ސައުތް އޭޝިއަން ގޭމްސް: ތަފާތު ބޮޑު ނަތީޖާއަކުން އިންޑިއާ އަތުން ރާއްޖޭގެ އަންހެން ހޭންޑް ބޯޅަ ޓީމު ބަލިވެއްޖެ

ނޭޕާލުގައި މިހާރު ކުރިޔަށްދާ 13 ވަނަ ސައުތް އޭޝިއަން ގޭމްސްގައި ވަރުގަދަ އިންޑިއާގެ އަތުން ތަފާތު ބޮޑު ނަތީޖާ އަކުން ރާއްޖޭގެ އަންހެން ހޭންޑް ބޯޅަ ޓީމު ބަލިވެއްޖެއެވެ.

ނޭޕާލުގެ ޕޮކަހަރާގެ މަލްޓި ޕާޕޯސް ހޯލުގައި ކުޅުނު މި މެޗުން ރާއްޖެ ބަލިވީ 49-9 ލަނޑުގެ ތަފާތު ބޮޑު ނަތީޖާ އަކުންނެވެ.

މެޗު ފެށިގެން އިންޑިއާއިން އަވަސް ކުޅުމެއް ކުޅުނުއިރު، ރާއްޖޭގެ ކުޅުންތެރިންގެ ފަރާތުން ފެނިގެންދިޔައީ އެޓޭކިންގ ގޭމެކެވެ. ރާއްޖެއިން ކުޅެމުންދިޔަ އެޓޭކިންގ ގޭމްގެ ފައިދާ ހިފާ އިންޑިއާގެ ހަލުވި ކުޅުންތެރިން ކައުންޓަރ އެޓޭކް ތަކުގައި ލަނޑު ޖަހައިފައިވެއެވެ.

މި މެޗުގެ ފުރަތަމަ ހާފުގައި އިންޑިއާއިން ވަނީ 22 ލަނޑު ރާއްޖެ ކޮޅަށް ޖަހައިފައެވެ. މި ހާފުގައި ލަނޑެއް ރާއްޖެ އަށް ޖެހިފައި ނުވާއިރު ރާއްޖެ ކުޅުންތެރިން ކުރަމުންދިޔަ އެޓޭކްތައް އިންޑިއާގެ ޑިފެންޑަރުން އަދި ކީޕަރު ވަނީ ހުއްޓުވައިފައެވެ.

މެޗުގެ ދެވަނަ ހާފު ފެށިގެން ރާއްޖެ ޓީމުން ކުޅުން ރަނގަޅުކުރި އިރު މި ހާފުގައި ރާއްޖެއިން ކުޅުނީ ޑިފެންސްއަށް ވިސްނައިގެންނެވެ. ނަމަވެސް އިންޑިއާއިން ވަނީ މި ހާފުގައި ވެސް ރާއްޖެ ކޮޅަށް 19 ލަނޑު ޖަހައިފައެވެ. ނަމަވެސް މި ހާފުގައި ރާއްޖެއިން ވަނީ ނުވަ ލަނޑު އިންޑިއާ ކޮޅަށް ޖަހައިފައެވެ.

މި މެޗުގައި ރާއްޖެއިން އެންމެ ރަނގަޅު ކުޅުމެއް ދެއްކި އައިޝަތު ރީމާ ވަނީ ހަތަރު ލަނޑު ޖަހައިފަ އެވެ. އޭގެ ތެރެއިން ތިން ލަނޑަކީ ލިބުނު ޕެނަލްޓީތަކުން އޭނާ ޖެހި ތިން ލަނޑެވެ. ނަމަވެސް މި މެޗުގައި ރާއްޖެއަށް ލިބުނު އިތުރު ދެ ޕެނަލްޓީ އިންޑިއާގެ ކީޕަރު ނީނާ ޝިލް ވަނީ މަތަކޮށްފަ އެވެ. މެޗުގައި ރާއްޖެއިން އިތުރަށް ޖެހި ލަނޑުތައް ކާމިޔާބު ކޮށްދިނީ ދީމާ މުހައްމަދާއި އައިޝަތް ލީން އަދި ނުހާ އަހްމަދުގެ އިތުރުން ހަލީމަތު ހަސްނާ އެވެ. ހަސްނާ ވަނީ މި މެޗުގައި ދެ ލަނޑު ކާމިޔާބު ކޮށްދީފައެވެ.

މެޗަށް ފަހު ވާހަކަ ދައްކަމުން ޓީމުގެ އެސިސްޓެންޓް ކޯޗު ހަސަން ފަހީމް ބުނީ މިއީ އުންމީދު ކުރި ނަތީޖާ ނޫން ކަމަށާއި، ފުރަތަމަ މެޗުގައި ސަރަހައްދުގެ އެންމެ ވަރުގަދަ ޓީމާ ދެކޮޅަށް ކުޅެން ޖެހުމަކީ ވެސް އުނދަގޫވި ކަމެއް ކަމަށާއި މި މެޗުގެ ތަޖުރިބާގެ އަލީގައި އަންނަ މެޗުގައި ރަނގަޅު ބަދަލުތަކެއް ފެންނާނެ ކަމުގެ އުންމީދު ބޮޑު ކަމަށެވެ.

ރާއްޖޭގެ ދެވަނަ މެޗުގައި ބުރާސްފަތި ދުވަހު ނިކުންނާނީ ޕާކިސްތާނާއި ދެކޮޅަށެވެ. މި މެޗު ކުޅޭނީ ބުރާސްފަތި ދުވަހު ހެނދުނު 11:00 ގައެވެ.