން ބާރުވެރި ކައުންސިލްތަކަކަށް މަގުފަހިވެފައިވާ ކަމަށާއި، އަންހެނުންނަށް ވެސް ތިންބައިކުޅަ އެއްބައި ގޮނޑި ކަށަވަރު ކޮށްދެވިފައިވާ ކަމަށެވެ.
އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލު ހުށައެޅުއްވީ ހުޅުމާލެ ދާއިރާގެ މެންބަރު ޢަލީ ނިޔާޒްއެވެ. އަދި މި ބިލު ފާސްވެގެން ގޮސްފައިވަނީ މަޖީލީހުގެ 76 މެމްބަރުންގެ ވޯޓާއި އެކުއެވެ.
