ބަޖެޓް ފާސްކުރަން ނުފެންނަ ކަމަށް ވޯޓު ދެއްވީ ޖާބިރު
ބަޖެޓްގެ ކޮމިޓީ ރިޕޯޓަށް ބަހުސް ކުރައްވަމުންވެސް ޖާބިރު ވަނީ ބަޖެޓަށް ވޯޓު ނުދެއްވާނެ ކަމަށް ވިދާޅުވެފައި
ކާށިދޫ ދާއިރާގެ މެމްބަރ އަބްދުﷲ ޖާބިރު
އަންނަ އަހަރަށް ލަފާކުރާ ދައުލަތުގެ ބަޖެޓް ފާސްކުރަން ނުފެންނަ ކަމަށް ކާށިދޫ ދާއިރާގެ މެމްބަރ އަބްދުﷲ ޖާބިރު ވޯޓު ދެއްވައިފި އެވެ.
37.8 ބިލިއަން ރުފިޔާގެ ރެކޯޑް ބަޖެޓް ފާސްކުރަން ފެންނަކަމަށް 77 މެމްބަރުން ވަނީ ވޯޓުދެއްވާފަ އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ދިރާސާކުރި ބަޖެޓް ކޮމިޓީގެ ރިޕޯޓަށް ބަހުސް ކުރައްވަމުންވެސް ޖާބިރު ވަނީ ބަޖެޓަށް ވޯޓު ނުދެއްވާނެ ކަމަށް ވިދާޅުވެފަ އެވެ. ޖާބިރު ވިދާޅުވީ ބަޖެޓްގައި ކާށިދޫ ދާއިރާއަށް ޖާބިރު ބޭނުންވެ ވަޑައިގަންނަވާ ކަންކަން ހިމަނާފައި ނުވާކަމަށެވެ. އެގޮތުން އެއަރޕޯޓެއް ހިމަނާފައިނުވާކަމަށް ޖާބިރު ވިދާޅުވި އެވެ.
މިރާއްޖޭގެ ކުންފުނިތަކުގެ ތެރެއިން އެންމެ ބޮޑު ގެއްލުމެއްވެފައިވަނީ އެމެމްބަރުގެ ކުންފުންޏަށް ކަމަށް ވިދާޅުވެ ޖާބިރު ވިދާޅުވީ ބަދަލުގެ ގޮތުގެ އެއްވެސް ލާރި އެއް އެމަނިކުފާނަށް ސަރުކާރުން ދީފައިނުވާ ކަމަށެވެ. ޖާބިރު ވިދާޅުވީ ބޮޑެތި އާބާދީތަކަށް މީހުން ބަދަލުކުރަންޖެހޭ ކަމަށާއި މިގޮތަށް ކަންތައް ދާނަމަ ރާއްޖެ ބޭންކްރަޕްޓް ވާނެ ކަމަށެވެ. ޖާބިރު ވިދާޅުވީ މަބަޖެޓްގައި އޮޕަރޭޓިންގ ކޮސްޓް މާބޮޑުކަމަށެވެ.
ޖާބިރުވަނީ މިބަޖެޓް ފާސްކޮށްގެން ބަޖެޓް ތަންފީޒު ކުރަން ދަންނަވަރުގެ އިކޮނޮމިސްޓެއް ސަރުކާރު ތެރޭގައި އެބަހުރިތޯ ސުވާލުކުރައްވާފަ އެވެ.
