ބްރޯޑްކޮމްއަށް ހުސްވެފައިވާ ދެ މަގާމަށް ކުރިމަތިލެއްވި ފަރާތްތަކުގެ ނަންތައް ކޮމެޓީއަށް

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގައި ހުސްވެފައިވާ ދެ މެމްބަރަކު ޢައްޔަނު ކުރުމަށް ރައިސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާ ކުރުމަށް ރައްޔިތުންގެ މަޖިލީހުގެ ކަމާބެހޭ ކޮމެޓީއަށް ފޮނުވައިފިއެވެ. އެ ނަންތައް ދިރާސާ ކުރުމަށް ފޮނުވާފައިވަނީ ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީއަށެވެ.

ރައީސުލް ޖުމްހޫރިއްޔާ މަޖިލީހަށް ފޮނުއްވި ނަންތައް ތަޅުމަށް އިއްވައިދެއްވީ އަންގާރަ ދުވަހުގެ މަޖިލީހުގެ ޖަލްސާގައި ރައްޔިތުންގެ މަޖިލީހުގެ އަމީންޢާންމު ފާޠިމަތު ނިއުޝާއެވެ.

Advertisement

ބްރޯޑްކޮމްގެ މެމްބަރު ކަމަށް ކުރިމަތިލުމަށް ހުޅުވާލެވުނީ ބްރޯޑްކޮމްގެ ކުރީގެ ރައީސް މުޙައްމަދު ޝަހީބު އިސްތިޢުފާ ދެއްވުމާއި އެކޮމިޝަނުގެ ކުރީގެ ނައިބު ރައީސް ފާޠިމަތު ޒައިނާ ރައްޔިތުންގެ މަޖިލީހުން ވަކިކުރެއްވުމާއި ގުޅިގެންނެވެ.

ބްރޯޑްކޮމްގެ މެމްބަރުންގެ މައްސަލަތަކެއް ފެންމަތިވެފައިވާތީ، ބްރޯޑްކޮމްގެ މެމްބަރުން މަޖިލީހުގެ މިނިވަން މުއައްސަސާތަކާބެހޭ ކޮމެޓީއަށް ޙާޟިރުކޮށް، ވަނީ ސުވާލު ކުރައްވާފައެވެ. އަދި އެކޮމެޓީން ނިންމީ އެކޮމިޝަނުގެ ކުރީގެ ނައިބު ރައީސް އިސްމާއީލް ސޮފްވާން މަޤާމުން ވަކިކުރުމަށެވެ. ނަމަވެސް މަޖިލީހުން ވަކިކުރުމުގެ ކުރިން އޭނާ އިސްތިޢުފާ ދެއްވިއެވެ، އަދި އޭގެ ފަހުން އެކޮމިޝަނުގެ މެމްބަރު ޙަސަން ނަބާހު ވެސް އިސްތިޢުފާ ދެއްވިއެވެ. ހުސްވެފައިވާ އެދެ މަޤާމަށް ކުރިމަތިލި ފަރާތްތަކުގެ އިއްޓަވިއުތަށް މިހާރު މަޖިލީހުގެ މިނިވަން މުއައްސަސާތަކާބެހޭ ކޮމެޓީން ދަނީ ކުރިއަށް ގެންދަމުންނެވެ. އެ ދެ މަޤާމަށް 36 ފަރާތެއް ކުރިމަތިލާފައިވެއެވެ.

ބްރޯޑްކޮމްގައި ހަތް މެމްބަރުން ތިއްބަވާއިރު، މިވަގުތު ތިއްބެވީ، ތިން މެމްބަރުންނެވެ. އެއީ ޒީނާ ޒާހިރު އާއި އާމިނަތު ސަހާރަތު އިއްޒަތުގެ އިތުރުން އަމްޖަދު ވަހީދު އެވެ.

ބްރޯޑްކާސްޓިން ކޮމިޝަނަށް މެމްބަރުން ޢައްޔަން ކުރަމުންދާއިރު، އެކޮމިޝަނާއި މޯލްޑިވްސް މީޑިއާ ކައުންސިލް އުވާލައި، އެ ދެ މުއައްސަސާގެ ކަންކަން ހިންގުމަށް އެއް ކޮމިޝަނެއް އެކުލަވާލުމަށްޓަކައި، މީޑިއާ ކޮމިޝަނުގެ ނަމުގައި ބިލެއްގެ މަސައްކަތް މިނިވަން މުއައްސަސާތަކާބެހޭ ކޮމެޓީން ގެންދަނީ ކުރަމުންނެވެ.