އެސެޓް ރިކަވަރީ ކޮމިޝަނުން ބަދަލުގެ ގޮތުގައި ހޯދާ އާމްދަނީ ބަޖެޓުގައި ނުހިމެނީ "ރިއަލިސްޓިކް" ބަޖެޓެއް ހުށަހަޅަން
13 ނޮވެމްބަރު 2019 | ބުދަ 08:36މިނިސްޓަރ ވިދާޅުވީ ބަދަލުގެ ގޮތުގައި ލިބޭ ރިވެނިއު ވެގެންދާނީ ލިބިގެންދާ ކުރިއެރުމަކަށް
ފިނޭންސް މިނިސްޓަރ އިބްރާހިމް އަމީރު
އެސެޓް ރިކަވަރީ ކޮމިޝަނުން ބަދަލުގެ ގޮތުގައި ހޯދާ އާމްދަނީ 2020 ވަަނަ އަަހަރުގެ ބަޖެޓުގައި ނުހިމެނީ " ރިއަލިސްޓިކް" ބަޖެޓެއް ހުށަހެޅުމަށް ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އަމީރު މިހެން ވިދާޅުވީ ރައްޔިތުންގެ މަޖިލީހުގެ ބުދަ ދުވަހުގެ ޖަލްސާއަށް ހާޒިރުވެ ހުރެއެވެ.
މިނިސްޓަރ ވިދާޅުވީ ފާއިތުވެ ދިޔަ އަހަރުތަކުގައި ދައުލަތުން ގެއްލިފައިވާ ފައިސާ ހޯދުމުގެ މަސައްކަތް އެސެޓް ރިކަވަރީ ކޮމިޝަނުން ކުރަމުންގެންދާ ކަމަށާއި އެ މަސައްކަތުގައި ބަދަލުގައި ލިބޭ އާމްދަނީގެ އަދަދު ބަޖެޓުގައި ނުހިމެނީ ވީހާވެސް "ރިއަލިސްޓިކް" ބަޖެޓެއް ހުށަހެޅުމުގެ ބޭނުމުގައި ކަމަށެވެ. އެގޮތުން ބަދަލުގެ ގޮތުގައި ލިބޭ ރިވެނިއު ވެގެންދާނީ ލިބިގެންދާ ކުރިއެރުމަށް ކަމަށް މިނިސްޓަރ ފާހަގަކުރެއްވިއެވެ.
މީގެ އިތުރުން މިނިސްޓަރ ވިދާޅުވީ ބަޖެޓު ހެދުމުގައި ބަލާފައިވަނީ ދައުލަތަށް ލިބޭ އާމްދަނީ ރައްކާކޮށް ނުވަތަ ކޮންވަޒޭޓިވް ގޮތަކަށް ބަޖެޓުގައި ދެއްކުމަށް ކަމަށެވެ.
އެސެޓް ރިކަވަރީ ކޮމިޝަނަކީ 1 ޖެނުއަރީ 2012 އިން ފެށިގެން 17 ނޮވެންބަރު 2018 ގެ ނިޔަލަށް ހިނގާފައިވާ ޚިޔާނާތާއި، ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރުމުގެ ގިނަ މައްސަލަތައް އެކިއެކި ސަބަބުތައް މެދުވެރި ވެގެން، އެކަށީގެންވާ މިންވަރަށް ތަހުގީގު ކުރެވި އިންސާފު ޤާއިމު ކުރެވިފައި ނުވާތީ އުފައްދާފައިވާ ކޮމިޝަނެކެވެ. "ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ" ގެ ރައީސް ކަމަށް ރައީސުލްޖުމްހޫރިއްޔާ ކަނޑައަޅުއްވާފައިވަނީ އަޙްމަދު އަސްޢަދެވެ. އެ ކޮމިޝަނަކީ، ކޮމިޝަނުން ތަޙުޤީޤުކުރެވޭ މައްސަލަތަކާ ގުޅިގެން ތަޙުޤީޤީ އިދާރާ އަކުން އަޅަންޖެހޭ އެންމެހައި ފިޔަވަޅުތަކެއް އެޅުމާއި، ޖިނާއީ މައްސަލަތައް ތަޙުޤީޤުކުރާ އިދާރާއަކަށް ލިބިދޭ އެންމެހައި ބާރުތަކެއް ލިބިގެންވާ ކޮމިޝަނެކެވެ.
