ޑީއާރުޕީގެ ނާއިބު ލީޑަރު ކަމަށް ޖާބިރުގެ ކޮއްކޮ ޝިހާމު އައްޔަން ކޮށްފި
ސެކްރެޓަރީ ޖެނެރަލް ކަމަށް އަބްދުﷲ އަފީފު
ޑީއާރުޕީ ނައިބު ލީޑަރު އިބްރާހީމް ޝިހާމް
ދިވެހި ރައްޔިތުންގެ ޕާޓީ (ޑީއާރުޕީ)ގެ އައު ނާއިބު ލީޑަރުގެ ކަމުގެ މަގާމަށް އެޕާޓީގެ ލީޑަރު، އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ކޮއްކޮ އިބްރާހީމް ޝިހާމް އައްޔަން ކޮށްފި އެވެ.
ޑީއާރުޕީން ބުނީ މިދިއަ ހަފްތާގައި އެޕާޓީގެ ކައުންސިލް ބައްދަލުވުމުގައި ޑީއާރުޕީގެ ނާއިބު ލީޑަރު ކަމަށް ޝިހާމު އައްޔަން ކުރައްވާފައި ވާއިރު، އެޕާޓީގެ ސެކްރެޓަރީ ޖެނެރަލްގެ މަގާމަށް ގއ. ކޮލަމާފުށި އޯޝަންރީޑް، އަބްދުﷲ އަފީފު އައްޔަން ކުރައްވާފައިވާ ކަމަށެވެ.
އެދެ މަގާމަށް ބޭފުޅުން އައްޔަން ކުރައްވާފައި މިވަނީ އެޕާޓީގެ ނާއިބު ލީޑަރުގެ މަގާމުގައި ހުންނެވި މުހައްމަދު ނަޝީދު (ކާނަލް) އާއި ސެކްރެޓަރީ ޖެނަރަލްގެ މަގާމުގައި ހުންނެވި ނަހުލާ އަލީ މިދިއަ ހަފްތާގައި އިދިކޮޅު ޕީޕީއެމާ ގުޅިވަޑައިގެންނެވުމުން ނެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރުކަމަށް ޖާބިރު އިންތިހާބުވުމާއެކު، ޖާބިރު ވަނީ މިދިއަ ޖުލައި މަހުގެ 23 ވަނަ ދުވަހުން ފެށިގެން ޑީއާރުޕީގެ ލީޑަރުގެ މަގާމަށް ވަޑައިގެން، ޑީއާރުޕީއަކީ ހަރުދަނާ އަދި ހަރަކާތްތެރި ޕާޓީއަކަށް ހެދުމުގެ މަސައްކަތް ކުރައްވަމުން ނެވެ.
އެގޮތުން އެޕާޓީއަށް އިތުރު 10،000 މެންބަރުން ހަމަކުރުމުގެ މަސައްކަތް ފައްޓަވާފައިވާއިރު، ޑީއާރުޕީގެ ކޮންގްރެސްއެއް ބޭއްވުމަށް ވަނީ ނިންމަވާފަ އެވެ.
ޑީއާރުޕީގެ ކައުންސިލުން ވަނީ އަންނަ 2020 އަހަރުގެ ފެބްރުއަރީ މަހުގެ 27-29 އަށް އެޕާޓީގެ ކޮންގްރެސް ކާށިދޫ ދާއިރާގައި ބޭއްވުމަށް ނިންމާފަ އެވެ.
