ހަތަރެއް ގުނަ 100 މީޓަރު ދުވުމުން އަންހެން ރިލޭ ޓީމު ގައުމީ ރެކޯޑް އާކޮށްފި

ނޭޕާލުގައި މިހާރު ކުރިޔަށްދާ 13 ވަނަ ސައުތު އޭޝިއަން ގޭމްސްގައި ހުކުރު ދުވަހު ހެނދުނު، ހަތަރެއް ގުނަ 100 މީޓަރު ދުވުމުން ރާއްޖޭގެ އަންހެން ރިލޭ ޓީމުން ޤައުމީ ރެކޯޑް އާކޮށްފިއެވެ.

ހަ ގައުމަކުން ވާދަކުރި ރިލޭ އިވެންޓުގެ ފުލުގައި ރާއްޖެ ނިންމި ނަމަވެސް ރާއްޖޭގެ އަންހެން ޓީމުން ވަނީ ޤައުމީ ރެކޯޑް އާކޮށްފައެވެ. މި ރެކޯޑް އާކުރީ 50:16 ސިކުންތުން ރޭސް ނިންމައިގެންނެވެ. މި އިވެންޓުން ރަން މެޑަލް ހޯދި ސްރީލަންކާގެ ޓީމުން ރޭސް ނިންމީ 44:86 ސިކުންތުން ރޭސް ނިންމައިގެންނެވެ.

އެންމެ ފަހުން ހަތަރެއް ގުނަ 100 މީޓަރު ދުވުމުން ޤައުމީ ރެކޯޑު އާކުރީ 2016 އިންޑިއާގެ ގުވަހާޓީގައި ބޭއްވި ސައުތު އޭޝިއަން ގޭމްސްގައެވެ. އެ ފަހަރު ރެކޯޑު އާކުރީ 51:32 ސިކުންތުން ރޭސް ނިންމައިގެންނެވެ. އެޓީމުގައި ހިމެނޭ ކުޅުންތެރިންނަކީ އަފާ އިސްމާއިލް، އައިމިނަތު ނަޒްރާ، ސަމްހާ އަހުމަދު އަދި މިރުފަތު އަހުމަދެވެ.

ހަތަރެއް ގުނަ 100 މީޓަރު ދުވުން ރާއްޖޭގެ ފިރިހެން ޓީމު ނިންމީ ފަސްވަނައިގައެވެ. މި ޓީމުގައި ހިމެނެނީ ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު، އިބާދުﷲ އާދަމް، ނުޖޫމް ހަސަން އަދި މުހައްމަދު ޖަލާއިލް ފަޔާޒް އެވެ. މި ޓީމު ރޭސް ނިންމީ 42:34 ސިކުންތުންނެވެ. ފިރިހެން ރިލޭގަ ވެސް އެއްވަނަ އަށް ދިޔައީ ސްރީލަންކާއެވެ. ސްރީލަންކާގެ ޓީމުން ރޭސް ނިންމީ 39:14 ސިކުންތުން ރޭސް ނިންމައިގެންނެވެ.

މި ފަހަރުގެ ގޭމްސްގައި އެންމެ ކާމިޔާބު ކުޅިވަރެއް ގޮތުގައި ވެގެން ގޮސްފައިވަނީ އެތްލެޓިކްސްއެވެ. އެގޮތުން ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ވަނީ 100 މީޓަރު ދުވުމުން ރަން މެޑަލް އަދި 200 މީޓަރު ދުވުމުން ލޯ މެޑަލް ހޯދައިދީފައެވެ.