ހަސަން ނޫރައްދީން (ދެވަނަ)ގެ ދަރިކަނބަލުން އަނީސާ އަވަހާރަވެއްޖެ

ރާއްޖޭގައި ރަސްކަން ކުރެއްވި އައްސުލްތާން ހަސަން ނޫރައްދީން (2 ވަނަ)ގެ ދަރިކަނބަލުން އަލް އަމީރާ އަނީސާ ނޫރައްދީން އަވަހާރަވެއްޖެއެވެ.

އެކަމަނާ އަވަހާރަވެވަޑައިގަތީ އާލާސްކަންފުޅާ އުޅުއްވުމަށްފަހު ހުކުރު ދުވަހުގެ ވަގުތެއްގައި ސްރީލަންކާގެ ބައްތަރަމުއްލަ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށެވެ. އަވަހާރަވީ އިރު އުމުރުފުޅަކީ 87 އަހަރެވެ. އެކަމަނާ ދުނިޔޭގެ އަލިކަން ދެކެވަޑައިގެންނެވީ ނަވާރަސަތޭކަ ތިރީސް ހަތަރު ވަނަ އަހަރުއެވެ.

އަލްއަމީރާ އަނީސާ ނޫރައްދީން ވަނީ ތިން ކައިވެންޏެއް ބައްލަވައިގަތެވެ. އެކަމަނާ ކައިވެނި ބައްލަވައިގެންނެވި ބޭފުޅުންނަކީ ކުރީގެ ބޮޑުވަޒީރު އަހްމަދު ޒަކީ، އަދި ކުރީގެ ފުޓުބޯޅަކުޅުންތެރިޔާ މއ. ބޮޑުގަލުމާފަތްގޭ ސައްޔިދު އަހްމަދު، އަދި މީދޫ އަބްދުލްއަޒީޒެވެ.

އަނީސާގެ ބައެއް ބޭފުޅުންގެ ތެރޭގައި ރާއްޖޭގައި އުފެދުނު ކުޅިވަރުގެ އެންމެ ވަރުގަދަ ދެ ޝަޚުސިއްޔަތު ކަމުގައިވާ ސައްޔިދު އަލީ އަދި އަލްމަރުހޫމް ސައްޔިދު ހަސަން، އަދި ކުރީގެ ޕޮލިސް ކޮމިޝަނަރު އަހްމަދު ފަސީހުވެސް ހިމެނިވަޑައިގަންނަވައެވެ.