ބޭނުންވާ ފެންވަރުގެ މުވައްޒަފުން ކައުންސިލްތަކަށް ނުލިބޭ: ސިވިލް ސަރވިސް ކޮމިޝަން
15 ނޮވެމްބަރު 2019 | ހުކުރު 15:33ކޮންމެ ކައުންސިލަކަށް ވާނީ ފައިނޭންސްގެ ކަންކަމާއި ގުޅޭ މުވައްޒަފަކު ތަމްރީނުކޮށްފައި
ސިވިލް ސަރވިސް ކޮމިޝަންގެ މެމްބަރުން ބަޖެޓު ކޮމިޓީގައި
ލާމަރުކަޒީ ނިޒާމުގެ ދަށުން ކައުންސިލްތަކަށް ބޭނުންވާ މުވައްޒަފުން ހޯދުމުގައި ގިނަ ދަތިތަކާއި އުނދަގޫތަކާ ކުރިމަތިލާންޖެހޭ ކަމަށް ސިވިލް ސަރވިސް ކޮމިޝަނުން ހާމަކޮށްފިއެވެ.
ބުދަ ދުވަހު އޮތް ބަޖެޓު ކޮމިޓީގެ ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ސިވިލް ސަރވިސް ކޮމިޝަނުން ބުނީ، ގިނަ ފަހަރު ކައުންސިލްތަކަށް ބޭނުންވާ މުވައްޒަފުން ހޯދަން އިއުލާން ކުރުމުން އެކަށީގެންވާ ފެންވަރުގެ މުވައްޒަފުން ކުރިމަތިނުލުމަކީ އެންމެ ބޮޑު އެއް މައްސަލަ ކަމަށެވެ. އަދި ފެންވަރު ދަށްކޮށްފައި އިއުލާން ކުރުމުންވެސް ބައެއް ފަހަރު މުވައްޒަފުން ލިބުމުގައި ދަތިތަކާއި ކުރިމަތިލާން ޖެހިފައިވާ ކަމަށް ސިވިލް ސަރވިސް ކޮމިޝަނުން ބުނެފައިވެއެވެ.
2020 ވަނަ އަހަރުގެ ބަޖެޓުގައި، ކައުންސިލްތަކަށް ގިނަ އަދަދަކަށް ފައިސާ ކަނޑައަޅާފައި އޮތުމުން، އެތަންތަނުގައި އެ ފައިސާ ހަރަދުކުރާނެ ގޮތް ބެލެހެއްޓޭ ފެންވަރުގެ މުވައްޒަފުން އެބަ ތިބިތޯ ކޮމިޓީގައި ތިއްބެވި މެމްބަރުން ވަނީ ސުވާލު އުފައްދާފައެވެ. މި ސުވާލުތަކަށް ޖަވާބުދާރީ ވަމުން ސިވިލް ސަރވިސް ކޮމިޝަނުން ބުނެފައިވަނީ، ލިބިފައިވާ ބަޖެޓުގެ ތެރެއިން އަބަދުވެސް އެ ސަރވިސްގެ މުވައްޒަފުން ތަމްރީން ކުރަމުންގެންދާ ކަމަށާއި، އޭގެ ތެރޭގައި ކައުންސިލްތަކުގައި މަސައްކަތްކުރާ މުވައްޒަފުންވެސް ހިމެނޭ ކަމަށެވެ.
ސިވިލް ސަރވިސް ކޮމިޝަންގެ ޑިރެކްޓަރ ޖެނެރަލް އަބްދުﷲ ސައީދު ވިދާޅުވީ، ކައުންސިލްތައް އުފެދުމާއެކު ފައިސާގެ ކަންކަން ބެލެހެއްޓުމަށް އެކަކު ތަމްރީނު ކުރެވިފައި ވާނެކަމަށެވެ. އަދި އަންނަ އަހަރު މި ގެންނަ ބަދަލުތަކަށް ތައްޔާރުވުމުގެ ގޮތުން މިހާރުވެސް ތަމްރީނުތަކެއް ހިންގަމުން އަންނަ ކަމަށް އޭނާ ވިދާޅުވިއެވެ.
ތަމްރީނު ދިނުމުގެ އިތުރަށް ދެން ކުރެވޭނެ ކަމަކީ އިންސްޕެކްޓް ކުރުމަށް ދަތުރުތައް ކުރުން ކަމަށާއި، އެކަމަކީ ބޮޑެތި ހަރަދުތަކެއް ކުރަންޖެހޭ ކަމަކަށް ވުމާއެކު، ގިނަ އިންސްޕެކްޝަންތަކެއް ހިންގުމަށް ދަތިތަކާ ކުރިމަތިލާން ޖެހޭ ކަމަށް އެ ކޮމިޝަނުން ބުނެފައިވެއެވެ.
2020 ވަނަ އަހަރުގެ ބަޖެޓުގައި ސިވިލް ސަރވިސް ކޮމިޝަނަށް ވަނީ 26.5 މިލިއަން ރުފިޔާ ކަނޑައަޅާފައެވެ. ސިވިލް ސަރވިސް ކޮމިޝަނަކީ ދިވެހިރާއްޖޭގެ ސިވިލް ސަރވަންޓުންގެ ވަޒީފާއާއި މުސާރައިގެ ހުރިހާ ކަމެއް ބެލެހެއްޓުމުގެ ޒިންމާއާއެކު އުފައްދާފައިވާ ކޮމިޝަނެކެވެ.
