މިއަދުން މިއަދަށް ކެބިނެޓުން އިސްލާމިކް މިނިސްޓްރީ "އޮފްލޯޑް ކުރޭ"، ހަމަ މިހާރު އުވާލާ: ޖާބިރު
19 ނޮވެމްބަރު 2019 | އަންގާރަ 06:55ޖަމިއްޔާތަކުން ކަންތައްތަށް ކުރަމުން ދަނީ ވަރަށް ބިރުވެރި ގޮތަކަށް
ކާށިދޫ ދާއިރާގެ މެމްބަރު އަބްދުﷲ ޖާބިރު، ރައީސް އިބްރާހިމް މުހައްމަދު ސޯލިހާއި ސަލާމްކުރައްވަނީ
ސަރުކާރުގެ ވުޒާރާތަކުގެ ތެރޭގައި މިނިސްޓްރީ އޮފް އިސްލާމިކް އެފެއާރޒް ހިމެނެން ނުޖެހޭ ކަމަށާއި މިއަދުން މިއަދަށް ކެބިނެޓުން އިސްލާމިކް މިނިސްޓްރީ އުވާލަންޖެހޭކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
19 ވަނަ ރައްޔިތުންގެ މަޖިލީހުގެ 68 ވަނަ ޖަލްސާގައި ޖަމިއްޔާތަކުގެ ބިލުގެ އިބްތާދާއީ ބަހުސްގައި ވާހަކަދައްކަވަމުން ޖަމިއްޔާތަށް ރެގިއުލޭޓްކުރުމަށް ހުށަހެޅުއްވީތީ ޝުކުރު އަދާކުރައްވާކަމަށް ވިދާޅުވެ މެމްބަރު ޖާބިރު ވިދާޅުވީ، ޖަމިއްޔާތަކުން ކަންތައްތަށް ކުރަމުން ދަނީ ވަރަށް ބިރުވެރި ގޮތަކަށް ކަަމަށާއި ވަގުތުން ވަގުތަށް ރާއްޖޭގައި ހަރަކާތްތެރިވާ ދީނީ ޖަމިއްޔާ ސަލަފާއި, އިސްލާމިކް މިނިސްޓްރީ އުވާލަންޖެހޭކަމަށެވެ.
އިސްލާމީ އެހެން ގައުމުތަކުގައިވެސް އިސްލާމިކް މިނިސްޓްރީއެއް ހާއްސަކޮށްފައި ނޯންނަކަން ފާހަގަކޮށް މެމްބަރު ޖާބިރު ވަނީ މިއަދުން މިއަދަށް އިސްލާމިކް މިނިސްޓްރީ އުވާލުމަށް ތަކުރާރުކޮށް ގޮވާލައްވާފައެވެ. ޖާބިރު ވިދާޅުވީ ކީރިތި ގުރުއާނުން އިސްލާމް ދީން ވަރަށް ސާފުކޮށް ދައްކާފައިވާކަމަށާއި ގާނޫނު އަސާސީގައި ވަރަށް ރަނގަޅަށް ލިޔެވިިފައިވާކަމަށެވެ. ޖާބިރު ވިދާޅުވީ ރާއްޖޭގެ ރައްޔިތުންނަކަށް އިސްލާމިކް މިނިސްޓަރެއް ދީނުގެ މަގު ދެއްކުމަށް ބޭނުން ނުވާކަމަށެވެ.
ޖާބިރު ވިދާޅުވީ އިސްލާމްދީނޭ ކިޔާއިގެން ދައްކާ ދެކޮޅުނުޖެހޭ ވާހަކަތައް އެއްވެސް ވަރަކަށް ގަބޫލުނުކުރައްވާކަމަށާއި، ގާނޫނު އަސާސީގައި ވަރަށް ސާފު ސަރީހާ އިބާރާތުން ދިވެހިރާއްޖޭގައި އޮންނަން ވާނީ އިސްލާމްދީންކަމަށް ބަޔާންކޮށްފައިވާކަމަށެވެ. އަދި ރާއްޖޭގައި ތިބެންވާނީ ސުންނީ މުސްލިމުންކަމަށް ގާނޫނޫގައި ލާޒިމްކޮށްފައިވާނެކަމަށް ޖާބިރު ވަނީ ފާހަގަކުރައްވާފައެވެ.
ޖާބިރު ވިދާޅުވީ ދިވެހިން އަމަލުކުރަމުންދާ ފެހި ގާނޫނު އަސާސީގައި އެއްވެސް ޖަމާއަތާކާއި މިނިސްޓްރީއަކާއި އިސްލާމްދީން ހަވާލުކޮށްފައި ނޯންނާނެކަމަށެވެ. އަދި އެބަޔަކު ހިމެނޭ ދާއިރާއެއްގެ ވާހަކަ ދެއްކުމަށް ނަސޭހަތްތެރިވަމުން ޖާބިރު ވިދާޅުވީ، ސިޔާސީ ކޮށްގެން ދީނީ ވާހަކަ ދައްކައި ނާޖާއިޒު ފައިދާ ނަގައި ރައްޔިތުން ބިރުވެރިކަމަށް ވެއްޓުމަށް މަސައްކަތްކުރުމުގެ އިތުރުން ރާއްްޖޭގެ ސުލްހަމަސްލަސްކަން ނަގާލުމަށް މަސައްކަތްކުރަމުންދާ މަންޒަރު ފެންނަނަކަމަށެވެ.
ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ "ދިވެހި ރާއްޖޭގެ ސިފައިންނަށް" ވަގުތުން ނިކުމެ ދީނީ ހިޔާލުތަފާތުވުން އުފައްދަން މަސައްކަތްކުރާ ފަރާތްތަކާއި އެފަދަ ޖަމާއަތްތައް އުވާލުމަށް ގޮވާލާފައެވެ. ޖާބިރު ވަނީ ރާއްޖޭގެ އިސްތިގްލާލާއި މިނިވަންކަން ނަގާލުމަށްޓަކައި މަސައްކަތް ކުރަމުންދާ ޓެރަރިސްޓް ޖަމާއަތްތައް އުވާލުމަށް ތަކުރާރުކޮށް ގޮވާލައްވާފައެވެ.
