ސައުތު އޭޝިއަން ގޭމްސް: ފިރިހެން އަދި އަންހެން ކްރިކެޓް ޓީމު ނޭޕާލުގައި

ސައުތު އޭޝިއަން ގޭމްސްގައި ބައިވެރިވުމަށް ރާއްޖޭގެ ފިރިހެން އަދި އަންހެން ކްރިކެޓް ޓީމު ނޭޕާލަށް ފުރައިފިއެވެ.

ފިރިހެން އަދި އަންހެން ކްރިކެޓް ޓީމު ހޯމަ ދުވަހު ނޭޕާލަށް ފުރާފައިވާއިރު، ދެޓީމުގެ ފަރިތަކުރުންތައް ފެށުމަށް ހަމަޖެހިފައިވަނީ ބުދަ ދުވަހު އެވެ.

މިފަހަރުގެ ގޭމްސްގައި އަންހެން ކްރިކެޓް ޓީމު ވާދަކުރާއިރު، މިއީ އަންހެން ކްރިކެޓް ޓީމު ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރެވެ.

މުބާރާތަށް ތައްޔާރުވުމުގެ ގޮތުން ކްރިކެޓް ބޯޑުން ވަނީ ގައުމީ އަންހެން ކްރިކެޓް ޓީމަށް ކޯޗުކޮށްދޭން ސްރީލަންކާ ގައުމީ ޓީމަށް ކުރިން ކުޅުނު ޕަދްމާ ކަރުނަރަތުނޭ ހަމަޖައްސާފައެވެ.

އިންޑިއާ ސަރުކާރުން އަންނަނީ ރާއްޖޭގެ ކްރިކެޓް ކުރިއަރުވަން އެހީތެރިކަން ފޯރުކޮށްދެމުންނެވެ. އަދި އެގައުމުގެ ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާއިން ވަނީ ރާއްޖެ އައިސް ކްރިކެޓް ކުރިއެރުވުމަށް ކުރެވެން ހުރި ކަންކަމާ ގުޅޭގޮތުން މަޝްވާރާ ކޮށްފައެވެ.

އެގޮތުން ރާއްޖޭގެ ކްރިކެޓް ޑިވެލޮޕްމަންޓަށް އިންޑިއާ އިން ރަނގަޅު ޕްރޮގްރާމެއް ތައްޔާރުކޮށްދޭން އެއްބަސްވެފައިވާއިރު، މިހާރުވެސް އަމަލީ ގޮތުން، ކޯޗުންނާއި އަމްޕަޔަރުން ތަމްރީން ކުރުމުގެ ޕްރޮގްރާމް އަންނަނީ ހިންގަމުންނެވެ.

މީގެއިތުރުން ރާއްޖޭގައި ބައިނަލްއަގްވާމީ ކްރިކެޓް ސްޓޭޑިއަމެއް އަޅައިދޭން ވެސް އިންޑިއާ ސަރުކާރުން ވަނީ ނިންމައިފަ އެވެ. އެގޮތުން އެ ސްޓޭޑިއަމްއާއެކު، ކްރިކެޓަށް ހާއްސަ ސްޓޭޑިއަމެއް ލިބުމުގެ އިތުރުން ބައިނަލްއަގްވާމީ މެޗުތައް ކުޅުމުގެ ފުރުސަތު ވެސް ތަނަވަސްވާނެ އެވެ.