ސެލްވޭޖް ކުންފުންޏެއް އުފެއްދުމަށް ގޮވާލާ ގަރާރެއް ހުށަހަޅައިފި
20 ނޮވެމްބަރު 2019 | ބުދަ 07:38އުޅަނދުފަހަރު ފަރަށް އެރުމަކީ އާންމުކޮށް ދިމާވާ ކަމެއްކަމަށް ނާޒިމް ވިދާޅުވި
ދަނގެތި ދާއިރާގެ މެމްބަރު މުހައްމަދު ނާޒިމް
ފަރަށް އަރާ އުޅަނދު ފުންކުރުމުގައި އަމަލީގޮތުން މަސައްކަތްކޮށްދޭނެ ދައުލަތުގެ އިދާރާއެއް ނެތުމުން އުފެދޭ ތަކުލީފުތައް، ސަރުކާރުގެ ސަމާލުކަމަށް ގެނައުމަށާއި އެފަދަ އިދާރާއެއް ދައުލަތުގެ އިދާރާތަކުގެ ތެރޭގައި ހުރުމުގެ މުހިންމުކަން ފާހަގަކޮށް ރައްޔިތުންގެ މަޖިލީހަށް ގަރާރެއް ހުށަހަޅާ ބަހުސް ފައްޓަވައިފި އެވެ.
ބުދަ ދުވަހުގެ ޖަލްސާއަށް މި ގަރާރު ހުށަހެޅުއްވީ ދަނގެތި ދާއިރާގެ މެމްބަރު މުހައްމަދު ނާޒިމެވެ. ގަރާރު ހުށަހަޅުއްވަމުން ނާޒިމް ވިދާޅުވީ މަސްދޯނިފަހަރާއި، މީހުންނާއި މުދާއުފުލާ އުޅަނދުފަހަރާއި، ޓޫރިސްޓުން އުފުލާ އުޅަނދުފަހަރާއި، އޮޔާދާ އުޅަނދުފަހަރާއި، ބޭރު ދަތުރުކުރާ އުޅަނދުފަހަރު ފަރަށް އެރުމަކީ، ކަނޑުދަތުރުގެ މައްޗަށް ބަރޯސާވެފައިވާ ރާއްޖޭގައި އާންމުކޮށް ދިމާވާ ކަމެއްކަމަށެވެ. އަދި މިފަދަ ހާދިސާއެއް ދިމާވުމުން، އެ އުޅަނދެއްގެ ވެރިފަރާތަށް އެތައް ބުރައެއް އުފުލަންޖެހޭކަމަށް ގަރާރު ހުށަހަޅުއްވަމުން ނާޒިމް ވިދާޅުވި އެވެ.
އުޅަނދުގެ ވެރިފަރާތަށް އުފަލަންޖެހޭ ތަކުލީފުތަކުގެ ތަފްސީލު ދެއްވަމުން ނާޒިމް ވިދާޅުވީ އެ އުޅަނދެއް ފުންކޮށްދޭނެ ފަރާތެއް ވޭތޯ ބަލަންޖެހޭކަމަށާއި އެ ހާދިސާގައި ތާށިވެފައިވާ އުޅަނދު ފުންކުރުމުގެ މަސައްކަތްކޮށްދޭނެ ފަރާތެއް ހޯދައި އެކަން ކުރުމަށް ބޭނުންވާ ތަކެއްޗާއި ވަސީލަތް އެއްތަން ކޮށްދިނުމަކީވެސް ވެރިފަރާތުން ކުރަންޖެހޭ ކަމެއް ކަމަށެވެ.
މީގެއިތުރުން ތަކެތި ހޯދުމަށާއި އެކަންކޮށްދޭ މީހުންނަށް ވަގުތުން އަގުއަދާ ކުރަންޖެހޭއިރު އެ އުޅަނދު ފަރަށްއެރުމުން ދިމާވި ގެއްލުމުގެ ޝިކާރައަކަށްވެ، އެހާތަނަށް ލިބެމުން އައި އާމްދަނީ ހުއްޓަމަކަށް އައިސް އެއާމްދަނީ ވެރިފަރާތަށް ނުލިބޭގޮތްވާކަމަށް ނާޒިމް ވިދާޅުވި އެވެ. އަދި އެ އާމްދަނީގެ މައްޗަށް ބިނާވެފައިވާ އެތައް އާއިލާއެއްގެ ދިރިއުޅުމާއި އެ އާމްދަނީއަށް ބަރޯސާވެ ކުރަމުން އައި އެންމެހައި ކަމަކަށް ކުއްލި ނިމުމެއް އަންނަ ކަމަށް ނާޒިމް ވިދާޅުވި އެވެ.
ނާޒިމް ވިދާޅުވީ ފަރަށް އަރާ ދޯންޏެއް ފުންކުރުމުގެ މަސައްކަތްކުރުމަކީ ރާއްޖޭގައި ޚަރަދު ބޮޑު އަދި ކޮންމެ ކޮންމެ މީހަކަށް ކުރެވޭ ޒާތުގެ މަސައްތަކަށް ނުވާކަމަށެވެ. އަދި އެކަމަކީ ފުލުހުންނާއި ސިފައިންގެ ތެރޭގައިވެސް ފޯރުކޮށްދެވޭނެ މާބޮޑު އެހީތެރިކަމެއް ނޯންނާތީ ހުރިހާ ކަމެއް ކުރަންޖެހެނީ އަމިއްލައަށް ކަމަށެވެ.
އެހެންކަމުން މިފަދަ ހާލަތްތަކުގައި، އުޅަނދުފަހަރު ފުންކުރުމަށް ކުރަންޖެހޭ މަސައްކަތްތައް އަމަލީގޮތުން ކުރުމަކީ ދައުލަތުގެ އިދާރާއެއް މެދުވެރިވެގެން ނުވަތަ ދައުލަތުގެ ކުންފުންޏެއް މެދުވެރިކޮށްނަމަވެސް ކުރެވޭނެކަމެއްގެ ގޮތުގައި އޮތުމަކީ ބޭނުންތެރިކަމެއްކަމަށް ފެންނަކަމަށް ނާޒިމް ވިދާޅުވި އެވެ.
އެހެންކަމުން ފަރަށް އަރާ އުޅަނދުފަހަރު ފުންކުރުމުގެ އަމަލީ މަސައްކަތްތައް ކުރާނެ ދައުލަތުގެ އިދާރާއެއް ހަމަޖެހި، އެ އިދާރާއިން އެކަމުގެ އުސޫލުތަކާއި ނިޒާމުތައް ގާއިމުކުރުމުގެ ބޭނުންތެރިކަމާއި މުހިންމުކަން ގަބޫލުކޮށް އެކަން ސަރުކާރުގެ ސަމާލުކަމަށް ގެނައުމަށާއި މި މައްސަލައަށް ހައްލެއް ހޯއްދެވުމަށް މަސައްކަތްކޮށްދެއްވުމަށް ސަރުކާރަށް ރައްޔިތުންގެ މަޖިލީހުން ގޮވާލާ މި ގަރާރު ހުށަހަޅުއްވާކަމަށް ނާޒިމް ވިދާޅުވި އެވެ.
