ފެނަކައިން ކުރިއަށް ގެންދިޔަ އިންޖިނިޔަރުންގެ މަހާސިންތާ ކާމިޔާބުކަމާއެކު ނިންމާލައިފި

ފެނަކަ ކޯޕަރޭޝަން އިން ކުރިއަށް ގެންދިޔަ އިންޖިނިއަރުންގެ މަހާސިންތާ 2019 ކާމިޔާބުކަމާއެކު ނިންމާލައިފިއެވެ.

ފެނަކަ ކޯޕަރޭޝަނުން ކުރިއަށްގެންދިޔަ އިންޖިނިއަރުންގެ މަހާސިންތާ 2019 ނިންމުމުގެ ރަސްމިއްޔާތު އާދިއްތަ ދުވަހުގެރޭ ދަރުބާރުގޭގައި ބާއްވާފައިވާއިރު، މި ރަސްމިއްޔާތު ޝަރަފުވެރި ކޮށްދެއްވީ ރައީސުލްޖުމްހޫރިއްޔާގެ އޮފީހުގެ މިނިސްޓަރ އަޙްމަދު ނަސީމް (ކެރަފާ ނަސީމް) އެވެ.

މި ރަސްމިއްޔާތުގައި ވާހަކަދައްކަވަމުން ނަސީމް ވިދާޅުވީ، ސަރުކާރުން ކުރާ މަސައްކަތްތަކުގެ ތެރެއިން އެންމެ އަހަންމިއްޔަތުކަންދޭ ކަމަކީ ޢާންމު ރައްޔިތުންނަށް ދޭ ޚިދުމަތްތައް ކަމަށާއި، ޢާންމު ރައްޔިތުންނަށް ޚިދުމަތް ދިނުމުގައި ފެނަކައިގެ ޚިދުމަތްތައް ފާހަގަކޮށްލެވޭ ކަމަށެވެ. އަދި މިފަދަ މަހާސިންތާތައް ބާއްވައިގެން ރައްޔިތުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅު ކުރުމަށް މިނިސްޓަރ ވަނީ ގޮވާލައްވާފައެވެ.

އޭގެ އިތުރުން، ރައްޔިތުންނަށް ޚިދުމަތްތައް ފޯރުކޮށްދިނުމުގައި ފެނަކައިން ކުރާ މަސައްކަތްތަކަށް މަރުޙަބާ ވިދާޅުވެ ނަސީމް ވިދާޅުވީ، ފާއިތުވި 11 މަސް ދުވަހުގެ ތެރޭގައި ފެނަކައިން މުހިއްމު މަސައްކަތްތަކެއް ކޮށްފައިވާ ކަމަށެވެ. އަދި އެ މަސައްކަތްތަކުން ދައްކުވައިދެނީ ފެނަކައިގެ މުވައްޒަފުންގެ ހީވާގިކަން ކަމަށެވެ.

ނަސީމް އިތުރަށް ވިދާޅުވީ، އިޔާދަކުރަނިވި ހަކަތަ ބޭނުންކުރުމާއި ބެހޭ ޤާނޫނެއް ވަރަށް އަވަހަށް ތައްޔާރުވާނެ ކަމަށް އުއްމީދު ކުރައްވާ ކަމަށާއި، ޤާނޫނީ ގޮތުން އެކަން ވަކި އުޞޫލެއްގެ ތެރޭގައި ހަމަޖެހިގެން ދިއުމަކީ މުހިއްމު ކަމެއް ކަމަށެވެ. އެގޮތުން ވަކި އުޞޫލުތަކާއި ހަމަތަކެއްގެ ދަށުން އެކަން ހަމަޖެހިއްޖެނަމަ އިޔާދަކުރަނިވި ހަކަތައަށް އިންވެސްޓް ކުރުމަށްވެސް މީހުންނަށް އިތުރު ހިތްވަރެއް ލިބިގެންދާނެ ކަމަށް އޭނާ ވިދާޅުވިއެވެ.

ފެނަކައިން ކުރިއަށްގެންދިޔަ އިންޖިނިއަރިންގ މަހާސިންތާގައި އެ ކުންފުނީގެ އެކި ގޮފިތަކުގައި މަސައްކަތް ކުރައްވާ ފަރާތްތަކުން ބައިވެރިވެފައިވެއެވެ. އަދި މި މަހާސިންތާގައި ފެނަކަ ކުންފުނީގެ މަސައްކަތްތައް އިތުރަށް ފުޅާކޮށް، ޚިދުމަތްތައް ރަނގަޅު ކުރެވޭނެ ގޮތްތަކާމެދު ވަނީ މަޝްވަރާ ކުރައްވާފައެވެ.