ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހިންގާ ކޮމެޓީގެ އަހަރީ ދުވަސް ފާހަގަކުރުމުގެ ގޮތުން ބާއްވާ ހަރަކާތްތަކަށް ހާއްސަ މެހެމާނެއްގެ ގޮތުގައި އައިވަރީ ކޯސްޓްގެ މިޑްފީލްޑަރ ޔާޔާ ޓޫރޭ ރާއްޖެ އަންނަ ގޮތަށް ހަމަޖެހިއްޖެއެވެ.

އެފްއޭއެމްގެ އެކްސްކޯގެ އަހަރީ ދުވަހާއި ގުޅިގެން ބާއްވާ ކިޑްސް ފެސްޓިވަލްގައި ޔާޔާ ޓޫރޭ ބައިވެރިވާނެއެވެ. ޔާޔާ ޓޫރޭ ބައިވެރިވާ އިވެންޓް އޮންނާނީ ބުރާސްފަތި ދުވަހު ހަވީރު ގަލޮޅު ދަނޑުގައެވެ. އެފްއޭއެމް އިން ބުނީ މި އިވެންޓުގައި ގާތްގަނޑަކަށް 600 ކުދިން ބައިވެރިވާނެ ކަމަށާއި މި ހަރަކާތުގައި ޔާޔާ ޓޫރޭ އާއި އެކު ފުޓުބޯޅައިގެ އެކި އެކި ހަރަކާތްތަކުގައި ބައިވެރިވުމުގެ ފުރުސަތު ކުދިންނަށް ލިބިގެންދާނެ ކަމަށެވެ. މި އިވެންޓު ކުރިޔަށްދާނީ ބުރާސްފަތި ދުވަހު ހަވީރު 16:00 އިން 18:00 އަށް ކަމަށެވެ.

ޔާޔާ ޓޫރޭ ސޯޝަލް މީޑިއާގައި އާންމުކުރި ވީޑިއޯއެއްގައި ބުނީ މިފުރުސަތު ދިން ކަމަށް ޓަކައި އެފްއޭއެމްގެ ރައީސް ބައްސާމް އަދީލް ޖަލީލަށް ޝުކުރު އަދާކުރާ ކަމަށާއި ފީފާގެ ވިޝަން ޕްރެޖެކްޓް އެއްގައި ބައިވެރިވެވޭތީ އުފާ ކުރާކަމަށް ބުނެފައެވެ. އުމުރުން 18 އަހަރުގައި ޕްރެފެޝަނަލް ފުޓްބޯޅަ ބެލްޖިއަމްގެ ބެވްރެން އިން ފެށި ޓޫރޭ ވަނީ ކެރިއަރު ނިންމާލުމުގެ ކުރިން ހަތް ކްލަބަކަށް ކުޅެފައެވެ. ދެހާސް ހަތަރު ވަނަ އަހަރު އައިވަރި ކޯސްޓުގެ ގައުމީ ސްކޮޑްގައި ހިމެނި ޓޫރޭ ވަނީ އެ ޓީމަށް ތިން

ވޯލްޑް ކަޕްގައި ކުޅެފައެވެ. އެއީ އެ ޓީމު ފުރަތަމަ ފަހަރަށް ވޯލްޑް ކަޕަށް ކޮލިފައިވި 2006 ވަނަ އަހަރާއި 2010 ވަނަ އަހަރުގެ އިތުރުން 2014 ވަނަ އަހަރުއެވެ. ޑިޑިއޭ ޑޮރޯގްބާއަށް ފަހު އައިވަރީ ކޯސްޓުގެ ކެޕްޓަންކަމާއި ޓޫރޭ ހަވާލުވެފައި ވަނީ 2014 ވަނަ އަހަރެވެ. ގައުމީ ޓީމަށް ކުޅުން އޭނާ ހުއްޓާލީ 2016 ވަނަ އަހަރުގެ ސެޕްޓަމްބަރު މަހުގެ 20 ވަނަ ދުވަހުއެވެ. އައިވަރީ ކޯސްޓުގެ ގައުމީ ޓީމަށް އޭނާ ވަނީ 20 ގޯލް ކާމިޔާބު ކޮށްދީފައެވެ.

ޓޫރޭގެ ފުޓްބޯޅަ ކެރިއަރުގައި އެންމެ ގިނަ ދުވަސް ހޭދަކޮށްފައި ވަނީ މެންޗެސްޓަރ ސިޓީގައެވެ. އެ ކްލަބުގައި ހޭދަކުރި ނުވަ އަހަރުގެ ތެރޭގައި ޓޫރޭ ވަނީ އެ ކްލަބަށް ތިން ޕްރިމިއާ ލީގާއި އެފްއޭ ކަޕާއި ދެ ލީގުގެ އިތުރުން އެއް ކޮމިއުނިޓީ ޝީލްޑް ހޯދައިދީފައެވެ.