ދަނޑުވެރި ނަފާ ލޯން ސްކީމުން މިހާތަނަށް ލޯނު ނެގީ ދެ ފަރާތަކުން: މިނިސްޓަރ

ދަނޑުވެރިންނަށް ޚާއްޞަކޮށްގެން އުފައްދާފައިވާ ނަފާ ލޯން ސްކީމުން ލޯން ނެގުމަށް މިހާތަނަށް އާއިރު އެދިފައިވަނީ ދެ ފަރާތަކުން ކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެ އެވެ.

ރާއްޖެ ޓީވީގެ "ފަލަ ސުރުޚީ"ގެ ޕްރޮގްރާމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ ދަނޑުވެރިކަން ކުރިއެރުވުމަށްޓަކައި ދަނޑުވެރިންނަށް މާލީ އެހީތެރިކަން ފޯރުކޮށްދިނުމަކީ މުހިންމު ކަމެއްކަމަށެވެ.

ދަނޑުވެރިންގެ ނަފާ ލޯން ސްކީމަކީ ސްމޯލް އެންޑް މީޑިއަމް އެންޓަޕްރައިޒަސް (އެސްއެމްއީ) ބޭންކު މެދުވެރިކޮށް ހިންގާ ލޯން ސްކީމެކެވެ. މިނިސްޓަރ ވިދާޅުވީ މި ސްކީމަށް 14 މިލިއަން ރުފިޔާ ކަނޑައަޅާފައިވާ ކަމަށެވެ.

މިނިސްޓަރ ވިދާޅުވީ މި ސްކީމްގެ ދަށުން ދަނޑުވެރިކަމާ ގުޅުންހުރި ތަފާތު އެކިއެކި މަސައްކަތްތައް ކުރުމަށް ލޯނު ދޫކުރެވޭނެ ކަމަށެވެ.

ދަނޑުވެރި ނަފާ ލޯނު ސްކީމުން ކޯޕަރޭޓް ނުވަތަ ކުންފުންޏަކަށްނަމަ ދެ މިލިއަން ރުފިޔާ އަދި އަމިއްލަ ފަރުދަކަށް ނަމަ ފަސް ލައްކަ ރުފިޔާ ދޫކުރުމަށް ވަނީ ހަމަޖެހިފަ އެވެ.