ވަޅިހެރި މައްސަލައިގެ ތުހުމަތުގައި ދޯނީގެ މީހަކު ފުލުހުންގެ ބެލުމުގެ ދަށަށް

ކަނޑުމަތީގައި ހިނގި މާރާމާރީއެއްގައި މީހެއްގެ ގައިގައި ވަޅި އަޅާ ޒަހަމްކުރުމަށްފަހު ކަނޑަށް އެއްލާލި މައްސަލާގައި އެ ދޯނީގެ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.

އެ ހާދިސާ ހިނގާފައިވަނީ ހުކުރު ދުވަހުގެ ހެނދުނުގެ ވަގުތެއްގައެވެ. ފުލުހުން ބުނީ، ޒަހަމްވެފައިވަނީ 26 އަހަރުގެ ދިވެހި ފިރިހެނެއް ކަމަށާއި، އޭނާއަށް ލިބިފައިވާ އަނިޔާތައް ސީރިއަސް ކަމަށެވެ.

ފުލުހުން ބުނީ، އޭނާ ޒަހަމްވެފައިވަނީ ލަނޑާ ނަގަން އުޅުނު ދޯންޏެއްގައި ހިނގި މާރާމާރީއެއްގައި ކަމަށާއި، އެމީހާގެ ގައިގައި ވަޅި އެޅުމަށްފަހު ކަނޑަށް އެއްލާލާފައިވާ ކަމަށް މިހާތަނަށް ބެލިބެލުމުން އެނގިފައިވާ ކަމަށެވެ.

މައުލޫމާތު ލިބޭގޮތުގައި މި ޒުވާނާގެ 8 ތަނަކަށް ވަނީ ވަޅިން ހަމަލާދީފައެވެ. މި ޒުވާނާއަކީ ރ. މަޑުއްވަރީ ދޯންޏަކުން ލަނޑާ ނަގަންދާ މީހެކެވެ. އަދި އޭނާ ޒަހަމްވެފައިވަނީ އެ ދޯނީގައި މަސައްކަތް ކުރާ އެހެން މީހުންނާ ދެމެދު ހިނގި އަރާރުންވުމެއްގައި ކަމަށް މައުލޫމާތު ލިބެއެވެ.