މިހާރު އިންތިހާއަށް ކުޑަކުދިންނާ "ބެހެން" ފަށައިފި: ރައީސް ނަޝީދު
24 ނޮވެމްބަރު 2019 | އާދީއްތަ 07:1113 އަހަރުގެ ކުއްޖަކާ ކޯޓުން ބޭރުން ކައިވެނިކޮށްދީ، ސެޓްފިކެޓެއް ވެސް ވަނީ ދީފައި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
މިހާރަކަށް އައިސް ކުޑަކުދިންނާ އިންތިހާއަށް "ބެހެން" ފަށައިފި ކަމަށާއި އެއީ ވަރަށް ބޮޑަށް ކަންބޮޑުވެ ވަޑަގަންނަވާ ކަމެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ލ. އަތޮޅުގައި މިހާރު ކުރިއަށްދާ، ކުޑަކުދިންގެ ހައްގުތައް ރައްކާތެރިކުރުމާއި، ކުޑަކުދިންގެ އަދުލްގެ ނިޒާމާބެހޭ ސެމިނާ އިފްތިތާހު ކޮށްދެއްވުމުގެ ގޮތުން، ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ، ޒަމާނުއްސުރެން ދިވެހިން ކުޑަކުދިން ބަލާ ބޮޑު ކުރުމުގައި ގެންގުޅުނު ޘަގާފަތާއި، އާދަކާދަތައް، ބަދަލުވެ، ކުޑަކުދިންނަށް އެކި ގޮތްގޮތުން ދެމުންދާ އަނިޔާތައް އިތުރުވެ، ކުޑަކުދިންނަށް ޖިންސީ ގޯނާ ކުރަމުންދާ މައްސަލަތައް އިންތިހާއަށް އިތުރުވެ، އުމުރުން 12 ނުވަތަ 13 އަހަރުގެ އަންހެން ދަރިން، މީހުންނާ އިނދެވޭނެ ކަމަށް ބުނެ އެދައްކަމުންދާ ވާހަކަތަކަކީ ދިވެހިންނާ ވަރަށް ބީރައްޓެހި ވާހަކަތަކެއް ކަމަށެވެ.
ރައީސް ނަޝީދު ވިދާޅުވީ ކޯޓުން ބޭރުން ކުޑަކުދިންނާ އިނުމާއި، ޖިންސީ ގޯނާކުރުން ފަދަ ކަންކަމަކީ ކުރީޒަމާނުގައި ރާއްޖޭގެ އާންމު ގޭތަކުގައި ތެރޭގައި ހިންގަމުން އަންނަ ކަންކަންކަމަށް ފާހަގަ ކުރެވިފައި ނުވާކަމަށެވެ.
ރައީސް ނަޝީދު ވިދާޅުވީ، 13 އަހަރުގެ އަންހެން ކުއްޖަކު ކޯޓުން ބޭރުގައި މީހަކާ އިނދެ، އެކައިވެނި ކޮށްދިން ފަރާތުން އެކުއްޖާއަށް ކައިވެނީގެ ސެޓްފިކެޓެއް ދީފައިވާއިރު، އޭނާ ގޯއްޗަކަށް އެދެން ބޭނުންވީމައި، އެ ސެޓްފިކެޓް ދައުލަތުގެ އިދާރާއަކަށް ހުށަހެޅުމުން އެސެޓްފިކެޓް އެ އިދާރާއިން ބަލައިގަނެފައިވާކަން އެނގިވަޑައިގަންނަވާފައިވާ ކަމަށެެވެ.
ރައީސް ނަޝީދު ވިދާޅުވީ މީގެ އެތައް ޒަމާނެއް ކުރިންވެސް ކުޑަކުއްޖަކަށް އަނިޔާ ކޮށްފިނަމަ ކަމާ ބެހޭ ފަރާތްތަކުން އެކަމަަށް ފިޔަވަޅު ނާޅައި ދޫކޮށްނުލާ ކަމަށެވެ. އެހެން ނަމަވެސް މިހާރު މައްސަލަ ތަހުގީގު ކުރާ ކަމަށް ނުވަތަ ފޮރެންސިކް ތަހުލީލު ކުރާކަމަށް ބުނެ މައްސަލަ ދިގުދަންމާ ކަމަށް ރައީސް ނަޝީދު ވިދާޅުވިއެވެ.
