ބޮޑު ޗުއްޓީގައި ނައިޓްމާކެޓް ހިންގަން ބޭނުންވާ ފަރާތްތަކަށް އަލުން ފުރުސަތު ހުޅުވާލައިފި

ސުކޫލު ބަންދު (ބޮޑު ޗުއްޓީ) އާއި ދިމާކޮށް ނައިޓްމާރކެޓް ހިންގުމަށް ޝައުޤުވެރިވާ ފަރާތްތަކުން ޕްރޮޕޯސަލް ހުށައެޅުމުގެ ފުރުސަތު މާލޭ ސިޓީ ކައުންސިލުން އަލުން ހުޅުވާލައިފިއެވެ.

ބުރާސްފަތި ދުވަހު މާލޭ ސިޓީ ކައުންސިލުން ކުރި އިއުލާނެއްގައި ބުނީ، ސްކޫލުތަކުގެ ބޮޑުޗުއްޓީ ތެރޭގައި މާލެ ސިޓީގައި ނައިޓްމާކެޓް ބޭއްވުމަށް ބޭނުންވާ ފަރާތްތަކަށް އެ ފުރުސަތު ދިނުމަށް ނޮވެމްބަރު މަހު ކުރި އިއުލާނާއި ގުޅިގެން ޕްރޮޕޯސަލް ހުށަހެޅުމަށް ހާޒިރުވެފައި ވަނީ ދެފަރާތަކުން ކަމަށެވެ.

އެގޮތުން ނައިޓްމާކެޓް ހިންގުމަށް ޕްރޮޕޯސަލް ހުށައެޅުމުގެ ފުރުސަތު އަލުން ހުޅުވާލާފައިވާއިރު، މާލޭ ސިޓީ ކައުންސިލުން ބުނީ، ޕްރޮޕޯސަލް ހުށައެޅުން އޮންނާނީ މިހިނގާ ޑިސެމްބަރު މަހުގެ 12 ވަނަ ދުވަހު 13:00 ގައި މާލޭ ސިޓީ ކައުންސިލް އިދާރާގައި ކަމަށެވެ.

ނައިޓްމާކެޓް ހިންގުމަށް މާލޭސިޓީ ކައުންސިލުން ފުރުސަތު ހުޅުވާލާފައިވާއިރު، މާކެޓް ހިންގުމަށް ހުށައަޅާ ފަރާތަކީ 100 އިންސައްތަ ދިވެހި ވިޔަފާރިއަކަށް ވާންޖެހެއެވެ. އަދި އެ ވިޔަފާރިއަކީ މިނިސްޓްރީ އޮފް އިކޮނޮމިކް ޑިވޮލޮޕްމަންޓުގައި ރަޖިސްޓްރީ ކުރި ފަހުން 2 އަހަރުވެފައިވާ ވިޔަފާރިއަކަށްވުން ވެސް ލާޒިމު ކޮށްފައިވެއެވެ.