ނޯޑިކް ޞަރަޙައްދުގައި އެމްއެމްޕީއާރްސީގެ ރޯޑް ޝޯވ ފަށައިފި

މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ފަރާތުން ނޯޑިކް ޞަރަޙައްދުގައި ރޯޑް ޝޯވ ފަށައިފިއެވެ.

މި ޝޯވ ނޮވެމްބަރު 12 ވަނަ ދުވަހު ކޯޕަންހޭގަންގައި ކުރިޔަށްގެންގޮސްފައިވާއިރު،ބުދަ ދުވަހު އޮސްލޯގައި ރޯޑް ޝޯވގެ ޙަރަކާތްތައް ވަނީ ފަށާފައެވެ.މި ރޯޑްޝޯވ ނޮވެމްބަރު 15 ނިޔަލަށް ކުރިއަށް ގެންދިޔުމަށް ހަމަޖެހިފައިވާކަމަށް އެމްއެމްޕީއާރްސީން ބުނެއެވެ.

އެމްއެމްޕީއާރްސީ އިން އިތުރަށް ބުނީ 14 ނޮވެމްބަރުގައި ސްޓޮކްހޯމް އަދި 15 ނޮވެމްބަރުގައި ހެލްސިންކީގައި މި ރޯޑް ޝޯވ ކުރިއަށްގެންދާނެ ކަމަށެވެ. އެމްއެމްޕީއާރްސީއާއެކު ރާއްޖޭގެ ފަތުރުވެރިކަމުގެ ދާއިރާގައި ޙަރަކާތްތެރިވާ 13 ކުންފުންޏަކުން މިރޯޑް ޝޯވގައި ބައިވެރިއެވެ.

އެމްއެމްޕީއާރްސީން ބުނީ މިއީ، ރާއްޖޭގެ ފަތުރުވެރިކަމުގެ ސިނާޢަތުގައި ޙަރަކާތްތެރިވާ ފަރާތްތަކަށް ނޯޑިކްގެ އެންމެ ބޮޑެތި އައުޓްބައުންޑް ޓުއަރ އޮޕަރޭޓަރުންނާއި ބައްދަލުކޮށް ގުޅުން ބަދަހިކުރުމަށް ލިބިގެންދާ ރަނގަޅު ފުރުސަތެއް ކަމަށެވެ. އަދި އެ ސަރަހައްދުގައި ހިމެނޭ ގިނަ ޢަދަދެއްގެ މީޑިއާތަކުގައި މި ރޯޑް ޝޯވ ގެ މަޢުލޫމާތު ހިއްސާ ކުރެވިގެންދާނެ ކަމަށްވެސް އެމްއެމްޕީއާރްސީން ބުންޏެވެ.

ނޯޑިކް އަކީ ޔޫރަޕުގެ ޤައުމުތަކުން ތިން ވަނަ އަށް ފަތުރުވެރިން އެންމެ ގިނައިން ބޭރުވާ އެއް ޞަރަޙައްދެވެ. މި ރޯޑް ޝޯވ ގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އިތުރުވާނެ ކަމަށް ލަފާކުރެވޭ ކަމަށް އެމްއެމްޕީއާރްސީން ބުންޏެވެ.