ފާރަށް މޫނު ލައިގެން ކޮޅަށް ހުންނެވުމަށް ތޯރިގަށް އަންގަވާ މިއަދުވެސް އަދަބު ދެއްވައިފި

މަހިބަދޫ ދާއިރާގެ މެމްބަރ އަހުމަދު ތޯރިގަށް މިއަދުވެސް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަދަބު ދެއްވައިފިއެވެ.

މިއަދު ކުރިޔަށްދާ ޖަލްސާގައި އަޑުގަދަ ކުރައްވާތީ ތަކުރާރުކޮށް ނަސޭހަތްދެއްވުމަށްފަހު ތޯރިޤްގެ ނަން އިއްވާ މަޖިލީހުގެ ތަޅުން ދޫކޮށް ނިކުމެވަޑައިގަތުމަށް މަޖިލީހުގެ ރައީސް ވަނީ އަންގަވާފަ އެވެ. ނަމަވެސް ތޯރިޤްވަނީ ތަޅުން ދޫކޮށް ވަޑައިނުގަން ތަޅުމުގައި މަޑުކުރައްވާފަ އެވެ. އަދި ތާޅަފިލިން ފުންމަވާ އަޑުގަދަ ކުރައްވާފަ އެވެ.

އެއާއެކު މަޖިލީހުގެ ރައީސް ސަރޖަންޓް އެޓް އާމްސްއަށް ތޯރިގް ތަޅުން ދޫކުރައްވާ ވަޑައިގަތުމަށް ދެނެންވުމަށް ވިދާޅުވި އެވެ.

ރައީސް މިހެން ވިދާޅުވުމުން ތޯރިގް ތަޅުން ދޫކޮށް ވަޑައިގަންނަވާތަން ފެނެ އެވެ.

އިއްޔެ ކުރިޔަށްދިޔަ ޖަލްސާގައިވެސް ވަނީ ތޯރިގް އަޑުގަދަ ކުރައްވަން ފެއްޓުވުމުން އަދަބު ދެއްވާފަ އެވެ. އެގޮތުން ތަކުރާރުކޮށް ކަށިގަނޑު ފުމެމުން ގެންދަވާތީ އަދަބެއްގެ ގޮތުން މަޖިލީހުގެ ތަޅުމުގައި ކަށި ގަނޑު ނުފުމޭނެކަމަށް ސަތޭކަފަހަރު ލިޔުމަށް ވަނީ އަންގަވާފަ އެވެ.

މަޖިލީހުގެ ރައީސް، މަޖިލީސް ސްކޫލެއް ހިންގަވާގޮތަށް ހިންގަވާތީ އެކަމަށް އެއް ބަޔަކު އަންނަނީ ފާޑުކިޔަމުންނެވެ. އެކަމަށް އަނެއް ބަޔަކު ތައުރީފު ކޮށް ވާހަކަދައްކާއިރު މަޖިލީހުގެ ރައީސް މެމްބަރުންނަށް ދެއްވާ އަދަބުތަކުން ސްކޫލް ދައުރު ހަނދާންވާ ކަމަށް ބުނެ ސޯޝަލް މީޑިޔާގައި ބައެއް މީހުން އަންނަނީ ޝުއޫރު ފާޅުކުރަމުން ނެވެ.

19 ވަނަ ރައްޔިތުންގެ މަޖިލީސް ފެށި ރިޔާސަތާއި ރައީސް ނަޝީދު ހަވާލުވެ ވަޑައިގަތުމަށްފަހު ރައީސް ނަޝީދު ވަނީ މަޖިލީސް ހިނގާނީ ކުލާސްރޫމެއް ހިނގާ ގޮތަށްކަމަށާއި މަޖިލީހުގެ ފްލޯރ ދޫކުރައްވާ މެމްބަރުން ވަޑައިގެންނަވާއިރު ހުއްދަ ހޯއްދަވަން ޖެހޭނެކަމަށް ވިދާޅުވެފަ އެވެ.