ރާއްޖޭގެ ޖަލުތަކުގެ ހާލަތު ރަނގަޅު ކުރުމަށް ކުރާ މަސައްކަތުގެ ދަށުން މިހާރު ހުރިހާ ޖަލުތަކުގައި ހުންނާނީ ރަނގަޅު ކޮލެޓީ ފެން ކަމަށް މިނިސްޓްރީ އޮފް ހޯމް އެފެއަރޒްގެ ސްޓޭޓް މިނިސްޓަރ ޢަލީ ނަޒީރު ވިދާޅުވެއްޖެއެވެ.
ޖަލުތަކުގެ ހާލަތާ ބެހޭ ގޮތުން ރާއްޖޭޓީވީގައި ވާހަކަފުޅު ދައްކަވަމުން ނަޒީރު ވިދާޅުވީ ރައީސް އިބްރާހިމް މުހައްމަދު ސޯލިހު ސަރުކާރާ ހަވާލުވިއިރު، ރާއްޖޭގެ ޖަލުތަކުގެ ބޭނުން ކުރަމުންދިޔަ ފެނަކީ ބޭނުން ކުރުމަށް އެކަށީގެންވާ ފެން ނޫން ކަމަށާއި، އެފެނުގެ ސަބަބުން ގައިދީންނަށް ގިނަ ސިއްހީ މައްސަލަތަކާ ކުރިމަތިވި ކަމަށެވެ.
ނަމަވެސް މިސަރުކާރާއެކު ކުރެވުނު މަސައްކަތުގެ ދަށުން މިހާރު ރާއްޖޭގެ ހުރިހާ ޖަލެއްގައި ބޭނުންކުރާ ފެނަކީ އާންމުކޮށް މިބޯން ބޭނުންކުރާ ފެން ނުވަތަ އެއަށްވުރެ ރަނގަޅު ކޮލެޓީ ފެން ކަމަށެވެ. އަދި ރާއްޖޭގެ އެންމެ ބޮޑު ޖަލުކަމަށްވާ ކ.މާފުށީގެ ޖަލުގެ ފެން ވެސް ބަދަލުކުރެވިފައިވާ ކަމަށާއި، ފެނުގެ ސަބަބުން ގައިދީންނަށް ކުރިމަތިވި ސިއްހީ މައްސަލަތައް މިހާރު ކުރިމަތިނުވާނެ ކަމަށް ނަޒީރު ވިދާޅުވިއެވެ.
ޖަލުގެ އޮޑިޓް ރިޕޯޓަށް އަލިއަޅުއްވާލައްވާ ނަޒީރު ވިދާޅުވީ އެރިޕޯޓުގައި 182 ކަންތައް އިސްލާހު ކުރުމަށް ހިމަނާފައިވާއިރު، އެކަންކަން އެކަށިގެންވާ ވަގުތުގެ ތެރޭގައި ކުރެވިފައި ނެތް ނަމަވެސް ބޮޑެތި ބަދަލުތަކެއް ގެނެވިފައިވާ ކަމަށެވެ.
އެގޮތުން ބައިނަލް އަގްވާމީ ދުނިޔެއަށް ރާއްޖޭގެ ޖަލުތައް ހުޅުވާލާފައިވާ ކަމަށާއި، ރާއްޖޭގެ ޖަލުގެ ހާލަތު އޮތްގޮތް ބައިވެރިންނަށް ވެސް އެނގުން އެއީ ވެސް
މިސެކްޓަރގައި ހުރި ކަންކަން އިސްލާހު ކުރުމަށް އެޅުނު މުހިންމު ފިޔަވަޅެއް ކަމަށް ނަޒީރު ވިދާޅުވިއެވެ.
މިސަރުކާރު އުފެދުނު ގޮތުގައި ޖަލުގެ ގޮތުގައި ބޭނުން ނުކުރަން މޮނިޓަރ ކުރާ މުއައްސަސާތަކުން ވެސް ބައިނަލްއަގްވާމީ ފަރާތްތަކުން ނަސޭހަތްތެރިވަމުން އިރުޝާދު ދެމުން އައި ތިން އިމަރާތެއް ހުރި ރާއްޖޭގައި. އެއީ ހުޅުމާލޭގައި ހުރި ބިދޭސީން ބަންދުކޮށްގެން އުޅެމުން އައި މަރުކަޒު، އެތަން މިހާރު ތަޅާލައިފިން. ޖަލުގަ އެނެކްސް 1 ހަމައެގޮތަށް ބޭނުން ކުރަން އެކަށީގެން ނުވާ ތަނެއް ކަމަށް ތަކުރާރުކޮށް އިރުޝާދުދިން. މިހާރު އެތަން ރިނޮވޭޓްކޮށްގެން ބޭނުން ކުރަމުންދަނީ. ދެން ޕޮލިސް ކަސްޓޯޑިއަލް ފެސިލިޓީއެއް އެބަހުރޭ ހަމައެފަދަ ތަނެއް. އިރާދަކުރެއްވިއްޔާ މިހަފްތާ ނިމިގެން ދިއުމުގެ ކުރިން އަޅުގަނޑުމެން އެތަން ތަޅާލާނަން އެއިމާރާތް ނައްތާލާނަން. މިހާރު ވެސް ބޭނުން ކުރެވޭ އިމާރާތެއް ނޫން އެއީ. މިއީ އަޅުގަނޑުމެންނަށް ކުރެވިފައި ހުރި ބޮޑެތި މަސައްކަތައްތައް.ނަޒީރު- ހޯމް މިނިސްޓްރީގެ ސްޓޭޓް މިނިސްޓަރު
ނަޒީރު ވިދާޅުވީ ޖަލުތަކުގެ ފެންވަރު ރަނގަޅު ކުރުމަށް ކުރާ މަސައްކަތުގައި ނިޒާމީ ގޮތުން ރަނގަޅު ކުރަންޖެހޭ ކަންކަން އެބަހުރި ކަމަށާއި، ގަވާއިދުތަކަށް ގެންނަން ޖެހޭ ބަދަލުތައް އެބަހުރި ކަމަށެވެ. އަދި ޖަލުތަކުގެ ހާލަތު ރަނގަޅު ކުރުމަކީ މިސަރުކާރުގެ ވައުދަކަށްވާއިރު، ރައްޔިތުންގެ އެދޭ ފަދަ ބަދަލުތަކެއް އަންނާނެ ކަމަށް ނަޒީރު ވިދާޅުވިއެވެ.
