ކުރީގެ ރައީސް މައުމޫން އަބްދުލްޤައްޔޫމް އުފައްދަވާފައިވާ، މޯލްޑިވްސް ރިފޯމް މޫވްމަންޓް (އެމްއާރްއެމް) ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރުމަށް އިލެކްޝަންސް ކޮމިޝަން (އީސީ)އިން ނިންމައިފި އެވެ.

އިލެކްޝަންސް ކޮމިޝަނުން ބުދަ ދުވަހު ކުރި ޓްވީޓެއްގައި ބުނެފައިވަނީ، އެމްއާރްއެމް ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރުމަށް އެކޮމިޝަނުން ނިންމާފައިވާ ކަމަށެވެ. އަދި ރަޖިސްޓްރީ ސެޓްފިކެޓް ޙަވާލު ކުރުން ނޮވެމްބަރު 25 ގައި ބާއްވަން ނިންމާފައިވާ ކަމަށެވެ.

އެމްއާރުއެމަކީ ރައީސް މައުމޫން އިސްވެ ހުންނަވާ އުފެއްދެވި ތިން ވަނަ ސިޔާސީ ޕާޓީ އެވެ. އެގޮތުން އެންމެ ފުރަތަމަ އުފައްދަވާފައިވަނީ، ދިވެހި ރައްޔިތުންގެ ޕާޓީ (ޑީއާރުޕީ) އެވެ. ނަމަވެސް 2008 ވަނަ އަހަރުގެ ރިޔާސީ އިންތިހާބު ނާކާމިޔާބުވެ ވަޑައިގެންނެވުމާއި، ޕާޓީގެ ތެރޭގައި ޚިޔާލު ތަފާތުވުންތައް އުފެދި، ޑީއާރުޕީގެ ތެރޭގައި "ޒެޑް ފެކްޝަން"އެއް އުފެދި، އެންމެފަހުން، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެފެއްދެވި އެވެ.

ޕީޕީއެމް އުފެދުމާއެކު، ޑީއާރުޕީގައި އިސްކޮށް އުޅުއްވި ގިނަ ބޭފުޅުންނާއި ކުރީގެ ރައީސް އަބްދުﷲ ޔާމީން އުފެއްދެވި ޕީޕަލްސް އެލަޔަންސް (ޕީއޭ)ގައި އިސްކޮށް އުޅުއްވި ގިނަ ބޭފުޅުން ޕީޕީއެމާ ގުޅި، ޕީޕީއެމް ސިޔާސީ ގޮތުން ވަރުގަދަ ކޮށްފައި ވެއެވެ. އެގޮތުން 2013 ވަނަ އަހަރުގެ ރިޔާސީ އިންތިޚާބުގައި ރައީސް ޔާމީން ރިޔާސީ ކެންޑިޑޭޓަކަށް ނިކުންނަވާ، އިންތިހާބު ކާމިޔާބު ކުރެއްވިއިރު، ވެރިކަމަށް އަހަރެއް ނުވަނީސް، ޕީޕީއެމްގެ ރައީސް، ރައީސް މައުމޫނާއި، ރައީސް ޔާމީނާއި ދެބޭފުޅުންގެ މެދުގައި މައްސަލަތައް އުފެދެން ފެށިއެވެ. އެންމެފަހުން ރައީސް މައުމޫން ޕީޕީއެމުން ވަކި ކުރެއްވީ އެވެ.

ކުރީގެ ރައީސް މައުމޫން އަބްދުލް ޤައްޔޫމް އިސްނަންގަވައިގެން އުފެއްދެވި އެމްއާރްއެމްގެ އިންތިޤާލީ ރައީސަކީ ވެސް ރައީސް މައުމޫނެވެ. އެމްއާރްއެމް އުފެއްދުމަށް ބޭއްވި ޖަލްސާގައި ވަނީ ޕާޓީގެ ނަމާއި, ލޯގޯ އަދި އަސާސީ ގަވާއިދު ފާސްކޮށްފަ އެވެ. ޕާޓީގެ ނަމެއްގެ ގޮތުގައި ''ދިވެހި އިސްލާހީ ހަރަކާތް'' ވަނީ ހުރިހާ މެމްބަރުންގެ ޢަޣުލަބިއްޔަތުން ފާސްވެފަ އެވެ.

އެމްއާރުއެމް އުފެއްދުމަށް ބޭއްވި ޖަލްސާ ބާއްވާފައިވަނީ މިމަހުގެ 7 ވަނަ ދުވަހުގެ ރެ އެވެ.