ޑީސަލަށް ކުރާ ޚަރަދު ކުޑަކުރެވިއްޖެނަމަ ރިޒާވަށް އެކަމުގެ ހެޔޮ އަސަރު ކުރާނެ: ފިނޭންސް
25 ނޮވެމްބަރު 2019 | ހޯމަ 14:11ޑީސަލަށް ކުރާ ޚަރަދު ކުޑަކުރެވިއްޖެ ނަމަ ރުފިޔާ އެކްސްޗޭންޖް ރޭޓަށްވެސް ހެޔޮ ބަދަލުތައް އަންނާނެ ކަމަށް ބެލެވޭ ކަމަށް ވިދާޅުވި
އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީގެ ބައްދަލުވުން
އިޔާދަ ކުރަނިވި ހަކަތައިން ކަރަންޓް އުފެއްދުމަށް ޚަރަދުކޮށް ޑީސަލަށް ކުރާ ޚަރަދު ކުޑަކުރެވިއްޖެ ކަމުގައި ވަނީ ނަމަ ރާއްޖޭގެ ރިޒާވް ޕޮޒިޝަންއަށް އެކަމުގެ ހެޔޮ އަސަރު ކުރާނެ ކަމަށް ފިނޭންސް މިނިސްޓްރީން ބުނެފިއެވެ.
އިޔާދަ ކުރަނިވި ހަކަތައިން ކަރަންޓް އުފެއްދުމަށް ކުރެވެމުންދާ މަސައްކަތްތަކާއި ގުޅޭގޮތުން ހޯމަދުވަހު ބޭއްވި އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީގެ ބައްދަލުވުމުގައި އެ މިނިސްޓްރީގެ ފަރާތުން މައުލޫމާތު ދެއްވަމުން އަހުމަދު ޒިޔާން މުހައްމަދު ވިދާޅުވީ ކަރަންޓް އަގުކެޔޮ ކުރުމުގެ ގޮތުން ޔުޓީލިޓީސް އަށް ދޭ ކޮމްޕޯނަންޓާއި ބިލް ތަކަށް ކަނޑާލެވޭ ބަޔައް 330 މިލިއަނެއްހާ ރުފިޔާ އަހަރެއްގެ މައްޗަށް ޚަރަދުވާ ކަމަށާއި ޖުމްލަ ބިލިއަނެއްހާ ރުފިޔާ ސީދާ ދައުލަތުގެ ބަޖެޓުން ކޮންމެ އަހަރަކު އެކަމަށް ޚަރަދު ކުރެވޭ ކަމަށެވެ. އެހެންކަމުން ޕްރޮޖެކްޓްތައް ރާވާ ކުރިއަށް ގެންދިއުމުގައި ރިނިއުބަލް އެނރޖީއަށް ފޯކަސް ކޮށްގެން ޕްރޮޖެކްޓްތައް ހިމަނައިގެން ދިގުރާސްތާ ޕްލޭނެއްގެ ދަށުން ކުރިއަށް ގެންދިއުން މުހިއްމުކަން ޒިޔާން ވަނީ ފާހަގަ ކުރައްވާފައެވެ.
ގްރީން ފަންޑްގެ މެންޑޭޓްގެ ތެރޭގައިވެސް ރިނިއުބަލް އެނަރޖީގެ މަޝްރޫއުތައް ކުރިއަށް ގެންދިއުން ހިމެނޭކަމަށް އޭނާ ވިދާޅުވިއެވެ.
ރިނިއުބަލް އެނަރޖީގެ 50 އިންސައްތައަށް ވުރެ ގިނަ ޕޯޝަނަކީ ހިލޭ އެހީގެ މަޝްރޫޢުތަކަށްވުމުން، މިފަދަ މަޝްރޫއުތައް ހިންގަން ހިލޭ އެހީ ހޯދަން އިސްކަން ދިމުނަކީ ރަނގަޅު ކަމެއް ކަމަށް އޭނާ ވިދާޅުވިއެވެ. ޑީސަލަށް ކުރާ ޚަރަދު ކުޑަކުރެވިއްޖެ ނަމަ ރުފިޔާއެކްސްޗޭންޖް ރޭޓަށްވެސް ހެޔޮ ބަދަލުތައް އަންނާނެ ކަމަށް ބެލެވޭ ކަމަށް ޒިޔާން ވިދާޅުވިއެވެ.
