ރަނގަޅު އަގީދާއެއްގެ މަތީގައި ދެމިތިބުމަށް މަސައްކަތް ކުރަންޖެހޭ:ޑރ.ޖަމީލް
އެންމެ މާތް ނިއުމަތަކީ އީމާންކަން
ގައުމީ ޔުނިވާސިޓީގެ ސީނިއަރ ލެކްޗަރާ ޑރ.އަބްދުﷲ ޖަމީލް
އިންސާނާއަށް ދެއްވާފައިވާ އެންމެ މާތް ނިއުމަތަކީ އީމާންކަން ކަމަށާއި، އިމާންކަން ވަރުގަދަކޮށް ރަނގަޅު އަގީދާއެއްގެ މަތީގައި ދެމިތިބުމަށް މަސައްކަތް ކުރަން ޖެހޭ ކަމަށް ދިވެހިރާއްޖޭގެ ގައުމީ ޔުނިވާސިޓީގެ ސީނިއަރ ލެކްޗަރާ ޑރ.އަބްދުﷲ ޖަމީލް ވިދާޅުވެއްޖެއެވެ.
ރާއްޖެ އިސްލާމްވި ދުވަހުގެ ޕެނަލް ޑިސްކަޝަންގައި ޑރ. ޖަމީލު ވިދާޅުވީ އިންސާނުންނަށް މާތްﷲ ވަރަށް ގިނަ ނިއުމަތްތައް ދެއްވާފައިވާ ކަމަށާއި، އެންމެ މުހިންމު, އެންމެ މާތް ނިއުމަތަކީ އިމާންކަން ކަމަށެވެ.
އެއީ ނަރަކައިގެ ވަޅުގަނޑުގެ ތުންފަތްމަތިން އިންސާނާ ސަލާމަތްވަނީ އިމާންކަމުގެ ސަބަބުން ކަމަށް ޑރ. ޖަމީލް ވިދާޅުވިއެވެ. އަދި ވިދާޅުވީ އެނިއުމަތަށް ޝުކުރުވެރިވެ، ރަނގަޅު އަގީދާއެއްގެ މަތީގައި ދެމިތިބުމަށް އެންމެން މަސައްކަތް ކުރަންޖެހޭ ކަމަށެވެ.
ރާއްޖެއަށް އިސްލާމްދީން އައިގޮތަށް އަލިއަޅުއްވާލައްވާ ޑރ. ޖަމީލް ވިދާޅުވީ އިސްލާމްދީން އައި ގޮތާމެދު ތަފާތު ގޮތްގޮތަށް ވާހަކަދައްކާ ކަމަށެވެ.
ޑރ.ޖަމީލް ވިދާޅުވީ ރަސްމީކޮށް ރާއްޖެއަށް އިސްލާމްދީން އައީ ހިޖުރައިން 548 ވަނަ އަހަރު ކަމަށް ކަނޑައަޅާފައި އޮތް ނަމަވެސް އެއަށްވުރެ އަވަހަށް ރާއްޖެއަށް އިސްލާމްދީން އައިސްފައިވާ ކަމަށެވެ. އެއީ އައްޑޫ އަތޮޅު ސ. މީދޫއަށް ކަމަށާއި، މީދޫއަށް ހިޖުރައިން 519 ވަނަ އަހަރު އިސްލާމްދީނުގެ ނޫރު ފާޅުވެފައިވާ ކަމަށް ޑރ. ޖަމީލް ވިދާޅުވިއެވެ. އަދި މިވާހަކަ ''ޝިހާބުއްދީން'' ކިޔާ ފޮތެއް މިހާދިސާ ވަރަށް ތަފްސީލްކޮށް ލިޔެފައިވާ ކަމަށެވެ.
މީގެ އިތުރުން ޑރ. ޖަމީލް ވިދާޅުވީ ރާއްޖޭގެ އެންމެ ދެކުނު ދެ އަތޮޅަކީ ރާއްޖޭގެ ހުރިހާ ރަށްތަކާ ހިލާފަށް އިލްމީ ބޭފުޅުން ގިނަ ދެއަތޮޅަށް ވާނެ ކަމަށެވެ. އަދި ވިދާޅުވީ އިލްމަށް އުނގެނުމާއި އިލްމަށް ލޯބިކުރާ ރައްޔިތުންތަކެއް ދިރިއުޅޭނެ ކަމަށެވެ.
އެގޮތުން ޚާއްސަ ގޮތެއްގައި ފުވައްމުލަކު ސިޓީގައި ޤުރުއާން ކިޔަވަން މޮޅު އަދި އެފޮތް ހިތުދަސް މީހުން ގިނަވާނެ ކަމަށެވެ. އަދި މިހާރު ދިރާސާކޮށް ބެލި ނަމަވެސް މިކަން ސާބިތުވެގެންދާނެ ކަމަށް ޑރ. ޖަމީލް ވިދާޅުވިއެވެ.
