ފަންޑު ލިބިފައިހުރި ސަރަހައްދުތަކުގައި ސޯލަރ ޕީވީ ސިސްޓަމް ޤާއިމު ކުރުމަށް ވަރަށް އަވަހަށް އިއުލާނުކުރާނަން: މިނިސްޓަރ
ހަކަތަ އުފައްދާއިރުވެސް ވެއްޓަށް ސަމާލުކަން ދޭނެ ކަމަށް މިނިސްޓަރ ވިދާޅުވި
\"ރާއްޖެޓީވީ\"ގެ ފަލަސުރުހީ ޕްރޮގްރާމްގައި އެންވަޔަރމަންޓް މިނިސްޓަރ ޑރ.ހުސެއިން ރަޝީދް ހަސަން ބައިވެރިވެވަޑައިގަންނަވަނީ
ތެލަށް ބަރޯސާވާ މިންވަރު ކުޑަކުރުމަށްޓަކައި ފައިސާ ލިބިފައި ހުރި ސަރަހައްދުތަކުގައި ސޯލަރ ޕީވީ ސިސްޓަމް ޤާއިމު ކުރުމަށް ވަރަށް އަވަހަށް އިއުލާނުކުރައްވާނެ ކަމަށް އެންވަޔަރަންމަންޓް މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
ހޯމަ ދުވަހުގެރޭ ރާއްޖެޓީވީގެ "ފަލަސުރުޚީ" ޕްރޮގުރާމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ ވިހަ ގޭހުގެ އަސަރު ކުޑަ ކުރުމުގެ އިތުރުން، އިޤްތިސާދަށްޓަކައިވެސް ތެލަށް ބަރޯސާވާ މިންވަރު ކުޑަކުރަންޖެހޭ ކަމަށާއި، އެކަމަށްޓަކައި މިހާރު ފަންޑު ލިބިފައި ހުރި ސަރަހައްދުތަކުގައި ސޯލަރ ޕީވީ ސިސްޓަމް ޤާއިމު ކުރުމަށް ވަރަށް އަވަހަށް އިޢުލާނު ކުރައްވާނެ ކަމަށެވެ.
އެގޮތުން މުޅި ރާއްޖެއަށް ބޭނުންވާ ހަކަތައިގެ 70 އިންސައްތަ އިއާދަކުރަނިވި ހަކަތައަށް ބަދަލުކުރުމަށް ވިސްނާފައިވާއިރު، އެކަމަށްޓަކައި އިތުރު އިންވެސްޓްމަންޓްތައް ބޭނުންވާކަމަށްވެސް މިނިސްޓަރ ވިދާޅުވިއެވެ.
އޭގެ އިތުރުން، ދައުލަތުގެ ބަޖެޓުން ޑީސަލަށް ބޮޑު ޚަރަދެއް ކުރަންޖެހޭކަން ފާހަގަކުރައްވައި މިނިސްޓަރ ވިދާޅުވީ، މުޅި ރާއްޖޭގައި ބޭނުންކުރާ ހަކަތައަށް ބަލާއިރު އެންމެ މައްޗަށް ބޭނުންކުރަނީ 280 މެގަވޮޓް ކަމަށާއި، އޭގެ ތެރެއިން އިއާދަކުރަނިވި ހަކަތައިން ފޯރުކޮށްދެމުން ގެންދިޔައީ އެންމެ 6 އިންސައްތަ ކަމަށެވެ. އަދި ހަކަތައިގެ ބޮޑު ބައެއް ބޭނުން ކުރަނީ ޑީސަލް އަންދައިގެންކަން މިނިސްޓަރ ފާހަގަކުރެއްވިއެވެ.
އިއާދަ ކުރަނިވި ހަކަތައިން ކަރަންޓު އުފެއްދުމަށް މިނިސްޓްރީން މިހާރުވެސް ދެ މަޝްރޫއެއް ހިންގަމުންދާއިރު، މިނިސްޓަރ ވިދާޅުވީ، އަވިން ހަކަތަ އުފެއްދޭ މިންވަރު ވީހާވެސް އިތުރު ކުރުމަށް މިނިސްޓްރީން މަސައްކަތް ކުރާނެ ކަމަށެވެ.
މިނިސްޓަރ އިތުރަށް ވިދާޅުވީ، ތިމާވެށީގެ ދިރުންތައް ހިމާޔަތްކޮށް، ރާއްޖޭގެ ޖަޒީރާވަންތަކަން ދެމެހެއްޓުމަކީ މިނިސްޓްރީގެ އެންމެ ބޮޑު އަމާޒު ކަމަށާއި، އެކަން ކަށަވަރު ކުރުމަކީ މިނިސްޓްރީގެ އަމާޒެއް ކަމަށެވެ. އެގޮތުން ހަކަތަ އުފެއްދުމާއި، ޤުދުރަތީ ވަސީލަތްތައް ބޭނުން ކުރުމުގައިވެސް ވެއްޓަށް ވީހާވެސް ގެއްލުން ނުވާގޮތް ހެދުމަށް އިސްކަންދެއްވާނެ ކަމަށް މިނިސްޓަރ ވިދާޅުވިއެވެ.
