އަޝްފާގަށް 90 މިނެޓު ކުޅެން ފުރުސަތުދިނީ އޭނާގެ ތަޖުރިބާ މުހިންމުވީމަ: ސެގާޓް
19 ނޮވެމްބަރު 2019 | އަންގާރަ 14:30ސެގާޓް ވަނީ އަޝްފާގަށް ވަރަށް ބޮޑަށް ތައުރީފު ކޮށްފައި
ގުއާމް އަދި ރާއްޖެ ވާދަކުރި މެޗުގެ ތެރެއިން
އަލީ އަޝްފާގް ދަނގަޑޭއަށް 90 މިނެޓު ކުޅުމަށް ފުރުސަތު ދިނީ އޭނާގެ ތަޖުރިބާގެ ބޭނުން ހިފަން ކަމަށް ގައުމީ ޓީމުގެ ކޯޗު ޕީޓާ ސެގާޓް ބުނެފިއެވެ.
ވޯލްޑްކަޕް ކޮލިފިކޭޝަން އަދި އޭއެފްސީ އޭޝިއަން ކަޕް ޖޮއިންޓް ކޮލިފިކޭޝަންގައި ގުއާމް އަތުން 1-3 ގެ ނަތީޖާއިން ރާއްޖެ މޮޅުވި މެޗަށްފަހު ނޫސްވެރިންނާ ވާހަކަދައްކަމުން ސެގާޓް ބުނީ އަޝްފާގަށް ފުރަތަމަ ހަފު ލިބުނު ފުރުސަތު ބޭކާރުވި ނަމަވެސް އޭނާ އަށް 90 މިނެޓު ކުޅުމަށް ފުރުސަތު ދޭން ބޭނުންވި ކަމަށާއި، ފުޓުބޯޅައިގައި އެކަހަލަ ފުރުސަތު ބޭކާރުވުން އެއީ ވާ ކަމެއް ކަމަށެވެ.
އެގޮތުން ސެގާޓް ބުނީ އަޝްފާގަށް 90 މިނެޓު ކުޅުމުގެ ފުރުސަތު ދޭން ބޭނުންވި މައިގަނޑު ސަބަބަކީ އޭނާގެ ތަޖުރިބާ މިކަހަލަ މުހިންމު މެޗުތަކުގައި ޒުވާން ކުޅުންތެރިންނަށް ބޭނުން ވާނެތީ އާއި އޭނާ އަކީ ލިބޭ ފުރުސަތުގެ ބޭނުން ހިފާ ކުޅުންތެރިއަކަށް ވުމުން ކަމަށެވެ. އަދި މެޗުގެ އިތުރު ވަގުތުގައި އަޝްފާގް ލަނޑު ޖަހާ މެޗުން ފޭބީ އެންމެން ހެއްވާލުމަށްފަހު ކަމަށްވެސް ސެގާޓް ބުނިއެވެ.
މިގޮތަށް ސެގާޓް އަޝްފާގަށް ތައުރީފު ކުރިއިރު، ގައުމީ ޓީމުގެ ސްކޮޑުން އަޝްފާގު ބޭރުކޮށްފައި ހުރި ދުވަސްވަރު ސެގާޓް އައީ މީޑިއާގައި އެކިފަހަރު އެކި ގޮތްގޮތަށް ވާހަކަ ދައްކަމުންނެވެ. އެގޮތުން ސެގާޓް ބުނަމުން އައީ އަޝްފާގަކީ އުމުރުން ދޮށީ ކުޅުންތެރިއެއް ކަމަށާއި، ވޯލްޑްކަޕް އޮންނައިރު އޭނާގެ އުމުރު 37 އަށް ވުރެ މަތިވާނެ ކަމަށެވެ.
ގުއާމް މެޗުގައި އަޝްފާގް ވަނީ މޮޅު ކުޅުމެއް ދައްކައިފައެވެ. އެގޮތުން ރާއްޖެ ޓީމުން ކާމިޔާބުކުރި ފުރަތަމަ ލަނޑު ޖެހުމަށް ފުރުސަތު ތަނަވަސް ކޮށްދިނުމުގެ އިތުރުން މެޗުގައި ރާއްޖެއިން ޖެހި ތިންވަނަ ލަނޑު ކާމިޔާބުކޮށްދީފައި ވަނީ އަޝްފާގެވެ.
ވޯލްޑްކަޕް ކޮލިފިކޭޝަނުގައި ރާއްޖެ ހިމެނޭ ގްރޫޕްގައި ހިމެނެނީ ރާއްޖޭގެ އިތުރުން ސީރިއާ، ޗައިނާ، ފިލިޕީންސް އަދި ގުއާމެވެ.
