"ޕީޕަލް" މެގަޒިންއިން ކޮންމެ އަހަރަކު ހޮވާ "ސެކްސިއަސްޓް މޭން އަލައިވް" އަށް މި އަހަރު ހޮވިފައި ވަނީ މަޝްހޫރު ލަވަކިޔުންތެރިޔާ، ޖޯން ލެޖެންޑް އެވެ.

މި އަހަރުގެ "ސެކްސިއަސްޓް މޭން އަލައިވް" ބުދަ ދުވަހު އިއުލާންކޮށްފައިވާއިރު، 2018 ވަނަ އަހަރު މި ލަގަބު ލިބިފައިވަނީ އިނގިރޭސިވިލާތަށް ނިސްބަތްވާ އިޑްރިސް އެލްބާއަށެވެ.

މި އިއުލާނަށް ފަހު ޖޯން ވަނީ އަމިއްލާ މީހާއަށް ޖެއްސުންކޮށްފަ ޓްވީޓްކޮށްފައެވެ.

އެގޮތުން، އޭނާ ބުނީ އިޑްރިސްއަށްފަހު މި ލިގަބު ލިބުމަކީ "1995 ވަނަ އަހަރުގެ" ޖޯން ލެޖެންޑަށް ނުވިސްނޭނެކަމެއް ކަމަށެވެ. އަދި "2019 ވަނަ އަހަރުގެ" ޖޯންއަށް ވެސް މިކަން ނުވިސްނޭކަމަށް އޭނާ ބުންޏެވެ.

ޖޯންގެ އަންހެނުން، މޮޑެލް އަދި ސޯޝަލް މީޑިއާ ފަންނާނެއްކަމަށްވާ ކްރިސީ ޓީގަން ވެސް ދަނީ މިކަމަށް ޖޯކް ޖަހަމުންނެވެ.

ޖޯންއަށް މިހާތަނަށް 10 ގްރެމޯ އެވޯޑް ލިބިފައިވާއިރު، އޭނާއަށް އޮސްކާ އެވޯޑް ލިބިފައިވަނީ ފިލްމް "ސެލްމާ" އަށް އޭނާއާއި ކޮމަން ލިޔެފައިވާ "ގްލޯރީ" އަށެވެ. އަދި އޭނާ ކޯޕްރޮޑިއުސް ކުރި "ޖިޓްނީ" އަށް ޓޯނީ އެވޯޑް ލިބިފައިވާއިރު، އޭނާ އެމީއެއް ހާސިލްކޮށްފައިވަނީ ވެސް ޕްރޮޑިއުސަރެއްގެ ހައިސިއްޔަތުންނެވެ.

އޭނާއަކީ އީގޮޓް (އެމީ، ގްރެމީ، އޮސްކާ އަދި ޓޯނީ އެވޯޑް) ހާސިލް ކުރި އެންމެ ހަގު އެއް ފަރާތެވެ. ޖޯންގެ ކުރިން އީގޮޓް ހާސިލްކޮށްފައިވަނީ 14 ފަރާތަކަށެވެ.

ޖޯން އާއި ކްރިސީ 2013 ވަނަ އަހަރު ކައިވެނިކޮށްފައިވާއިރު، ކައިވެނިކުރަން އެންގޭޖްވެފައިވަނީ ދިވެހިރާއްޖެއަށް ކުރި ދަތުރެއްގައެވެ. އަދި ރާއްޖެއަކީ ވަރަށް ހާއްސަ ގައުމެއްކަން އެމީހުން ބުނެފައިވެއެވެ.

އެ ދެ މީހުންގެ ދެ ކުދިން ތިބެއެވެ. އެއީ ތިން އަހަރުގެ ލޫނާ ސިމޯން ސްޓެފަންސް އާއި އެއް އަހަރުގެ މައިލްސް ތޮއެޑޯ ސްޓެފަންސްއެވެ.