އަނަސްގެ މަރުގެ މައްސަލައިގެ ޝަރީއަތް މާދަމާ

ވަޅިން ހަމަލާދީ މަރާލާވިފައިވާ ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ ޝަރީއަތް ހޯމަ ދުވަހަށް ތާވަލު ކޮށްފިއެވެ.

ގަލޮޅުގައި ހުންނަ ލިޓަސް ސަރވިސް ސެންޓަރު ތެރޭގައި 2017 ވަަނަ އަހަރު އަނަސް މަރާލާފައިވާއިރު، މި މައްސަލައިގައި ދައުލަތުން ވަނީ 7 މީހެއްގެ މައްޗަށް ދައުވާ ކޮށްފައެވެ.

އެގޮތުން އަނަސް އަށް ހަމަލާ ދިނުމުގައި އަމަލީ ގޮތުން ބައިވެރިވި ކަމަށް ބުނެ ހަތަރު މީހެއްގެ މައްޗަށް ދައުވާ ކޮށްފައިވާއިރު، އޭގެ ތެރޭގައި ހިމެނެނީ ޅ. ކުރެންދޫ އަސުރުމާގޭ އަހުމަދު ޒަޔާންއާއި، މ. ދިމިޝްގު، އުސްމާން ޝަރީފްއާއި، ތ. ކިނބިދޫ ގުލްފާމުގޭ، މުހައްމަދު ޝާޒް އަދި މ. ލޮނުމިދިލިގޭ އަފްރާހު އަބްދުއްރައްޒާޤުއެވެ.

އޭގެ އިތުރުން، އަނަސްއަށް ހަމަލާދިން މީހުން ގޮވައިގެން ލިޓަސް ސަރވިސް ސެންޓަރު ކައިރިއަށް ސައިކަލުގައި ގޮސް ހަމަލާ ދިނުމަށް ފަހު އެ މީހުން ގޮވައިގެން ސައިކަލުގައި އެ ސަރައްދުން ދިޔަ ކަމަށް ބުނެ އަނަސް މަރާލުމުގެ ބައިވެރިވިކަމުގެ ދައުވާ ތިން މީހެއްގެ މައްޗަށް ކޮށްފައިވެއެވެ. އެގޮތުން ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ދައުވާ ކޮށްފައިވަނީ ލ. ގަން ތުނޑީ ނަންނާރިގޭ، ޖުނައިހު އަބްދުﷲއާއި، ސ. ފޭދޫ ވެސްޓަންވިލާ ހަސަން މަހްފޫޒް އަދި ދަފްތަރު ނަމްބަރު 1746، ސިމާހް މޫސާ އެވެ.

މި މައްސަލައިގެ އިބްތިދާއީ އަޑުއެހުމުގައި އެމީހުން ދައުވާއަށް އިންކާރުކޮށްފައިވާއިރު އެމީހުންގެ ދިފާއީ ވަކީލުން ވެސް ވަނީ އެ ދައުވާއަކީ އެމީހުންގެ މައްޗަށް ކުރެވޭނެ ދައުވާއެއް ނޫން ކަމަށް ބުނެ ދިފާއުގައި ގިނަ ވާހަކަތަކެއް ދައްކާފަ އެވެ. އަދި ދިފާއީ ވަކީލުން ވަނީ ދައުލަތުން ހުށަހެޅި ހެކިތަކާ މެދު ވެސް ގިނަ ސުވާލުތަކެއް އުފައްދާފައެވެ.

އަނަސްގެ މަރާއި ގުޅިގެން އާންމުވެފައިވާ ވީޑިއޯއިން ފެންނަ ގޮތުގައި ހަތަރު މީހުންގެ ގްރޫޕަކުން ތޫނު ހަތިޔާރާއެކު ލިޓަސް ސަރވިސް ސެންޓަރު ތެރެއަށް ވަދެ އަނަސްގެ ހަށިގަނޑުގެ އެކި ތަންތަނަށް ހަމަލާދީފައިވެއެވެ. ލިޓަސް ސަރވިސް ސެންޓަރަށް އަނަސް ދުވެފައި ގޮސް ވަދެފައިވަނީ އެމީހުން އޭނާގެ ފަހަތުން ދުވެފައި ދިއުމުން ކަން ވީޑިއޯއިން ފެނެ އެވެ. އަދި އަނަސް އަށް ހަމަލާދިން އެންމެން ވެސް ތިބީ މާސްކް އަޅައިގެންނެވެ.

އަނަސްގެ ހަށިގަނޑުގެ 37 ތަނަކަށް މަދު ސިކުންތުކޮޅެއްގެ ތެރޭގައި ހަމަލާދިން އިރު، އޭޑީކޭ ހޮސްޕިޓަލަށް ގެންދިޔަ އިރުވެސް އޭނާ އޮތީ މަރުވެފަ އެވެ.