ޔޫރޯ ކޮލިފިކޭޝަނުގައި ސްޕެއިން އަށް ފަސޭހަ މޮޅެއް

ޔޫރޯ ކޮލިފިކޭޝަނުގެ ގްރޫޕް އެފްގައި ސްޕެއިން އަދި މަލްޓާ ވާދަކުރި މެޗު ފަސޭހަކަމާއެކު ސްޕެއިނުން ކާމިޔާބުކުރީ 7-0 ގެ ނަތީޖާ އަކުންނެވެ.

މެޗު ފަށައިގެން ސްޕެއިންއިނުން ވަނީ މަލްޓާގެ ގޯލަށް ގިނަ ހަމަލާތަކެއް ފޮނުވާ މަލްޓާގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 23 ވަނަ މިނެޓުގައި ސްޕެއިނުން ވަނީ ލަނޑު ޖަހާ މެޗުގެ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ މޮރާޓާއެވެ.

މޮރާޓާގެ ލަނޑަށްފަހު ވެސް ސްޕެއިނުން ނުރައްކާތެރި ހަމަލާތަކެއް މަލްޓާގެ ގޯލަށް ފޮނުވައިލިއިރު މެޗުގެ 41 ވަނަ މިނެޓުގައި ސްޕެއިނުން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ސަންތި ކަސޮރްލާއެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާ އަކުން ސްޕެއިން ކުރީގައި އޮވެގެންނެވެ.

މެޗުގެ ދެވަނަ ހާފު ފަށައިގެން ސްޕެއިނުން އެޓީމުގެ އެޓޭކްތައް ވަރުގަދަ ކުރިއެވެ. އެގޮތުން މެޗުގެ 62 ވަނަ މިނެޓުގައި ޕައު ޓޮރޭޒް ވަނީ ސްޕެއިންއަށް ލަނޑު ޖަހައިދީފައެވެ. އަދި މެޗުގެ 63 ވަނަ މިނެޓުގައި ޕަބްލޯ ވަނީ ލަނޑު ޖަހާ ސްޕެއިންގެ ލީޑު އިތުރަށް ފުޅާ ކޮށްދީފައެވެ.

ސްޕެއިނުން ޖެހި ފަސްވަނަ ލަނޑު މެޗުގެ 69 ވަނަ މިނެޓުގައި ޑެނީ އެޓީމަށް ކާމިޔާބުކޮށްދިން އިރު ހަވަނަ ލަނޑު މެޗުގެ 71 ވަނަ މިނެޓުގައި އެޓީމަށް ކާމިޔާބުކޮށްދިނީ ޖެރާޑްއެވެ. އަދި މެޗުގައި ސްޕެއިން އިން ޖެހި ފަހު ލަނޑު މެޗުގެ 85 ވަނަ މިނެޓުގައި އެޓީމަށް ކާމިޔާބުކޮށްދީފައި ވަނީ ނަވާސް އެވެ.

މިނަތީޖާ އާއިއެކު ސްޕެއިން އިން ގްރޫޕް އެފްގެ އެއްވަނައިގައި އޮތީ 23 ޕޮއިންޓާއެކުގައެވެ. ދެވަނައިގައި އޮތް ސްވިޑެން އަށް 18 ޕޮއިންޓް ލިބިފައިވާއިރު ތިންވަނައިގައި އޮތް ރޮމޭނިއާ އަށް ލިބިފައިވަނީ 14 ޕޮއިންޓެވެ.