1:30 ގައި ވޯޓަށް އެހުމަށް ޖަލްސާ މެދުކަނޑާލައިފި
ޖަލްސާ މެދުކަނޑާލިއިރު ބަހުސް ކުރުމަށް ހުޅުވާލާފައިވަނީ އަންނަ އަހަރަށް ލަފާކުރާ ދައުލަތުގެ ބަޖެޓްގެ ކޮމިޓީ ރިޕޯޓަށް
ރައްޔިތުންގެ މަޖިލިސް
ބުދަ ދުވަހުގެ ޖަލްސާއަށް އެޖެންޑާ ކޮށްފައިވާ މަސައްކަތްތައް ނިމުމާއެކު 1:30 ގައި ވޯޓަށް އެހުމަށް ޖަލްސާ މެދުކަނޑާލާއިފި އެވެ.
ޖަލްސާ މެދުކަނޑާލިއިރު ބަހުސް ކުރުމަށް ހުޅުވާލާފައިވަނީ އަންނަ އަހަރަށް ލަފާކުރާ ދައުލަތުގެ ބަޖެޓްގެ ކޮމިޓީ ރިޕޯޓަށެވެ. އެރިޕޯޓަށް ބަހުސްކުރުމަށް އެވަގުތު ތަޅުމުގައި ތިއްބެވި އެއްވެސް މެމްބަރަކު އެދިވަޑައިނުގަތުމުން ރިޔާސަތުގައި އިންނެވި ވިލުފުށި ދާއިރާގެ މެމްބަރ ހަސަން އަފީފު ވިދާޅުވީ ބަޖެޓްގެ ކޮމިޓީ ރިޕޯޓަށް ބަހުސްކުރުން އަދިނުނިމޭ ކަމަށާއި ނަމަވެސް އެއްވެސް މެމްބަރަކު ބަހުސްކުރުމަށް އެދިވަޑައިގަންފައިނުވާތީ ޖަލްސާ މެދުކަނޑާ ލައްވާ ކަމަށެވެ.
ބުދަ ދުވަހުގެ ޖަލްސާއަށް ވަނީ ހިންނަވަރު ދާއިރާގެ މެމްބަރ ޖީހާން މަހުމޫދު ހުށަހަޅުއްވާ މީހުން ޓްރެފިކް ކުރުން ހުއްޓުވުމުގެ ޤާނޫނަށް އިސްލާހު ގެނައުމުގެ ބިލް ހުށަހަޅުއްވާ އެބިލަށް ބަހުސްކުރައްވާފަ އެވެ. އަދި ވޯޓަށް އަހާއިރު އެބިލް ބަލައިގަންނަން ފެނޭތޯ ވޯޓަށް އަހާނެއެވެ. ދެން ޖަލްސާގައި ކުރިޔަށް ގެންދަވާފައިވަނީ އާމްދަނީން ޓެކްސް ނެގުމުގެ ބިލް މުޅި މަޖިލީހުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓް ހުށަހަޅާ އެރިޕޯޓަށް ބަހުސްކުރުމެވެ. މިބިލްވެސް މިޖަލްސާގައި ފާސްކުރުމަށް ވޯޓަށް އަހާނެއެވެ. މިބިލަށް 26 އިސްލާހެއް ހުށަހަޅާފައިވާއިރު އެއިސްލާހުތަކަށްވެސް ވޯޓަށް އަހާނެއެވެ.
ދެން ބުދަ ދުވަހުގެ ޖަލްސާގައި ކުރިޔަށް ގެންދަވާފައިވަނީ ސުޕްރީމް ކޯޓުގެ ފަނޑިޔާރު އަލްއުސްތާޒު އަބްދުލްޣަނީ ވަކިކުރުމުގެ މައްސަލަ މަޖިލީހުގެ ޖުޑީޝަރީ ކޮމިޓީން ދިރާސާކޮށް ނިންމި ގޮތުގެ ރިޕޯޓް ހުށަހަޅުއްވާ އެރިޕޯޓަށް ބަހުސްކުރުމެވެ. އެރިޕޯޓަށްވެސް މިޖަލްސާގައި ވޯޓަށް އަހާނެއެެވެ.
ރައްޔިތުންގެ މަޖިލީހުގެ ޖަލްސާއެއް ބުރާސްފަތި ދުވަހާއި ހޮނިހިރު ދުވަހުވެސް ބޭއްވުމަށް ވަނީ ހަމަޖެހިފައެވެ. އެއަށްފަހު މެމްބަރުން ދެން ވަޑައިގަންނަވާނީ ޗުއްޓީއަށެވެ.
