ޕާޓީން ވަކި ނުކުރާހާ ހިނދަކު ހުންނާނީ އެމްޑީޕީގައި: ޑރ.ޑީޑީ
27 ނޮވެމްބަރު 2019 | ބުދަ 17:47އޭރު ޕާޓީން ވަކި ކުރެއްވީ ބައެއްގެ ޒާތީ ތައައްސުބެއްގެ ސަބަބުން ކަމަށް ވިދާޅުވި
އެމްޑީޕީގެ ކުރީގެ ރައީސް ޑރ އިބްރާހިމް ދީދީ
ޕާޓީން ވަކިނުކުރާހާ ހިނދަކު ހުންނާނީ އެމްޑީޕީގައި ކަމަށް އެ ޕާޓީގެ ކުރީގެ ރައީސް ޑރ އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ "ފަލަސުރުޙީ" ޕްރޮގްރާމްގައި އެހެން ސިޔާސީ ޕާޓީއަކުން ފެނިދާނެތޯ ކުރި ސުވާލަކަށް ޖަވާބުދެއްވަމުން ޑީޑީ ވިދާޅުވީ، ޕާޓީން ވަކި ނުކުރާހާ ހިނދަކު ހުންނާނީ އެމްޑީޕީގައި ކަމަށާއި، މިއަދާއި ހަމައަށްވެސް ޕާޓީން ވަކި ކުރަން ހުށައެޅި ޤަރާރުގައި އެކަށީގެންވާ ހުއްޖަތެއް އޮތްކަން ދެއްކެވިފައި ނުވާކަމަށެވެ. އަދި އޭރު ޕާޓީން ވަކި ކުރެއްވީ ބައެއްގެ ޒާތީ ތައައްސުބެއްގެ ސަބަބުން ކަމަށްވެސް އޭނާ ވިދާޅުވިއެވެ. އެގޮތުން ޕާޓީ ބަދަލުކުރަން ޖެހޭ އެއްވެސް ހާލަތެއްވެސް ނެތް ކަމަށް އޭނާ ވިދާޅުވިއެވެ.
އަދި އެމްޑީޕީއަށް ބޭނުންވާ ކޮންމެ އެހީތެރިކަމެއް ފޯރުކޮށްދެއްވާނެ ކަމަށާއި، ޕާޓީގެ ފަރާތުން ކުރާ ކޮންމެ މަސައްކަތެއްގައިވެސް އެހީތެރިކަން ފޯރުކޮށްދެއްވާނެ ކަމަށް ޑީޑީ ވިދާޅުވިއެވެ. އެގޮތުން ކުރިއަށް އޮތް ލޯކަލް ކައުންސިލް އިންތިޙާބަށްވެސް ވެދެވުނު ކޮންމެ އެހީތެރިކަމެއް ވެދެއްވާނެ ކަމަށް ވިދާޅުވެފައިވެއެވެ.
އޭގެ އިތުރުން، ކޯލިޝަން ސަރުކާރެއް އުފެދި ކަންކަން ވެގެން ދިޔައީ ވަރަށް ތަފާތުކޮށް ކަމަށާއި، ބައެއް މަޤާމުތަކުގައި އަދިވެސް ތިއްބެވީ ކުރީގެ ސަރުކާރުގައި އައްޔަނު ކުރައްވާފައިވާ ފަރާތްތައްކަން ފާހަގަކުރައްވަމުން ޑީޑީ ވިދާޅުވީ، ރައްޔިތުން އެދޭ ޚިދުމަތްތައް ފޯރުކޮށްދިނުމަށް ގެންނަންޖެހޭ ބަދަލުތައް ރައީސް ސޯލިހު ގެންނަވާނެ ކަމަށް އުއްމީދު ކުރައްވާ ކަމަށެވެ.
ރާއްޖޭގެ ސިޔާސީ މަޝްރަހާއި ގުޅޭގޮތުން ޑީޑީ ވިދާޅުވީ، ކޯލިޝަން ޕާޓީގެ ތެރެއަށް ކުރީގެ ސަރުކާރުގައި ހިންގާފައިވާ ޖަރީމާތަކުގެ ތުހުމަތު ކުރެވޭ މީހުން ވަންނަތަން ފެނުމަކީ ހިތާމަހުރި ކަމެއް ކަމަށާއި، އެކަމުގެ ސަބަބުން ރާއްޖޭގެ ސިޔާސީ މަޝްރަހަށް ވަރަށް ބޮޑު ނޭދެވޭ އަސަރެއް ކުރާނެ ކަމަށެވެ. އަދި ކޯލިޝަންގެ ބައެއް މެމްބަރުންގެ ފަރާތުން ސަރުކާރާއި މަޖިލިސް ތެރެއިން އެންމެ އެކަށީގެންވާ މިންވަރަށް އެއްބާރުލުން ދޭތަން ނުފެންނަ ކަމަށް އޭނާ ވިދާޅުވިއެވެ.
އޭގެ އިތުރުން، ކޯލިޝަނަކާއި ބެހޭ ވަކި ޤާނޫނެއް ނެތްކަން ފާހަގަކުރައްވައި ޑީޑީ ވިދާޅުވީ، ކޯލިޝަންގެ މެމްބަރުން ކުރާ ކަންކަމުގައި ފިޔަވަޅު އެޅޭނެ ހަރުދަނާ އުސޫލެއްވެސް ނެތް ކަމަށެވެ.
އެމްޑީޕީގެ ވެރިކަން 08 ފެބްރުއަރީ 2012 ގައި ބަޣާވާތްކޮށްގެން ވައްޓާލުމާ ގުޅިގެން އެ ޕާޓީގެ ޤައުމީ މަޖިލީހުން ޕާޓީން ޢަމަލުކުރާނެ ގޮތްތަކެއް ނިންމިއެވެ. ނަމަވެސް އޭރު ރައީސް ކަމުގެ މަޤާމުގައި ހުންނެވި ޑރ. އިބްރާހީމް ދީދީ އާއި، ނައިބު ރައީސް ކަމުގެ މަޤާމުގައި ހުންނެވި އަލްހާން ފަހުމީ ޕާޓީގެ ނިންމުންތަކާއި ޚިލާފުވާކަމަށް ބުނެ ޕާޓީގެ ރައީސް އާއި ނާއިބު ރައީސްއާ މެދު އިތުބާރު އޮތްކަން ނުވަތަ ނެތްކަން ބެލުމަށް ޤައުމީ މަޖިލީހަށް ޤަރާރެއް ހުށަހެޅުނެވެ. އެގޮތުން ޤަރާރުގައި ވަނީ ޕާޓީގެ މަސްލަހަތު ގެއްލޭގޮތަށް އެބޭފުޅުން ތަކުރާރުކޮށް އަމަލުކުރައްވަމުން ގެންދަވާ ކަމަށެވެ.
އެގޮތުން އޭރު އިތުބާރު އޮތްކަން ނުވަތަ ނެތްކަން ބެލުމަށް ނެގި ވޯޓުގައި އެ ދެބޭފުޅުންނަށް ޕާޓީގެ ގައުމީ މަޖިލީހުގެ އިތުބާރު ނެތްކަމަށްވަނީ ފާސްކޮށްފައެވެ.
