ދީނީ ގޮތުން ހައްދުފަހަނައަޅައި ދިއުމަކީ ވަރަށް ނުރައްކާތެރި ފިކުރެއް: ޑރ އިބްރާހިމް ޒަކަރިއްޔާ މޫސާ
1 ޑިސެމްބަރު 2019 | އާދީއްތަ 12:42މިނިވަން ވިސްނުމުގެ ނަމުގައި ރާއްޖެއިން މި ފެނިގެން ދަނީ ލިބަރަލިޒަމެއް ނޫން
ޑރ އިބްރާހިމް ޒަކަރިއްޔާ މޫސާ
ދީނީގޮތުން ހައްދުފަހަނައަޅައި ދިއުމަކީ ވަރަށް ނުރައްކާތެރި ފިކުރެއް ކަމަށް ދީނީ ޢިލްމުވެރިޔާ، ޑރ އިބްރާހިމް ޒަކަރިއްޔާ މޫސާ ވިދާޅުވެއްޖެއެވެ.
ރާއްޖެ އިސްލާމްވި ދުވަހާއި ގުޅިގެން ހޮނިހިރު ދުވަހުގެރޭ އިސްލާމީ މަރުކަޒުގައި ބޭއްވި ޕެނަލް ޑިސްކަޝަންގައި ވާހަކަދައްކަވަމުން ޑރ ޒަކަރިއްޔާ ވިދާޅުވީ، ދީނީ ގޮތުން މިނިވަން ވިސްނުމުގެ ނަމުގައި ރާއްޖެއިން މި ފެނިގެން ދަނީ މިނިވަން ވިސްނުން ނުވަތަ "ލިބަރަލިޒަމް" ގެ ފަލްސަފާއާއިވެސް މުޅިން ޚިލާފު ކަމެއް ކަމަށެވެ.
އެގޮތުން ލިބަރަލިޒަމްގެ އަސާސްގައިވެސް ދުނިޔޭގެ ގިނަ ޤައުމުތަކުން ޤަބޫލުކޮށް އިހުތިރާމްކުރާ ކަންކަމަށް ކަމޭހިތާ ކަމަށާއި، އިސްލާމް ދީނަށް މަލާމާތް ރައްދުވާނެފަދަ ބަހެއް ނުބުނާނެ ކަަމަށް ޑރ ޒަކަރިއްޔާ ވިދާޅުވިއެވެ.
ޑރ ޒަކަރިއްޔާ އިތުރަށް ވިދާޅުވީ، މިނިވަން ހިޔާލުވެސް ހައްދުފަހަނައަޅައިގެން ދާނަމަ އެއީ މައްސަލައެއް ކަމަށާއި، ދީނުގެ ނަމުގައި ހައްދުފަހަނައަޅައިގެން ދިއުމަކީވެސް ނުރައްކާތެރި ފިކުރެއް ކަމަށެވެ. އަދި އޭގެ ސަބަބުން ދީނުގެ ޞައްޙަ ޢަޤީދާއާއި މަޢުލޫމާތު އަދި ސުންނަތާއި ޤުރުއާނުގެ މަފްހޫމު އޮޅިގެންދާކަމަށްވެސް ޑރ ވިދާޅުވިއެވެ.
އޭގެ އިތުރުން، މި ދެ ފިކުރާމެދު ފުންކޮށް ވިސްނައި، އަޤީދާ ސާބިތުކުރަން މިއަދު ޖެހިފައިވާ ކަމަށާއި، އިސްލާމް ދީނުގައި އަންގަވާފައިވާ ގޮތަށް މެދުމިނުގެ ޢަސާސެއްގެ މަތީގައި އަޤީދާ ބިނާ ކުރުމަށްވެސް ޑރ ޒަކަރިއްޔާ ވަނީ ގޮވާލާފައެވެ.
