ރިޕޯޓުގެ މައްސަލައިގައި ފިޔަވަޅު އަޅާފައިވަނީ ޤާނޫނުގައި ބަޔާންކޮށްފައި ގޮތުގެ މަތިންކަމަށް ވިދާޅުވި
މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚުލޫފް
މޯލްޑިވިއަން ޑިމޮކްރެސީ ނެޓްވަރކް (އެމްޑީއެން) އުވާލަން ނިންމީ މި ސަރުކާރަށް އެއްވެސް ޕްރެޝަރެއް އޮވެގެން ނޫން ކަމަށް މިނިސްޓަރ އޮފް ޔޫތު, ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފް ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން މަޚްލޫފް ވިދާޅުވީ އެމްޑީއެންއަކީ ޤާނޫނެއްގެ ދަށުން އުފައްދާފައިވާ ޖަމްޢީއްޔާއެއް ކަމަށާއި އެހެން ކަމުން ޤާނޫނާއި ޚިލާފުވުމުން އުވާލެވޭނެ ގޮތްވެސް އަދި ސަސްޕެންޑް ކުރެވޭނެ ގޮތްވެސް ވަރަށް ސާފުކޮށް ޤާނޫނުގައި ލިޔެފައިވާ ކަމަށެވެ.
އަދި، އެމްޑީއެންގެ ރިޕޯޓުގެ މައްސަލަ ހުށަހެޅުނު ދުވަހުން ފެށިގެން އެޖަމްޢިއްޔާ އާއި މެދު ޤާނޫނުގައި ބަޔާންކޮށްފައިވާ ގޮތުގެ މަތިން ފިޔަވަޅު އެޅިފައިވާ ކަމަށް މަޚްލޫފް ވިދާޅުވިއެވެ.
މަޚްލޫފް ވިދާޅުވީ އިޢުލާންގައި ވެސް މި ޕްރޮސެސް ނިމޭނީ 45 ދުވަހުން ކަމަށް ބުނެފައިވާކަމަށެވެ.
ޤާނޫނާއި ޚިލާފަށް ފިޔަވަޅު އަޅައިފިނަމަ ޤާނޫނާ ޚިލާފު ނިންމުމެއް ގޮތުގައި އެކަން އަބަދުވެސް ފެންނަން އޮންނާނެ ކަމަށާއި އެބަޔަކު ކޯޓަށް ގޮސްގެން އެކަން ވިން ކުރުމުގެ ފުރުޞަތުވެސް އޮންނާނެ ކަމަށް މަޚްލޫފް ވިދާޅުވިއެވެ.
ކުރިން ރައީސް ޔާމީނުގެ ވެރިކަމުގައި ކަންކުރި އުޞޫލުން ކުރަން ވެއްޖެނަމަ ވަގުތުން އެ ޖަމްޢިއްޔާ އުވާލެވުނީސް ކަމަށާއި ނަމަވެސް މި ސަރުކާރުން އެފަދަ ކަމެއް ނުކުރާނެ ކަމަށް މިނިސްޓަރ ވިދާޅުވިއެވެ.
މަޚްލޫފް ވިދާޅުވީ އެންމެ ފުރަތަމަ ދުވަހުން ފެށިގެން ވެސް މި މައްސަލަ ވަރަށް ގާތުން ބަލަމުންގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވި ކަމަށާއި ޕްރެޝަރުގައި އެއްވެސް ކަމެއް ނުކުރައްވާނެ ކަމަށް ވިދާޅުވިކަމަށެވެ.
އަދި ޤާނޫނާއި ޤަވާއިދުގެ ތެރެއިން ކުރިއަށް ދާން ޖެހޭ ގޮތަށް މަސައްކަތް ކުރުމަށް ރައީސް އިރުޝާދު ދެއްވާފައިވާކަން މިނިސްޓަރވަނީ ފާހަގަކުރައްވާފައެވެ.
