ބ. ކިހާދޫ، ކުޑަރިކިލު އަދި ދޮންފަނުގެ ބަނދަރު ހެދުމަށް އެގްރީމެންޓްގައި ސޮއިކުރެވޭނީ އަންނަ އަހަރު: މިނިސްޓަރ

ބ. ކިހާދޫ، ކުޑަރިކިލު އަދި ދޮންފަނުގެ ބަނދަރު ހެދުމުގެ މަޝްރޫޢުގެ އެގްރިމެންޓްގައި ސޮއިކުރެވޭނީ އަންނަ އަހަރުގައި ކަމަށް މިނިސްޓަރ އޮފް ނެޝަނަލް ޕްލޭނިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެ އެވެ.

މިނިސްޓަރ މިހެން ވިދާޅުވީ، ހޯމަ ދުވަހުގެ ޖަލްސާގައި ކެންދޫ ދާއިރާގެ މެމްބަރ އަލީ ހުސައިން ބ އަތޮޅު ކިހާދޫ، ކުޑަރިކިލު އަދި ދޮންފަނުގެ ބަނދަރު ހެދުމުގެ މަޝްރޫޢު މިއަހަރުގެ ބަޖެޓުގައި ހިމެނިފައިވާއިރު އެމަސައްކަތް ފެށޭނެ ތާރީޚާ ގުޅޭގޮތުން ދެންނެވި ސުވާލަށް ޖަވާބު ދެއްވަމުންނެވެ. މިނިސްޓަރ ވިދާޅުވީ އެތިން ރަށުގެ ބަނދަރު ހެދުމުގެ މަޝްރޫޢަކީ އޯޕެކް ފަންޑު ފޯރ އިންޓަނޭޝަނަލް ފަންޑު (އޮފިޑް)ގެ ލޯނު އެހީގެ ދަށުން ކުރިޔަށް ގެންދިޔުމަށް ހަމަޖެހިފައިވާ މަޝްރޫޢެއް ކަމަށެވެ. އެގޮތުން މިމަޝްރޫޢުގެ ކަންކަން ކުރިޔަށް ގޮސްފައިވާ ހިސާބުގެ ތަފްސީލު ދެއްވަމުން މިނިސްޓަރ ވިދާޅުވީ 2018 ވަނަ އަހަރުގެ ޖުލައި މަހުގެ ތެރޭގައި އޮފިޑްގެ ލޯނަކަށް ރާއްޖޭގެ އިންފްރާސްޓްރަކްޗަރގެ ބައެއް މަސައްކަތްތައް ކުރުމަށް އެދިފައިވާ ކަމަށެވެ.

އެލޯން އެޕްލިކޭޝަނަށް ހުށަހެޅި ރަށްތަކުގެ ތެރޭގައި މި ތިން ރަށް ހިމެނޭކަމަށާއި އެޕްލިކޭޝަނާ އެކުގައި އޮފިޑުން އެމަސައްކަތަށް ބޭނުންވާ ޕްރޮޕޯސަލެއް ހަދާ އެޕްރައިޒް ކުރުމުގެ މަސައްކަތެއް 2019 ވަނަ އަހަރުގެ ޖެނުއަރީ މަހު ކޮށްފައިވާކަމަށް މިނިސްޓަރ ވިދާޅުވި އެވެ. އެގޮތުން އެޕްރައިޒަލް މިޝަން އެއް ރާއްޖެއަށް ޒިޔާރަތްކޮށް ސަރުކާރުގެ ކަމާބެހޭ ވުޒާރާތަކާއި، އެރަށްރަށަށް ޒިޔާރަތްކޮށް އެޕްރައިޒަލް މަސައްކަތް ކޮށްފައިވާކަމަށް މިނިސްޓަރ ވިދާޅުވި އެވެ. އަދި މިހާތަނަށް އާއިރު މިއެގްރިމެންޓްގައި ސޮއިކޮށްފައި ނުވާކަމަށާއި ނަމަވެސް މިއަހަރުގެ ޑިސެމްބަރ މަހު މިއެގްރިމެންޓްގައި ސޮއިކުރެވޭނެކަމަށް އުންމީދުކުރައްވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެފައިވާކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ބޭރުގެ ފަރާތްތަކުން ނަގާ ލޯނުގެ ކަންކަން ދާނީ އެންމެ އެދެވޭ މިންވަރަށް ނޫންކަމަށެވެ. މިނިސްޓަރ ވިދާޅުވީ މިތިން ރަށުގެ ބަނދަރަކީ މިހާރު ވަރަށް ބޮޑަށް ހަލާކުވެފައިވާ ބަނދަރު ތަކެއްކަމަށާއި އަދި މިއީ ރައީސުލްޖުމްހޫރިއްޔާގެ ވަޢުދުގެ ތެރޭގައި ހިމެނޭ ތިން ރަށްކަމަށް މިނިސްޓަރ ވިދާޅުވި އެވެ. އަދި މަސައްކަތުގެ ސްޕީޑް ދާ މިންވަރާ މެދު ހިތްޕުޅުހަމަޖެހިވަޑައި ނުގަންނަވާކަމަށް މިނިސްޓަރ ވިދާޅުވި އެވެ.