ސިޔާސީ ޕާޓީތަކުގެ މެދުގައި މެދުކެނޑުމެއްނެތި ބަހުގެ ހޫނު ހަމަލާ ބަދަލުކުރުމަކީ ވަރަށް ނުރައްކާތެރިކަމެއް ކަމަށާއި އޭގެ ނަތީޖާ ރަނގަޅުނުވާނެ ކަމަށް ކުރީގެ ރައީސް އަދި މޯލްޑިވްސް ރިފޯމް މޫވްމެންޓް (އެމްއާރުއެމް)ގެ އިންތިޤާލީ ރައީސް އަލްއުސްތާޛު މައުމޫން އަބްދުލްޤައްޔޫމް ވިދާޅުވެއްޖެ އެވެ.

ސަރުކާރު ކޯލިޝަންގައި ހިމެނޭ އެމްއާރުއެމް އުފެއްދުމަށް ބޭއްވި ޖަލްސާގެ ނިމުން ފާހަގަކުރުމަށް ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ ޚިޔާލުފާޅުކުރުމުގެ މިނިވަން ކަމަކީ ޑިމޮކްރަސީގެ އެއް ތަނބުތަކަމަށާއި އެކަމަށް ހުރަސް އެޅިގެން ނުވާނެ ކަމަށެވެ. އަދި ޕާޓީތަކުގެ މެދުގައި ޚިޔާލުތަފާތުވުން އޮތްނަމަވެސް އެންމެންގެ މެދުގައި އެއްބަސްވެވޭ ކޮމަން ގްރައުންޑެއް އޮންނަންޖެހޭ ކަމަށް ޤަބޫލުކުރައްވާކަމަށް ރައީސް މައުމޫން ވިދާޅުވި އެވެ.

ރައީސް މައުމޫން މިމޭރުމުން ވާހަކަފުޅު ދައްކަވާފައިވާއިރު ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން އަންނަނީ އެޕާޓީން ބާއްްވަމުންދާ ޖަލްސާތަކުގައި ކޯލިޝަންގައި ހިމެނޭ އެންމެ ބޮޑު ސިޔާސީ ޕާޓީކަމަށްވާ އެމްޑީޕީއަށް އަބަދުވެސް ފާޑުކިޔަމުންނެވެ. ޚާއްސަކޮށް އެޕާޓީގެ ލީޑަރ ގާސިމް އިބްރާހީމް އަބަދުވެސް ގެންދަވަނީ އެމްޑީޕީގެ ރައީސް މުހައްމަދު ނަޝީދަށް ފާޑުވިދާޅުވެ ވާހަކަ ދައްކަވަމުންނެވެ. އެކަމާ ގުޅިގެން އެމްޑީޕީގެ އާންމު މެމްބަރުން އަންނަނީ ސޯޝަލް މީޑިއާގައި ޖުމްހޫރީ ޕާޓީއަށް އަމާޒުކޮށް ބަހުގެ ހަމަލާތައް ދެމުންނެވެ. ކޯލިޝަންގައި ހިމެނޭ ހަތަރު ސިޔާސީ ޕާޓީގެ ލީޑަރުންގެ ތެރެއިން ޖޭޕީގެ ލީޑަރު ގާސިމް އިބްރާހީމް އެމްޑީޕީއަށް އަމާޒުކޮށް ފާޑުކިޔަން ފަށާފައިވަނީ ރައްޔިތުންގެ މަޖިލީހުގެ އިންތިޚާބަށް އެމްޑީޕީން ވަކިން ނިކުންނަން ނިންމި ނިންމުމާ ގުޅިގެންނެވެ.

ރަސްމިއްޔާތުގައި ވާހަކަފުޅު ދައްކަވަމުން ރައީސް މައުމޫން ވިދާޅުވީ މި ޖަލްސާގައި ރައީސުލްޖުމްހޫރިއްޔާ ބައިވެރިވެ ވަޑައިގެންނެވުމަކީ ޕާޓީއަށް ލިބިގެންދިޔަ ޝަރަފެއްކަމަށެވެ.

ރައީސް މައުމޫން ވިދާޅުވީ އެމްއާރުއެމްގެ މަޤްސަދަކީ ދިވެހިންގެ ކަންތައްތައް އިސްލާހު ކުރުމަށްޓަކައި ކުރެވެން ހުރި ހުރިހާ މަސައްކަތެއް ކުރުން ކަމަށެވެ. އަދި ކޮންމެ ކަމެއްގައިވެސް ކުރިޔަށް ހެޔޮ ފިޔަވަޅު އެޅުން އެއީ އިސްލާހަށް ކުރެވިގެންދާނެ މަސައްކަތެއް ކަމަށް ރައީސް މައުމޫން ވިދާޅުވި އެވެ.

އެމްއާރުއެމް ބޭނުންވަނީ ރާއްޖޭގެ ސިޔާސީ ހަރަކާތް އިތުރު ހަރުފަތަކަށް ގެންދަންކަމަށާއި އެގޮތުން ދެ ކަމެއް ނިންމާފައިވާ ކަމަށް ރައީސް މައުމޫން ވިދާޅުވި އެވެ. އެއް ކަމަކީ ޕާޓީގެ ކޮންމެ ހަރަކާތެއްގައި މިންތީގެ ހަމަހަމަކަން ޤާއިމުކުރުން ކަމަށް ރައީސް މައުމޫން ވިދާޅުވި އެވެ. އަންހެން އަދި ފިރިހެން މެމްބަރުން އެއް އަދަދަކަށް ތިބުންކަމަށާއި ދެވަނަ ކަމަކީ އެމްއާރުއެމްގެ ކޮންމެ ގުނަވަނެއްގައިވެސް 25 އިންސައްތައަށްވުރެ މަދު ނޫން އަދަދަކަށް އުމުރުން 30 އަހަރުން ދަށުގެ މެމްބަރުން ތިބުންކަމަށް ރައީސް މައުމޫން ވިދާޅުވި އެވެ.

އެމްއާރުއެމް ގަބޫލުކުރާ ޒުވާނުންގެ މިންގަނޑަކީ 18 އަހަރާއި 30 އަހަރާއި ދެމެދު ކަމަށާއި އެގޮތަށް ކަނޑައެޅީ ޒުވާނުންނަށް އިތުރު ފުރުސަތުތައް ފަހިކޮށް ދިނުމަށްކަމަށް ރައީސް މައުމޫން ވިދާޅުވި އެވެ.