އިސްލާމީ މުޖުތަމަޢަށް ޑިމޮކްރަސީ ބޭނުންކުރެވޭނީ "އިސްލަމައިޒް" ކޮށްގެން: އިސްލާމިކް މިނިސްޓަރ
30 ނޮވެމްބަރު 2019 | ހޮނިހިރު 18:24ފިކުރީ މައްސަލަތަކުގެ ތެރެއިން އަންނަ އެއް ވިސްނުމަކީ ޑިމޮކްރަސީގެ ނަމުގައި އަންނަ ވިސްނުންކަމަށް މިނިސްޓަރ ވިދާޅުވި
އިސްލާމިކް މިނިސްޓަރ ޑރ އަހުމަދު ޒާހިރު އަލީ
އިސްލާމީ މުޖުތަމަޢަށް ޑިމޮކްރަސީ ގެންނަކަމަށް ވަނީނަމަ ޖެހޭނީ އިސްލަމައިޒް (އިސްލާމީ އުސޫލުތަކާއި އެއްގޮތަށް) ކުރަންކަމަށާއި އެނޫންގޮތަކަށް އިސްލާމީ މުޖުތަމަޢެއްގައި ޑިމޮކްރަސީ ބޭނުން ނުކުރެވޭނެކަމަށް އިސްލާމިކް މިނިސްޓަރ ޑރ އަހުމަދު ޒާހިރު އަލީ ވިދާޅުވެއްޖެ އެވެ.
ރާއްޖެ އިސްލާމްވި ދުވަހާއި ގުޅުވައިގެން ކުރިޔަށްގެންދިޔަ ޚާއްސަ ޕެނަލް ޑިސްކަޝަންގައި ވާހަކަދައްކަވަމުން އިސްލާމިކް މިނިސްޓަރ ވިދާޅުވީ މިއަދުގެ ދިވެހި އިސްލާމީ މުޖުތަމަޢަށް ދިމާވާ ފިކުރީ މައްސަލަތައް ގިނަކަމަށެވެ. އޭގެތެރެއިން އަންނަ އެއް ވިސްނުމަކީ ޑިމޮކްރަސީގެ ނަމުގައި އަންނަ ވިސްނުންކަމަށް މިނިސްޓަރ ވިދާޅުވި އެވެ. މިނިސްޓަރ ވިދާޅުވީ ޑިމޮކްރަސީ އެންމެ ފަސޭހައިން މީހަކަށް ވިސްނައިދެވޭނެ ގޮތަކީ އެއީ ވަކި މީހެއްގެ ގޮތަށް ނުބަލާ މުޖުތަމަޢުގެ އެކިކަންކަމަށް ހެޔޮވަރުކުރާ ކޯޓެއްގެ ގޮތަށް ވިސްނައިދީގެން ކަމަށެވެ. ކޯޓަކީވެސް އެކި ސައިޒްތަކަށް ހުންނަ އެއްޗެއްކަމަށާއި އެއީވެސް ބަދަލުތައް ގެނެސް މީހާއަށް ހެޔޮވަރު ކުރެވޭގޮތަށް ހުންނަ އެއްޗެއްކަމަށް މިނިސްޓަރ ވިދާޅުވި އެވެ.
އެގޮތުގެމަތިން އިސްލާމީ މުޖުތަމަޢުއަށް ޑިމޮކްރަސީ ބޭނުންކުރެވޭނީ އެއޮންނަ އުސޫލުތަކާއި އެތަނެއްގައި އޮންނަ އާދަކާދަ އާއި ސަގާފަތަކާ އެއްގޮތަށް ކަމަށް މިނިސްޓަރ ވިދާޅުވި އެވެ. މީގެއިތުރުން މިނިސްޓަރ ވިދާޅުވީ ލިބިފައި އޮންނަ މިނިވަންކަމަކީވެސް ވަކި އިމެއްގެ ތެރޭގައި އޮންނަ އެއްޗެއްކަމަށާއި އެގޮތުން ވާހަކަދައްކާއިރުވެސް އެ ހައްގުގެ ބޭނުންކުރެވޭނީ އެއޮންނަ އިމުގެ ތެރެއިންކަަމަށެވެ.
މީގެއިތުރުން ޤާނޫނު އަސާސީން ދިވެހިރާއްޖޭގައި އިސްލާމްދީން ނޫން އެހެން ދީނަކަށް ޖާގަ ނުދޭއިރު އެކަން ދަމަހައްޓާ މުޖުތަމަޢުގައި އުޅޭ ހުރިހާ އެންމެންނަކީވެސް އިސްލާމްދީނާ އެއްގޮތަށް އުޅޭ ބަޔެއްކަމަށް ހެދުމަށް އިސްލާމިކް މިނިސްޓްރީން ގިނަ މަސައްކަތްތަކެއް ކުރައްވަމުން ގެންދަވާކަމަށް މިނިސްޓަރ ވިދާޅުވި އެވެ. އެގޮތުން މިނިސްޓްރީން މަސައްކަތް ކުރަމުންދަނީ އިސްލާމީ ޞައްހަ އަޤީދާ ރައްޔިތުންނަށް ފޯރުކޮށްދޭންކަަމަށް މިނިސްޓަރ ވިދާޅުވި އެވެ.
މީގެއިތުރުން ތަފާތު ޓީވީ އަދި ރޭޑިއޯ ޕްރޮގްރާމްތައް ހިންގަމުންދާކަމަށާއި މިސްކިތްތަކުގައިވެސް ދަރުސްތައް އިންތިޒާމުކޮށްގެން ކުރިޔަށް ގެންދާކަމަށް މިނިސްޓަރ ވިދާޅުވި އެވެ. އެގޮތުން ހަދީޘް ދަރުސްތަކާއި ތަފްސީރު ދަރުސްތަކާއި އެކި ނަންނަމުގައި އެކި ކަންކަމަށް އަމާޒުކޮށްގެން ދަރުސްތައް ބާއްވަމުން ގެންދަވާކަމަށް މިނިސްޓަރ ވިދާޅުވި އެވެ. އެގޮތުގެ މަތިން އިސްލާމްދީނަށް ގެއްލުންލިބޭ ފަދަ ހުރިހާ ކަމަކުން މުޖުތަމަޢު ސަލާމަތްކުރުމަށް މިނިސްޓްރީން މަސައްކަތް ކުރައްވާކަމަށް މިނިސްޓަރ ވިދާޅުވި އެވެ. އެގޮތުން މިހާރު ފެންނަމުންދާ ހަރުކަށި ފިކުރުތަކަށް އިޝާރާތް ކުރައްވާ މިނިސްޓަރ ވިދާޅުވީ ހައްދުފަހަނައެޅުން ދެކޮޅަށްވެސް ފެންނަމުންދާކަމަށެވެ.
މިނިސްޓަރ ވިދާޅުވީ އިސްލާމް ދީނުން އިންސާނުން އުޅެންވީ އެންމެ ރަނގަޅު ގޮތް އުނގަންނައިދޭ ކަމަށާއި ރަނގަޅު މުޖުތަމަޢެއް ބިނާކުރުމަށް އެގޮތްތަކުގައި ހިފަންޖެހޭ ކަމަށެވެ. އަދި އިސްލާމްދީނާ ބެހޭ ގޮތުން ރައްޔިތުންނަށް މައުލޫމާތު ދިނުމަށް ކުރިއަށްވެސް ގިނަ ޕްރޮގްރާމްތަކެއް ރޭވިފައި ހުރިކަމަށް މިނިސްޓަރ ވިދާޅުވިއެވެ. އެގޮތުން ސްކޫލްތަކާއި ، އޮފީސްތަކާއި އެކި ދާއިރާތަކުގެ އިސްވެރިންނަށް އަމާޒުކޮށްގެން ދީނީ ޕްރޮގްރާމްތައް ކުރިޔަށް އޮތްތާންގައި ހިންގަމުން ގެންދާނެކަމަށް އިސްލާމިކް މިނިސްޓަރ ވިދާޅުވި އެވެ.
